मनोज तिवारी के नयका एलबम ‘जय बिहार जय जय बिहार’

भोजपुरी मेगा स्टार आ बिहार के लल्ला मनोज तिवारी एगो नया अलबम में आपन बिहारी तेवर देखावे जात बाड़न. एह एलबम के नाम बा ‘जय बिहार जय जय बिहार’ जवना के जानल मानल संगीत कम्पनी विकॉन म्यूजिक जारी करत बिया. इहे कंपनी सदी के महानायक अमिताभ बच्चन आ मनोज तिवारी के आवाज. में ‘हनुमान चालीसा’ जारी कइले रहल. ‘जय बिहार जय जय बिहार’ के शूटिंग आजुकाल्हु बिहार के वैशाली आ दानापुर छावनी में चलत बा आ निर्देशक बाड़ें समर मुखर्जी. वैशाली ऐतिहासिक रूप से समृद्ध आ कला संस्कृति के दृष्टिकोण से बहुते धनी जगहा ह जहवाँ दुनिया के पहिला लोकतंत्र स्थापित भइल रहे. भगवान बुद्ध के एह धरती पर तीन बेर आगमन भइल रहे. ईसा पूर्व छठी सदी के उत्तर आ मध्य भारत में विकसित 16 महाजनपदन में वैशाली के खास महत्व रहे. नेपाल के तराई से लिहले गंगा के मैदान का बीच पसरल एह भूमि पर वज्जियन आ लिच्छवियन के संघ (अष्टकुल) गणतांत्रिक शासन व्यवस्था के शुरुआत कइले रहे. तब एहिजा के शासक जनता के प्रतिनिधि चुनत रहलें. लिच्छवियन के नगरवधु आम्रपाली के भला के भुला सकेला. एहिजा के अशोक स्तंभो देखे लायक बा.

मनोज तिवारी कहलें कि एह राज्य के ऐतिहासिक धरोहरन के अतना नजदीक से देखे के ई पहिला मौका रहल. एही क्रम में दानापुर छावनी जाए के मौका मिलल. एह छावनी के बीच से करीब तीन किलोमीटर ले रास्ता पटना के आरा से जोड़ेला आ एह रास्ता पर चले वाला हर आदमी सेना के अनुशासन में नजर आवेला. एहिजा शूटिंग के अनुमति लेबे खातिर जब मनोज तिवारी छावनी प्रमुख से मिललन त शूटिंग के अनुमति दे दिहलन आ जवाननो के पूरा वर्दी में उपलब्ध करवलें. फेर हमनी का मिल के राग छेड़ली जा कि ‘जय बिहार, जय जय बिहार’.


(शशिकांत सिंह, रंजन सिन्हा के रपट)

पारो पटनावाली के शूटिंग ला सुदीप पाण्डेय मलेशिया में

भोजपुरी सिनेमा के एक्शन हीरो सुदीप पाण्डेय पिछला दिने फिलिम “पारो पटना वाली” के शूटिंग खातिर तिसरका बेर मलेशिया चहुँपलें. रंजू सिन्हा के निर्माण एह फिलिम के निर्देशन राज वर्मा करत बाड़ें. सुदीप पाण्डेय के जोड़ी एह फिलिम में सेक्सी बाला दिव्या द्विवेदी संगे बनावल गइल बा. सुदीप पाण्डे एहसे पहिलहू रंजू सिन्हा के बनावल फिलिम “जय हो जगदम्बे माई” आ कसम तिरंगा के” फिलिम में काम कर चुकल बाड़ें. ओहू दुनु फिलिमन के शूटिंग मलेशिया में भइल रहुवे.

सुदीप पाण्डेय बतवलें कि मलेशिया में बिहार आ यूपी के बहुते लोग बा. साथही शूटिंग में मलेशिया के सरकारो भरपूर सहयोग देले. भोजपुरी सिनेमा के बेर बेर एके जगहा फिलिमावल दर्शकन के उकता सकेला एह से शूटिंग के जगहा बदलत रहे के चाहीं. भोजपुरी फिलिम अइसन बने के चाहीं जे हिंदी सिनेमा के टक्कर दे सको ना त एकर लोकप्रियता में कमी आवे लागी. कहलन कि उनकर हमेशा कोशिश रहेला कि दर्शकन के बढ़िया फिलिम देसु.


