भोजपुरी में पहिलका वेबसाइट

भोजपुरी में पहिलका वेब साइट अँजोरिया डॉटकॉम अब फेरू रउरा सेवा में हाजिर बा. आईं, पढ़ीं, देखीं आ उत्साह मरे मत दीं.
राउर, हमार, सभकर आपन भोजपुरिया साइट ह अँजोरिया डॉटकॉम. ना धन माँगत बा, ना तन. बस राउर नेह के पियासल बिया अँजोरिया. सूखे मत दीं एकरा के.

फिलिम डकैत आ खुद्दार २७ जुलाई के बिहार में रिलीज भइली सँ

पिछला शुक 27 जुलाई के बिहार में पवन सिंह स्टारर ‘‘डकैत’’ आ विराज भट्ट अभिनीत ‘‘खुद्दार’’ रिलीज कइल गइल. ‘‘डकैत’’ 40 गो सिनेमाघरन में आ ‘‘खुद्दार’’ बिहार के 30 गो सिनेमाघरन का साथे मुंबईओ में रिलीज कइल गइल, दुनु के शुरूआती ओपनिंग बढ़िया रहल.


(प्रशांत निशांत के रपट)

पवन सिंह के ‘डकैत’ बजवलसि बिहार में सफलता के डंका

सिनेमा भोजपुरी के बड़का अभिनेता पवन सिंह के फिल्म ‘डकैत’ के बिहार में शानदार सफलता मिलल बा. एह फिल्म में पवन सिंह टाइटिल भूमिका में बाड़न आ उनका साथे तीन गो हीरोइन बाड़ी मोनालिसा, प्रतिभा पाण्डेय आ चांदनी चोपड़ा. पवन सिंह के शानदार एक्शन स्टंट्स दर्शक बहुते पसंद क५६ बाड़ें.


(शशिकांत सिंह रंजन सिन्हा के रपट)

भोजपुरी में मिंक सिंह के डाँस के जलवा.

सिनेमा भोजपुरी में त अपने अनेके अदाकारा लोग के अपना अदा से दर्शकन के दिल जीतत देखले होखब बाकिर अबकी एगो नया चेहरा लउकी मिंक सिंह के जे अपना लटका-झटका अउर मदमस्त अदा से दर्शकन के घायल करीहें. वेद ऑडियो वीडियो फिल्म्स प्रोडक्शन के भोजपुरी फिल्म “विध्वंस” के एगो आइटम सॉन्ग में मिंक सिंह के जलवा देखे के मिली.

निठारी हत्याकांड पर बनल बतावल जात एह फिल्म के निर्माता हउवें श्रवण कुमार आर्य आ निर्देशक अशोक गोस्वामी. कलाकारन में मनोज पाण्डेय, प्रिया शर्मा, कुणाल सिंह, साधना सिंह, मिंक सिंह के अलावे बिंदु दारा सिंहो पहिला बेर भोजपुरी परदा पर दर्शकन से रु-ब-रु होखीहें.


(स्पेस क्रिएटिव मीडिया के रपट)

हाजीपुर में इंडस्ट्रियल पार्क क शिलान्यास कइलन मनोज तिवारी


पिछला दिने भोजपुरी मेगा स्टार आ गायक मनोज तिवारी हाजीपुर में उद्यमी विहार के एगो कई तल्ला वाला इंडस्ट्रियल पार्क के शिलान्यास कइलन. हाजीपुर के कुआरी में हजारों लोग का मौजूदगी में मशहूर बिल्डर ‘वास्तु विहार’ के तर्ज पर ओकरे औद्योगिक इकाई ‘उद्यम विहार’ का तरफ से हाजीपुर के लोगन के ई नायाब तोहफा दिहल गइल.

एह मौका पर उद्यम विहार के सीएमडी विनय तिवारी कहलन कि एक साल में ई भवन बन जाई आ तब एहमें दू सौ लघु उद्यम लगावल जाई जवना के बुकिंग शुरु हो गइल बा. बिजली के चौबीस घंटा सप्लाई खातिर तीन मेगावाट के कैप्टीव पावर प्लांटो लगावल जाई. बाद में अइसने पार्क राज्य के बाकिओ शहर में बनावे के योजना बा.

