बढ़िया कार्यक्रम दिहल हमनी के कोशिश रही – बतवली रजनी सिंह

मोतिहारी में बोलावल प्रेस सम्मेलन में अंजन टीवी के कंटेट हेड़, सामग्री प्रमुख, रजनी सिंह बतवली कि उनुका चैनल के ना त केहु से मुकाबला बा ना केहु का आगा बढ़े के कवनो योजना बा. अंजन टीवी त बस सही दिशा में सही सोच का साथे चलत जाए के बा. अंजन के कोशिश रही कि बढ़िया संदेश देबेवाला कार्यक्रम पेस कइल जाव.

पिछला दिने लॉंच भइल अंजन टीवी आपन जानकारी जन जन ले चहुँपावे ला पिछला कई दिन से बिहार, उत्तर प्रदेश आ झारखण्ड के शहरन में आपन कार्यक्रम करत बा. ए॰ए॰पी॰ मीडिया के उपक्रम अंजन टीवी आकर्षणपूर्ण मनोरंजन देबे के इरादा रखले बा. चैनल चैबीसों घंटे मनोरंजन करी जवना में भोजन, स्वास्थ्य, संगीत, फिल्म्स, सोप्स, रियलिटी शोज़, कोमेडी, यात्रा आ लाइफ़ स्टाइल से जुड़ल कार्यक्रम देखावल जाई. अधिकतर शो के उद्घौषक भोजपुरी सिनेमा के महारथी रहीहें.


(उदय भगत के रपट)

Advertisements

अंजन के रोड शो में अंजना के जलवा

भोजपुरी सिनेमा के गरम लिट्टी अंजना सिंह भोजपुरी के नयका मनोरंजन चैनल “अंजन टीवी” खातिर अपना शहर लखनऊ में मीडिया से रूबरू हो के चैनल का बारे में जानकारी त दिहबे कइली शहर के सड़कन पर अपान काफिला का संगे निकल के रोडो शो कइली.

बतावे जोग बा कि पिछला दिने एह भोजपुरी मनोरंजन चैनल “अंजन टीवी” के भव्य लॉन्चिंग मुंबई में कइल गइल रहे. अंजन टीवी के जन जन तक चहुँपावे खातिर दिल्ली से एगो रोड शो के शुरुआत कइल गइल बा जवन चालीस दिन का अपना सफर में पिछला अतवार के लखनऊ चहुँपल रहे. एह रोड शो के अगुवाई करत रहली लखनऊ के मूल निवासी अंजना सिंह. लखनऊ के लोग अपने शहर के अभिनेत्री के जोरदार स्वागत कइल.

एह रोड शो खातिर मीडिया से रुबरू अंजना सिंह कहली कि जवना शहर में पलइली पसइली ओही शहर में एगो सेलिब्रेटी का रूप में आइल कवनो सपना पूरा भइल जस लागत बा.


(उदय भगत के रपट)

'भौजी नंबर वन सीजन-4' के एकरिंग करीहें प्रिएश सिन्हा

भोजपुरी टी.वी. चैनल ‘महुआ टी.वी.’ पर प्रसारित होखत लोकप्रिय रियलिटी शो ‘भौजी नंबर- वन सीजन-4’ के प्रसारण शुरू हो गइल बा आ हर बेर का तरह एहु बेर एकर एंकरिंग भउजाइयन के लहुरा देवर प्रिएश सिन्हा करत बाड़ें. एहसे पहिले फरवरी से जुलाई बीच प्रसारित भइल रियलिटी शो ‘गृह लक्ष्मी’ ओ के प्रिएशे जजमानी कइले रहलें. एह चलते प्रिएश घर-घर में चहेता बन गइल बाड़ें.

लगातार चउथा बेर भौजी नंबर वन के एंकर बनल प्रियेश सिन्हा एकरा पहिला सीजन के जजमानी साल 2009 में कइले रहलें. तबसे उहे एकर एंकरिंग करत आवत बाड़ें. एकरा अलावे साल 2009 में ऊ ‘हँसी का अखाड़ा’ के विजेतो भइल रहलें जवना के जज रहलें सुनील पाल, प्रताप सिंह फौजदार, आ सिराज खान. 2007 में ‘स्टार वन’ के ‘द ग्रेट इन्डियन लाफ्टर चैलेन्ज भाग-3’ में पहिला भोजपुरी प्रतिभागी रहलन प्रिएश आ तब ऊ ‘एयरटेल’ के विज्ञापन के वीडियो शूटो कइले रहलें.