(संजय शर्मा राज के रपट)

खुश बाड़ी स्मृति सिन्हा

भोजपुरी के चमकत अदाकारा स्मृति सिन्हा आजुकाल्हु बहुते खुश बाड़ी आ होखसु काहे ना ? पिछला दिने रिलीज उनुकर तीनो फिलिम ‘‘साजन चले ससुराल’’, ‘‘देवरा पे मनवा डोले’’ आ ‘‘सौंगन्ध गंगा मईया के’’ बॉक्स ऑफिस पर हिट साबित भइली सँ. स्मृति अबही भोजपुरी के सगरी बड़का निर्माता-निर्देशक आ अभिनेतन संगे काम करत बाड़ी.

स्मृति बतावत बाड़ी कि उनुका खुशी के सबले बड़का कारण बा सबले सफल भोजपुरी फिल्म निर्माता आलोक कुमार संगे लगातार तीसरका फिलिम कइल. कहली कि आलोक जी उनुका के ‘‘साजन चले ससुराल’’ आ ‘‘देवरा पे मनवा डोले’’ जइसन बेहतरीन फिलिम दिहलें आ अब ऊ आलोक जी के ‘‘दूध का कर्ज’’ के शूटिंग करत बाड़ी.

स्मृति सिन्हा के खेसारी लाल संगे ‘‘लाल दुपट्टा मलमल का’’ आ विराज भट्ट संगे ‘‘अंतिम तांडव’’ प्रदर्शन खातिर तइयार बा.


(प्रशांत निशांत के रपट)

‘खून के इल्ज़ाम’ खातिर मोनिका बत्रा डबिंग कइली

पवन सिंह आ मोनिका बत्रा के फिलिम ‘खून के इल्ज़ाम’ के डबिंग शुरु हो गइल बा. पिछला दिने मोनिका सिंह बत्रा आपन डबिंग कइली. पवन सिंह के तारीफ के कसीदा पढ़त मोनिका बत्रा के कहना बा कि पवन जी बहुते व्यावहारिक स्टार हईं आ हमेशा हँसावत आ उत्साह बढ़ावत रहेनी.

फिलिम “खून के इल्जाम” के निर्माता रमेश सिंह आ निर्देशक सनोज मिश्रा हउवें.


(शशिकांत सिंह, रंजन सिन्हा के रपट)

अंजन के रोड शो में अंजना के जलवा

भोजपुरी सिनेमा के गरम लिट्टी अंजना सिंह भोजपुरी के नयका मनोरंजन चैनल “अंजन टीवी” खातिर अपना शहर लखनऊ में मीडिया से रूबरू हो के चैनल का बारे में जानकारी त दिहबे कइली शहर के सड़कन पर अपान काफिला का संगे निकल के रोडो शो कइली.

बतावे जोग बा कि पिछला दिने एह भोजपुरी मनोरंजन चैनल “अंजन टीवी” के भव्य लॉन्चिंग मुंबई में कइल गइल रहे. अंजन टीवी के जन जन तक चहुँपावे खातिर दिल्ली से एगो रोड शो के शुरुआत कइल गइल बा जवन चालीस दिन का अपना सफर में पिछला अतवार के लखनऊ चहुँपल रहे. एह रोड शो के अगुवाई करत रहली लखनऊ के मूल निवासी अंजना सिंह. लखनऊ के लोग अपने शहर के अभिनेत्री के जोरदार स्वागत कइल.

एह रोड शो खातिर मीडिया से रुबरू अंजना सिंह कहली कि जवना शहर में पलइली पसइली ओही शहर में एगो सेलिब्रेटी का रूप में आइल कवनो सपना पूरा भइल जस लागत बा.


(उदय भगत के रपट)

ज्वालामंडी के निकहा शुरुआत मिलल

भोजपुरी के सदाबहार सुपर स्टार रवि किशन के फिलिम “ज्वालामंडी एक प्रेम कहानी” के बिहार में निकहा शुरुआत मिलल बा. निर्माता राजू सिंह आ निर्देशक जगदीश शर्मा के एह फिल्म में रवि किशन एगो मजबूर प्रेमी के भूमिका में बाड़न जे एगो कोठा मालकिन ज्वाला बाई के चंगुल में फंसल अपना प्रेमिका के ओहिजा से छुड़ावे का फेर में लागल बाड़ें.

फिल्म में लवी रोहतगी, विजय आ ब्रिजेश त्रिपाठी के भूमिका सराहल जात बा. रवि किशन आ रानी चटर्जी के प्रेम प्रसंग आ किन्नर के भूमिका निभावत अवधेश मिश्रा के खतरनाक अंदाज़ सबका भावत बा. निर्देशक जगदीश शर्मा के कहना बा कि कलाकारन के शानदार अभिनय का चलते फिलिम के सफलता खातिर उनुका पहिलही से पूरा भरोसा रहल.