शिलान्यास कइला क बाद मनोज तिवारी उमेद जतवलें कि आवे वाला दिन में बिहार क लोग पंजाब के टिकट कटावल भुला जाई. अइसनका योजना निश्चिते बिहार के बेरोजगारी खतम करे में सार्थक साबित होखी. समारोह में आइल भाजपा के प्रदेश महामंत्री मिथिलेश तिवारी कहलन कि उद्यम विहार के ई प्रयास अनूठा साबित होखी.

एह मौका पर मनोज तिवारी अपना गवनई से लोगन के जम के मनोरंजनो कइलें. उनुकर साथ देत रहली महुआ टीवी क लोकप्रिय गायिका सुरभि.


(शशिकांत सिंह रंजन सिन्हा के रपट)

ब्रह्मेश्वर मुखिया के हत्या कर दिहल गइल

आरा में आजु सबेरे चार बजे टहले निकलल ब्रह्मेश्वर मुखिया के कुछ अपराधी गोली मार के हत्या कर दिहलें. कुछ महीना पहिले ब्रह्मेश्वर मुखिया अदालत से आरोप मुक्त भइला का बाद जेल से रिहा भइल रहलें. बिहार सरकार के मालूम रहे कि रणवीर सेना के पूर्व प्रमुख रहल ब्रह्मेश्वर मुखिया के जान पर हरदम खतरा बा. एकरा बावजूद उनुका के कवनो सुरक्षा ना दिहल गइल रहे.

नक्सली आतंक से इलाका के किसानन के बचावे का मकसद से बनल रणवीर सेना जमीन मालिक किसानन के सुरक्षा में बनल सशस्त्र संगठन रहुवे. नक्सलियन से मुकाबला करे में अनेके हत्याकाण्ड भइल जवना में कबो कबो बेकसूर औरतन आ बचवनो के मार दिहल गइल रहे. एही सब नरसंहार में ब्रह्मेश्वर मुखिया के गिरफ्तार कर के मुकदमा चलावल गइल रहे बाकिर अदालत सबूत का अभाव में उनुका के रिहा कर दिहलसि.

मुखिया के हत्या का बाद आजु आरा भोजपुर आ अगल बगल के कई इलाकन में छिटपुट हिंसा के खबर आवत बा. हो सकेला कि ई संघर्ष जातीय संघर्ष के रूप धर लेव. पुलिस प्रशासन हालात से निपटे में लागल बा.

जदयू सांसद निषाद राष्ट्रपति के चुनाव लड़ीहें

मुजफ्फरपुर से सांसद कैप्टन जयनारायण निषाद राष्ट्रपति चुनाव लड़े के घोषणा कइले बाड़न. उनुकर कहना बा कि आजु ले कवनो अति पिछड़ा के राष्ट्रपति नइखे बनावल गइल. निषाद अपना खातिर समर्थन जुटावे बदे सगरी सांसद आ विधायकन के चिट्ठी भेजले बाड़न.
हालांकि अबही ले उनुका अपना खातिर प्रस्तावको नइखे भेंटात. पार्टी के समर्थन मिले के कवनो सवाले नइखे.
एहसे बेहतर हाल पी ए संगमा के बा जिनका उम्मीदवारी खातिर जयललिता आ नवीन पटनायक के समर्थन सामने आइल बा बाकिर उनुकर पार्टी राकांपा साफ मना कर दिहले बिया. संगमा के दावेदारी एह आधार पर बा कि आजु ले कवनो आदिवासी नेता के राष्ट्रपति नइखे बनावल गइल.
एह आधार पर अबहीं बहुते तरह के उम्मीदवारी सामने आवे के अनेसा बा. सबहीं जानत बा कि एहसे कुछ होखे हवाखे वाला नइखे बाकिर कुछ दिन मीडिय में प्रचार त मिलिए जाई.
सबले बड़का अनेसा बा कि कहीं प्रणव मुखर्जी के राष्ट्रपति मत बनवा दे कांग्रेस सरकार. उनुका जइसन बिना रीढ़ के राष्ट्रपति फखरुद्दीन अली अहमद, ज्ञानी जैल सिंह, प्रतिभा देवी सिंह पाटिल वगैरह के परंपरा में रही.