बतियावे में माहिर आ अपना मेहनत काबल पर प्रिएश बहुते पुरस्कार आ अवार्ड बटोर चुकल बाड़ें जवना में 2009 में राज घाट दिल्ली में ‘बेस्ट एंकर इन इंडस्ट्री’ का अवार्ड मैनेजमेंट गुरु अरविन्दम चौधरी के हाथे, 2010 में विश्व भोजपुरी सम्मलेन में द्वारिका, दिल्ली में ‘बेस्ट इंटरटेनर’ के अवार्ड अभिनेता शत्रुघ्न सिन्हा के हाथे आ 2011 में पटना में बिहार गौरव अवार्ड बिहार सरकार के मंत्री गिरीराज सिंह के हाथे पा चुकल बाड़ें.

प्रिएश जल्दिए ‘मेहरारू चाही मिल्की व्हाईट’ फिलिम का माध्यम से नायक बन के सिनेमा भोजपुरी का परदा पर चमके वाला बाड़न. एह फिलिम में उनकर नायिका बाड़ी चर्चित अभिनेत्री रानी चटर्जी. बाकी कलाकारन में गजेन्द्र चौहान, सुशील सिंह, मेहनाज़ श्राफ, सीमा सिंह अउर पुर्निला के नाम बा. प्रिएश के दोसर आवे वाली फिलिमन में ‘प्यार भईल परदेशी से’ अउर ‘पिरितिया प्राण बन गईल’ फिलिमो आवेवाली बाड़ी सँ.


(अपना न्यूज के रपट)

सुरों का महासंग्राम के विजेता बनलें अरूणदेव यादव

भोजपुरी चैनल महुआ टीवी के लोकप्रिय शो ‘सुरों का महासंग्राम’ के विजेता के ताज झारखण्ड के अरूणदेव यादव का माथे चढ़ल जे बिहार के प्रतीक राज के आठ हजार वोट से हरा दिहलें. पटना के बी.एम.पी. ग्राउण्ड से लाइव कार्यक्रम के ग्रैण्ड फिनाले में यु.पी. के कल्पना तिसरका जगहा रहली.

पचास हजार लोग का मौजुदगी में भइल एह फिनाले में मनोज तिवारी, निरहुआ, पाखी हेगड़े, संभावना सेठ, प्रवेशलाल, शुभी शर्मा, उत्तम तिवारी, संगीतकार धनंजय मिश्रा, सतीश, अजय, गायक मोहन राठौर, ममता रावत आ आलोक कुमार रंगारंग कार्यक्रम पेश कइलें.

शुभी के ठुमका के दिवाना भइल पटना

अदाकारा शुभी शर्मा के लगावल ठुमका पटना के आपन दिवाना बना लिहलसि. एह परफारमेंस में उनुकर जोड़ीदार रहलें प्रवेश लाल. बैकग्राउंड में बाजत रहल “दिलवालों के दिल का करार लूटने मैं आई हूं यूपी बिहार लूटने” आ दोसरका गौत रहल “बोले दिल के मुर्गा कू कू..”

एह कार्यक्रम के मुख्य अतिथि रहलें बिहार के मुख्यमंत्री नितीश कुमार आ महुआ के सी.एम.डी. पी.के. तिवारी.


(प्रशांत निशांत के रपट)

करण जौहर क पसंद आइल रवि किशन के भोजपुरी गाना

फिल्म दबंग में सलमान खान

हिंदी फिफिलिमन के मशहूर सुप्रसिद्ध निर्माता निर्देशक करण जौहर भोजपुरीओ गाना के शौक़ीन हउवें खासकर के ओह गीतन के जवना के रवि किशन पर फिल्मावल गइल होखे. करण जौहर एह बात के खुलासा कइलन कलर्स टीवी के शो “झलक दिखला जा में” जवन पिचला शनिचर आ अतवार के देखावल गइल.