ज्वालाबाई के किरदार के अपना फ़िल्मी कैरियर के सबले बढ़िया किरदार माने वाला अवधेश मिश्रा दर्शकन से मिलत गारी से गदगद बाड़न.


(उदय भगत के रपट)

सब पर भारी पड़लन निरहुआ ‘‘बिहारी’’

सिनेमा भोजपुरी के जुबली स्टार दिनेशलाल यादव ‘निरहुआ’ के नइकी रिलीज फिलिम ‘‘एक बिहारी सब पर भारी’’ सगरी बिहारी में मजगर बिजनेस करत बिया. निरहुआ के शानदार एक्शन आ बेजोड़ संवाद से भरल एह फिल्म के पहिला हफ्ता के कलेक्शन बिहार में चालीस लाख रुपिया नेट रहल जवन कवनो भोजपुरी फिलिम के पहिला हफ्ता में सबले बेसी बा.

बिहार के 55 गो सिनेमाघरन में एह फिलिम के अब दूसरका हफ्ता चलत बा. ‘एक था टाईगर’ जइसन रिकॉर्ड व्यवसाय करे वाली फिलिम का साथे रिलीज भइल एह फिलिम के सफलता से ई फेरू साफ हो गइल कि निरहुआ के आपन दर्शक वर्ग बा जे सिरिफ उनुके के देखल चाहेला.

एह फिलिम में निरहुआ बिहारी नवही के भूमिका कइले बाड़ें आ साथ में दू गो नायिका बाड़ी अंजना सिंह आ अक्षरा सिंह. फिलिम के निर्देशन जगदीश शर्मा के बा आ निर्माता हउवें रवि शर्मा.


(प्रशांत निशांत के रपट)

भोजपुरी सिनेमा के कमाई खातिर नया राह खोल दिहलें प्रकाश अवस्थी

भोजपुरी फिलिम निर्मातन के कमाई के एगो अउर राह मिल गइल बा छत्तीसगढ़ टेरेटरी से. भजन सम्राट अनूप जलोटा के कंपनी अपना भोजपुरी फिलिम ला छत्तीसगढ़ी सिनेमा के सुपर स्टार प्रकाश अवस्थी के भोजपुरी परदा पर उतारे जात बाड़ें जवना से अब भोजपुरी फिलिमन के छत्तीसगढ़ी संस्करण ओहिजा प्रदर्शित करे के नया राह खुल गइल बा.

छत्तीसगढ़ी सिनेमा में प्रकाश अवस्थी बीसन से बेसी फिलिमन में काम कर चुकल बाड़ें आ सगरी फिलिम सुपर डुपर हिट रहल बाड़ी सँ. उनकर सबले बड़हन फिलिम रहल ‘मया’ जवना के मिलल सफलता से प्रकाश अवस्थी छत्तीसगढ़ी सिनेमा के सुपर स्टार बन गइलें. ओकरा बाद आइल ‘टू ए रिक्शावाला’, ‘भावर’ आ ‘दो लफाड़ू’ छत्तीसगढ़ में खूब कमाई कइली सँ. एह यंग्री यंग मैन स्टार के नामे बहुत होला छत्तीसगढ़ में फिलिम के सफलता ला.

प्रकाश अवस्थी भोजपुरी फिल्म ‘चिंगारी’ में बतौर नायक बनके नजर अइहें. जइसे नेपाली सुपर स्टार विराज भट्ट के सिनेमा भोजपुरी में उतार के एगो नया प्रयोग कइल गइल रहे ओइसहीं अब प्रकाश अवस्थी के उतार के कइल जात बा. एहसे भोजपुरी सिनेमा के एगो नया बड़हन बाजार मिले के राह खुलल बा.


(शशिकांत सिंह, रंजन सिन्हा के रपट)

‘नागिन’ के सांग रिकार्डिंग में कल्पना आ इंदू सोनाली के दंगल

जइसे बालीवुड में सलमान खान आ शाहरुख खान में तनातनी चलल करेला कुछ ओइसने हालत बन गइल जब दू गो मशहूर भोजपुरी गायिका कल्पना आ इंदू सोनाली रेकार्डिंग स्टूडियो में एक दोसरा पर दोष लगावे लगली. ओ दोषो अइसन कि निर्माता-निर्देशक के गोड़ हाथ फूल गइल.