बाबा जय गुरुदेव के निधन

आध्यात्मिक गुरू बाबा जय गुरुदेव के निधन शुक का रात पौने दस बजे एक सौ सोलह साल का उमिर में मथुरा के उनुका आश्रम में हो गइल. बाबा के अंतिम संस्कार सोमार का दिने कइल जाई. एकर विधि क बारे में फैसला प्रबंध समिति करी. आजु अतवार क दिने प्रबंध समिति के बइठक में बाबा के उत्तराधिकारी के फैसलो कइल जाई.

भोजपुरी के अठवीं अनुसूची में जगहा मिले के आसार

बियफे का दिने लोकसभा में एगो ध्यानाकर्षण प्रस्ताव पर गृह मंत्री पी चिदंबरम भोजपुरी में कहलन कि “हम रउआ सभे के भावना समुझत बानी” आ आश्वासन दिहलन कि एह मामिला में एगो बिल संसद के मानसून सत्र में ले आवल जाई.

भोजपुरी के संविधान के अठवीं अनुसूची में शामिल करावे खातिर भोजपुरी के अनेके संगठन एक जमाना से आंदोलन करत आइल बाड़न. दुख के बात त ई बा कि बलिया के चन्द्रशेखर जब प्रधानमंत्री रहलन तबहियो भोजपुरी के ओकर जायज जगहा ना मिल सकल जबकि उनुके राज में नेपाली के एह सूची में जगहा दे दिहल गइल रहे.

टटका खबर, बुध, 2 मई 2012

उत्तर प्रदेश

  • कोटा के अनाज बाहर भेजे का आरोप मे सीबीआई काल्हु लखीमपुर खीरी में तीन गो गल्ला व्यापारियन के गिरफ्तार कर लिहलसे. एह मामिला में अबही ले अठारह जने गिरफ्तार हो चुकल बाड़े.
  • एनआरएचएम घोटाला में गिरफ्तार बाबू सिंह कुशवाहा समेत नौ गो आरोपियन के हिरासत पन्द्रह मई ले बढ़ा दिहल गइल बा.
  • मायावती पर आमदनी से बेसी के संपति राखे का मुकदमा में काल्हु सु्प्रीम कोर्ट आपन फैसला सुरक्षित राख लिहलसि.
  • सु्प्रीम कोर्ट यूपी आ उत्तराखंड के मुख्यमंत्री रह चुकल आ राज्यपाल रहल नारायनदत्त तिवारी के निर्दैश दिहलसि कि ऊ आपन डीएनए जाँच करावे से मुकर ना सकसु. उनुका ई जाँच करवावहीं के पड़ी.
  • काल्हु चंदौली में भोजपुरी कवि रामजियावन दास बावला आ गोरखपुर में भोजपुरी साहित्यकार आचार्य प्रतापादित्य के निधन हो गइल. पूरा समाचार अँजोरिया पर पढ़ीं.
  • मिर्जापुर के नक्सल प्रभावित इलाका में विकास के काम खातिर चार सौ करोड़ रुपिया के योजना के स्वीकृति मिलल आ तीस करोड़ रुपिया अवमुक्त कर दिहल गइल.
  • प्रदेश सरकार तय कइले बिया कि अब कवनो किसान के जमीन के कर्जा वसूली का नाम पर कुर्की जब्ती ना कइल जाई.