एह एपिसोड में रवि किशन के दबंग के गाना पर दिहल पर्फोमेंस का बाद करण जौहर रवि किशन के बहुते तारीफ कइलन आ कहलन कि उनुका भोजपुरी फिलिमन के गाना बहुते पसंद बा खासकर के रवि किशन पर फिल्मावल कुछ गाना. ओकरा बाद ऊ रवि किशन से निहोरा कइलन कि ऊ उनका फेवरेट गाना “तोहार लहंगा उठा देब रिमोट से” पर परफोर्म करसु. रवि किशन तब ठेठ भोजपुरिया अंदाज़ में ओह गाना पर ठुमका लगवलें.

रवि किशन के कहना बा कि करण जौहर जइसन निर्माता निर्देशक अगर भोजपुरी गाना पसंद करेलें त ई बिना शक भोजपुरी ला शुभ संकेत बा.


(उदय भगत के रिपोर्ट)

रवि किशन भोजपुरिया रंग में रंग दिहलें “झलक दिखला जा” के

कलर्स के शो झलक दिखला जा में रवि किशन

भोजपुरी के सदाबहार सुपर स्टार रवि किशन क एगो खासियत ह कि ऊ माहौल क मुताबिक ढल जालें आ माहौलो जे अपना रंग में रंग देलें. ते हैं. कलर्स टीवी के बहुचर्चित शो “झलक दिखला जा” में, रवि किशन बतौर प्रतिभागी कोरियोग्राफर कुंजन क संगे डांस के जलवा बिखेरत बाड़न. एकर प्रसारण पिछला शनिचर के शुरु हो गइल. पहिलके एपिसोड में रवि किशन आपन ओह आलोचनन के जवाब दे दिहलन कि उनुका बस भोजपुरिए डांस आवेला. जज क कुर्सी पर बइठल करण जौहर रवि किशन के परफोर्मेंस पर उनुका के बधाई देत कहलन कि “वाकई आप स्टार हैं”.

माधुरी दीक्षित शायद पहिला बेर भोजपुरी में बोलली आ कहली कि नीक लागल. रेमो डिसूजो रविकिशन के तारिफ कइलन. कौन बनेगा करोडपति के विजेता सुशील कुमारो एह शो के हिस्सा बाड़न. ऊ रवि किशन के आशीर्वाद लिहलन आ कहलन कि आप भोजपुरी के अमिताभ बच्चन हईं. बहरहाल पहिलके एपिसोड में रवि किशन आपन दमदार मौजूदगी दर्ज करवा दिहलन. आ आपन भोजपुरिया रंग बखूबी बिखेरलन.

एह शो के प्रसारण शनिचर के रात नौ बजे कइल जाला.


(उदय भगत के रपट)

ममता राउत के अनके अवार्ड मिलल


सुर संग्राम उप विजेता आ बहुचर्चित पार्श्वगायिका ममता राउत नित नया कामयाबी क राह तय करत जात बाड़ी. पिछला 22 मार्च 2012 के मुंबई के शंमुखानंद हाल में आयोजित ‘बिहार दिवस’ कार्यक्रम में अभिनेता शत्रुघ्न सिन्हा के हाथे ममता के “बिहार सम्मान” से सम्मानित कइल गइल. फेर 26 मार्च 2012 के दिल्ली में भइल ‘छठवां विश्व भोजपुरी सम्मेलन’ में “पूर्वांचल संगीत सम्मान” के अवार्ड दिहल गइल.

एह घरी दूरदर्शन पर प्रसारित होखत ‘भारत की शान’ शो में लगातार दू हफ्ता ‘बेस्ट परफार्मर ऑफ़ द डे’ के ख़िताबो से नवाजल गइली ममता राउत. अबही ले नाहियो त तीस गो भोजपुरी फिलिमन में पार्श्वगायन कर चुकल बाड़ी ममता राउत. उनकर पहिला फिल्म रहे ‘पियवा बड़ा सतावेला’ जवना ला ममता के गावल हिट गीत ‘झाड़ू पोछा करब नाही…’ रानी चटर्जी पर फिल्मावल गइल. हालही में ममता निर्माता के०के० वर्मा के फिल्म ‘घमासान’ में ‘हम चिक्कन मक्खन मलाई…’ गीत रिकार्ड करवली.


(अपना न्यूज के रपट)