ओह दिन निर्माता निर्देशक राजकुमार आर. पांडे के ‘नागिन’ के गाना के रिकार्डिंग कइल जात रहुवे. एगो गाना में कल्पना आ इंदू सोनाली के एक संगे गावे के रहुवे. गाना अइसन कि लागे कि बिरहा के दंगल चलत बा. आ ओही गाना के ले के कल्पना आ इंदू सोनाली में दोषादोषी के दौर चल निकलल, रिकार्डिंग का मौका पर राजकुमार पांडे फिल्म के नायक खेसारी लाल यादव, रानी चटर्जी, आ मोनालिसा के नेवतले रहलें. बतावल जात बा कि संगीतकार राजेश रजनीश कल्पना आ इंदू सोनाली के आवाज़ में गाना रिकार्ड करावल शुरु कइलें. कुछ देर ले माहौल ठीक बुझाइल काहे कि दुनु जनी, कल्पना आ इंदू सोनाली गाना के मूड में रहली आ वइसने गवली जइसन कि निर्देशक राजकुमार पांडे चाहत रहलें. दुनु गायिका अतना बढ़िया गावत रहली कि खुद राजकुमार पांडे के लागल कि कहीं ई व्यवसायिक प्रतिद्वंदिता त ना ह आ ई सोचिए के उनकर हालत खराब हो गइल. राजकुमार पांडे रिकार्डिंग रोके के कहलें त दुनु जनी हँसे लगली. कहल लोग कि अतना बढ़िया दंगल चलत रहुवे अनेरे रोक दिहनी. कल्पना आ इंदू सोनाली के सूझबूझ देख के राजकुमार पांडे दंग रह गइलें आ फेर पूरा मूड से दुबारा ‘नागिन’ के ई जंगी मुकाबला रिकार्ड करावल गइल.

साईदीप फिल्म्स प्रस्तुत ‘नागिन’ के लेखक मनोज कुशवाहा, गीतकार प्यारे लाल यादव, विपिन बहार, आ महेश परदेशी, मारधाड़ निर्देशक हीरा यादव, नृत्य निर्देशक पप्पू खन्ना आ एडीटर हउवें गुर्जन सिंह.

कलाकारन में खेसारीलाल यादव, रानी चटर्जी, मोनालिसा, नवोदित ज्योतित, मनोज टाईगर, सीमा सिंह, बृजेश त्रिपाठी, प्रकाश जैस, के.के. गोसवामी, मंटूलाल, सी.पी. भट्ट, अनूप अरोड़ा, पुष्पा वर्मा, वंदिनी मिश्रा अउर अवधेश मिश्रा के खास नाम बा.


(स्रोत – शशिकांत सिंह, रंजन सिन्हा के रपट)

मुंबई में सीमा सिंह के डबल धमाका

एह शुक का दिने सिनेमा भोजपुरी के डांसिंग क्वीन सीमा सिंह के जलवा मुंबई के सिनेमाघरांन में देखल बनी. एह हफ्ता उनकर दू गो फिलिम मुंबई में रिलीज होखे वाला बा. एगो फिलिम ‘बजरंग’ के निर्माता जे.पी. सिंह आ निर्देशक नंद किशोर महतो हउवें. मुख्य भूमिका पवन सिंह, अक्षरा सिंह आ संजय पांडे के बा. दुसरकी फिलिम हवे ‘गोला बारूद’ जवना खातिर सीमा सिंह पर भव्य पैमाने पर चिकनी चमेली से मिलत जुलत गाना मुंबई के चांदीवली स्टूडियो में एगो भव्य सेट लगाके करीब दू सौ डांसरन संग फिल्मावल गइल बा. एह गाना में सीमा सिंह के साथे बाड़ें मनोज टाईगर आ अवधेश मिश्रा बाड़ें. नृत्य निर्देशक रहलें पप्पू खन्ना.

बतावल जात बा कि एह गाना खातिर सीमा सिंह बहुते मेहनत कइले रही एतना कि उनकर पीठ छिला गइल रहे. पांच दिन ले चलल एह भोजपुरिया चिकनी चमेली खातिर ग्रीन चिली इंटरटेनमेंट करीब 30 गो लाइट, आ जिमी जिप कैमरा के इस्तेमाल कइलसि. सीमा सिहं ला बनावल खास मराठी डिजाइन के ड्रेस पर कई लाख रुपिया लागल रहुवे.


(स्रोत – शशिकांत सिंह, रंजन सिन्हा के रपट)