बिहार

  • स्थानीय निकाय चुनाव खातिर आजु नाम वापसी के आखिरी दिन ह आ आजुवे चुनाव चिह्न बाँट दिहल जाई. चुनाव आयोग के निर्देश बा कि छह महीना से फरार अभियुक्तन के परचा खारिज कर दिहल जाव. दागी प्रत्याशी के परिजनो के चुनाव लड़े पर रोक लगावे के कहले बावे आयोग.
  • बिहार में पुलिस व्यवस्था में बदलाव करत विधि व्यवस्था आ अनुसंधान के अलग कर दिहल गइल बा. मुख्यमंत्री नीतीश कुमार के कहना बा कि आवे वाला समय में ई फैसला मील के पत्थर साबित होखी. अबसे हर थाना में विधि व्यवस्था आ अनुसंधान खातिर अलग अधिकारी होखीहें.
  • तंबाकू सेवन पर रोक लगावे के एगो खास योजना का तहत देश के दस गो राज्यन के दू दू गो जिला चुनल गइल बा जहवाँ तंबाकू सेवन पर पूरा रोक लगावल जाई. बिहार में एह काम खातिर पटना आ मुंगेर के चुनल गइल बा.
  • काल्हु आइल आंधी तूफान से किशनगंज जिला में चार आदमी के मौत हो गइल बा आ आधा दर्जन लोग घवाहिल हो गइल बा.
  • आजु से बिहार मदरसा बोर्ड के फोकानिया आ मौलवी के सालाना इम्तिहान शुरू भइल बा जवन चौदह मई ले चली.
  • सासाराम के मीना बाजार में काल्हु आग लगला का चलते चार गो दुकान के लाखो के सामान जर गइल.
  • पूर्व मध्य रेलवे अपना टीसनन पर इंटरनेट के मुफ्त सुविधा देबे खातिर योजना बनवले बिया. एह सुविधा के लाभ उठावे खातिर सवारी टीसन पर बतावल नंबर पर एसएमएस भेजके यूजर नेम आ पासवर्ड ले पइहें.

देश

  • पहली मई से देश में ईकचरा नियन्त्रण लागू हो गइल बा. अब पुरान टेलीविजन, मोबाइल, कंप्यूटर वगैरह देश के तिहत्तर गो अधिकृत संस्थान में भेजे के पड़ी जे ओकरा के रिसाइकिल करीहें. ई रोक अब आमो आदमी पर लागू हो गइल बा.
  • गुजरात के 52वाँ स्थापना दिवस के समारोहो में भाजपा आ कांग्रेस जमके एक दोसरा पर निशाना लगवले.
  • ए के एंटोनी का अध्यक्षता में बनल हार के समीक्षा खातिर कांग्रेस पार्टी के कमिटी अपना रिपोर्ट में कहले बिया कि बेमतलब बयानबाजी का चलते यूपी में कांग्रेस हारल.
  • लागत बा कि देश के अगिला राष्ट्रपति कवनो मुसलमाने होखी काहे कि मुसलमान वोट बैंक हथियावे का लालच में सगरी सेकूलर दल कवनो ना कवनो मुसलमाने के नाम लेत सुनात बाड़े. सबले बेसी संभावना मौजूदा उपराष्ट्रपति हामिद अंसारी के बा जिनका पक्ष में सपा आ वाम दल सामने आवत लउकत बाड़े. एही वोट पालिटिक्स का चलते जदयू भाजपा से आपन अलग रुख देखावत बावे.
  • पंजाब के मुख्यमंत्री प्रकाश सिंह बादल कहले बाड़न कि ऊ उपराष्ट्रपति के चुनाव ना लड़ीहें आ भाजपा का साथे मिल के फैसला लीहें.
  • झारखंड में काल्हु होखे जा रहल राज्यसभा चुनाव में भाजपा के प्रत्याशी एसएस अहलूवालिया मैदान में अड़ल बाड़े जबकि झामुमो अबहियो जिदियाइल बा कि भाजपा उनुका के हटावे.
  • काल्हु अन्ना हजारे कहलें कि लोकसभा चुनाव के घोषणा होते ऊ बड़हन पैमाना पर जन आंदोलन शुरू करीहें. अबहीं ऊ महाराष्ट्र में लोकायुक्त विधेयक खातिर अपना अभियान पर निकलल बाड़े.
  • बाबा रामदेव के कहना बा कि देश से बाहर गइल करिया धन वापिस लवटि आवे त हर हिन्दुस्तानी करोड़पति बन जाई.
  • सु्प्रीम कोर्ट व्यवस्था दिहलसि कि कवनो सैनिक अधिकारी पर केन्द्र सरकार के अनुमति बिना मुकदमा ना चलावल जा सके.
  • असम के नौका दुर्घटना में मरल लोग खातिर प्रधानमंत्री कोष से दू दू लाख आ राज्य सरकार का तरफ से डेढ़ डेढ़ लाख रुपिया के सहायता के एलान भइल बा.
  • इसरो रेल विभाग के अनुमति दे दिहलसि कि ऊ रेलगाड़ियन में बिना डाटा कार्ड के इंटरनेट सुविधा दे सकेला. ई सुविधा उपग्रह के माध्यम से दिहल जाई. रेलगाड़ी के इंजन पर एंटेना लगावल जाई आ वाई फाई से रेल डिब्बन के भीतर सवारियन के इंटरनेट सुविधा मिल पाई.
  • नुपूर तलवार के जमानत अर्जी आजु अदालत खारिज कर दिहलसि. अब उनुका सुप्रीम कोर्ट जाए के पड़ी जमानत खातिर.

बिजनेस

  • वित्त मंत्री प्रणब मुखर्जी के अध्यक्षता वाला मंत्रिसमूह टू जी स्पैक्ट्रम के फेर से नीलामी करेवाला के चुने के प्रक्रिया शुरू कर दिहलसि. एह नियुक्ति खातिर निविदा मंगावल जाई.

खेल

  • काल्हु भइल आई पी एल बीसबीसा मैच में डेल्ही डेयर डेविल्स राजस्थान रॉयल्स के छह विकेट से हरा दिहलसि. दोसरका मैच में डेक्कन चार्जर्स पुणे वॉरियर्स इंडिया के तेरह रन से हरवलसि.

टटका खबर, मंगल, 1 मई 2012

शिक्षा रोजगार

  • आईटी बीएचयू के आई आई टी के दर्जा मिल गइल. महामना मदनमोहन मालवीय के १५०वीं जयंती का अवसर पर एकरा के उपलब्धि बतवले बीएचयू के कुलपति डा॰ कर्ण सिंह. जबकि विहिप नेता अशोक सिंहल कहलें कि ई फैसला हिन्दू विश्वविद्यालय के गरिमा कम करे खातिर लिहल गइल बा आ देर सबेर एह फैसला से बीएचयू के तूड़ दिहल जाई. अब इंजीनियरिंग फैकल्टी विश्वविद्यालय कुलपति का अधिकार क्षेत्र से बाहर हो जाई. एह नयका आईआईटी के आईआईटी बीएचयू का नाम से जानल जाई.

उत्तर प्रदेश

  • हार का बाद हार के कारण पता लगावे राहुल गाँधी सोमार का दिने अमेठी अइलन जहाँ कार्यकर्ता साफ कहलें कि जुबानी जमा खर्च से कुछ नइखे होखे वाला. राहुल से कहल लोग कि आपहू कहले रही कि तीन महीना में भेंट करब आ भुला गइनी. राहुल गाँधी फेर तीन महीना के समय मँगलन आ कहलन कि एह बीच पार्टी के व्यवस्था सुधारल जाई.
  • बलिया में बाली ढुलाई में होखत घपलेबाजी का मामिला में तीन गो रेंजर आ बारह गो कर्मचारी जाँच का शिकंजा में अइलें. रोजाना कई लाख के राजस्व के लूटखसोट भइल बा भरौली चेकपोस्ट पर.
  • बलिया पुलिस लाइन में सिपाहियने के बेसी सूद पर करजा देबे वाला सूदखोर के सोमार का दिने गिरफ्तार कर लिहल गइल. एकर शिकायत एगो सिपाही एसपी से कइलसि त जाँच में पता चलल कि महँग सूद पर रुपिया देबे वाला ई सूदखोर कैशियर से मिलीभगत कर के कैंटीन कटिंग का नाम पर सीधे वेतन से पइसा काट लेत रहुवे. एह मामिला में कैशियर के निलम्बित कर दिहल गइल बा.
  • चंदौसी के सपा विधायिका लक्ष्मी गौतम का खिलाफ हत्या के प्रयास के मुकदमा दर्ज भइल बा. एह मामिला मे उनुका परिवारो के कुछ लोग के नामजद कइल गइल बा.
  • मायावती कहली कि संसद के मौजूदा सत्र में एगो संविधान संशोधन विधेयक ले आवल जाव जवना से एससी एसटी के पदोन्नतिओ में आरक्षण दिहल जा सके.

बिहार

  • बिहार में केन्द्रीय विश्वविद्यालय खोले का विवाद में नया फच्चर फँसावत राजद के रघुवंश प्रसाद सिंह सोमार का दिने लोकसभा में कहलन कि सबले बढ़िया रही कि गया आ मोतिहारी दुनु जगहा केन्द्रीय विश्वविद्यालय खोल दिहल जाव आ पटना विश्वविद्यालयो के केन्द्रीय विश्वविद्यालय बना दिहल जाव. अबही के स्थिति ई बा कि केन्द्र चाहत बिया कि गया में खोलल जाव जबकि राज्य सरकार मोतिहारी खातिर खूंटा गड़ले बिया.

देश

  • भाजपा के मंजूर नइखे राष्ट्रपति पद खातिर कांग्रेस के कवनो उमीदवार चाहे ऊ हामिद अंसारी होखसु चाहे प्रणव मुखर्जी.ई बात सोमार का दिने भाजपा नेत्री सुषमा स्वराज कहली. कहली कि कांग्रेस आपन उम्मीदवार के एलान कर दी ओकरा बादे भाजपा आपन पत्ता खोली. भाजपा चाहत बिया कि गैर कांग्रेसी गैर भाजपाई खेमा से कवनो नाम सामने आवे.
  • आरुषि हत्याकाण्ड में आरुषि के महतारी डा॰ नुपूर तलवार के काल्हु अदालत में समर्पण का बाद गिरफ्तार कर लिहल गइल आ उनुकर जमानत याचिका खारिज कर के जेल भेज दिहल गइल.
  • झारखंड में भाजपा के सहयोगी पार्टी झामुमो एह बात पर नाराज बावे कि राज्यसभा में ओकरा उम्मीदवार के समर्थन ना दे के भाजपा आपन उम्मीदवार उतार दिहलसि जबकि केहू का लगे ओतना वोट नइखे कि ऊ आपन उम्मीदवार जिता ले जाव. झामुमो नेता आ राज्य के उपमुख्यमंत्री शिबू सोरेन कहलन कि भाजपा हमेशा उनुका पार्टी के बेइज्जत करत आइल बिया आ अब एकरा के बर्दाश्त ना कइल जाई.
  • मुंबई मे सपा नेता आ विधायक अबू आजमी के बारह साल पहिले दिहल एगो दंगा भड़कावे वाला भाषण खातिर दू साल के जेल आ एगारह हजार रुपिया के जुर्माना के सहा सुनावल गइल बा.
  • उत्तरी दिल्ली नगर निगम के मेयर पद पर भाजपा के मीरा अग्रवाल के निर्विरोध चुन लिहल गइल आ भाजपे के आजाद सिंह के डिप्टी मेयर चुनल गइल.
  • एक लाख रुपिया घूस लेबे का आरोप में चार साल के जेल के सजा भुगतत बंगारू लक्ष्मण भाजपा के राष्ट्रीय कार्यकारिणी से इस्तीफा भेज के पार्टी के राहत दिहलन.
  • ओडिशा के विधायक झिन्न हिक्का के इस्तीफा के विरोध करत मुख्यमंत्री नवीन पटनायक कहलन कि दबाव में कवनो विधायक के इस्तीफा ना देबे के चाहीं.
  • 30, 07:16 pm
    भुवनेश्वर [जागरण संवाददाता]। ओड़िशा में 34 दिन बाद माओवदियों की गिरफ्त से छूटे विधायक झिन्न हिक्का के मामले में मुख्यमंत्री नवीन पटनायक ने कहा है कि को

  • उत्तराखंड के राज्यपाल पद पर बहाल अजीज कुरैशी अपना बहाली के सोनिया गाँधी के आशीर्वाद बतवलन.
  • ब्रिटेन के महारानी एलिजाबेथ के हीरक जयंती का मौका पर उनुकर प्रतिनिधि का तौर पर राजकुमार एंड्र्यू सात दिन के भारत दौरा पर सोमार का दिने अइलें. एह दौरा में ऊ दिल्ली, कोलकाता, मुंबई, चेन्नई, बेंगलूर आ कोहिमा जइहें. कोहिमा मे ऊ दुसरका विश्वयुद्ध में मारल गइल सैनिकन के श्रद्धांजलि दीहें.
  • असम में ब्रहमपुत्र नदी में सोमार का दिने एगो नाव पलटला से सत्तर से अधिका लोग डूब गइल. दुर्घटणा धुबरी जिला के बुरहाबुरही में भइल.
  • भारत आ जापान नागरिक परमाणु सहयोग पर बातचीत करे आ एगो समझौता पर दस्तखत करे खातिर राजी हो गइले.
  • प्रवर्तन निदेशालय मुंबई के आदर्श हाउसिंग सोसायटी घोटाला में महाराष्ट्र के मुख्यमंत्री रहल अशोक चव्हाण आ तेरह गो दोसरो लोग पर आरोप लगवलसि.
  • एह साल पहली सित्मबर से हर मोबाइल सेट पर सूचना लिखल रहे चाहीं कि ओह मोबाइल के रेडियो विकिरण कतना बा आ ओकर दाम कतना बा.
  • मध्यप्रदेश सरकार निलम्बित आईएएस टीनू जोशी आ अरविंद जोशी के बर्खास्त करे के सिफारिश केन्द्र के भेजलसि. एह दुनु का लगे से बेहिसाब दौलत मिलल बा जवन कि एह लोग के भठियरपन के कमाई ह.

दुनिया

  • पाकिस्तान के प्रधानमंत्री गिलानी कहलन कि कवनो अइसन कानून नइखे जवना तहत न्यायपालिका उनुका के डिसक्वालिफाई कर सके.
  • नाईजीरिया में आत्मघाती बम हमला में एगारह लोग के जान चल गइल. हालांकि हमला जवना पुलिस अधिकारी पर भइल रहे ऊ साफ बाँच गइल.

बिजनेस

  • भारत सेशल्स के साढ़े सात करोड़ डॉलर के वित्तीय सहायता देबे के घोषणा कइलसि.
  • कपास उत्पादन में वृद्धि देखत एकरा निर्यात पर लगावल रोक हटा लिहल गइल.
  • बॉम्बे स्टाक एक्सचेंज में सोमारो का दिन तेजी रहल आ सूचकांक १३१ अंक बढके बंद भइल. रुपिया में १९ पइसा के कमजोरी आइल आ सोना अपना महँगी के नया रिकार्ड बनवलसि. काल्हु दिल्ली में सोना २९ हजार ५९० रूपए प्रति दस ग्राम पर बिकाईल.

खेल

  • आईपीएल बीसबीसा में कोलकाता नाइट राइडर्स चेन्नई सुपर किंग्स के हरा दिहलसि.
  • भारत के वेटलिफ्टर लंदन ओलम्पिक के महिला आ पुरूष दुनु वर्ग में एक एक गो जगहा खातिर क्वालिफाई कइलन. नौकायनो में भारत के स्वर्ण सिंह विर्क, मंजीत सिंह आ संदीप कुमार क्वालीफाई कर गइलन.

मनोरंजन

  • पहिला बेर कवनो टीवी शो दूरदर्शन आ निजी चैनल पर एक साथ देखावल जाई. ई सीरियल ह आमिर खान के “सत्यमेव जयते” जवन छह मई से हर अतवार दिन में एगारह बजे से दूरदर्शन आ स्टार प्लस पर देखावल जाई.
  • बालीवुड अभिनेत्री अचला सचदेव के लमहर बीमारी का बाद अतवार का दिने निधन हो गइल. अचला सचदेव पर फिल्मावल “वक्त” फिल्म के गाना ए मेरी जोहरा जबीं आजुवो ले लोग के याद बा.