अंजन के रोड शो में अंजना के जलवा

भोजपुरी सिनेमा के गरम लिट्टी अंजना सिंह भोजपुरी के नयका मनोरंजन चैनल “अंजन टीवी” खातिर अपना शहर लखनऊ में मीडिया से रूबरू हो के चैनल का बारे में जानकारी त दिहबे कइली शहर के सड़कन पर अपान काफिला का संगे निकल के रोडो शो कइली.

बतावे जोग बा कि पिछला दिने एह भोजपुरी मनोरंजन चैनल “अंजन टीवी” के भव्य लॉन्चिंग मुंबई में कइल गइल रहे. अंजन टीवी के जन जन तक चहुँपावे खातिर दिल्ली से एगो रोड शो के शुरुआत कइल गइल बा जवन चालीस दिन का अपना सफर में पिछला अतवार के लखनऊ चहुँपल रहे. एह रोड शो के अगुवाई करत रहली लखनऊ के मूल निवासी अंजना सिंह. लखनऊ के लोग अपने शहर के अभिनेत्री के जोरदार स्वागत कइल.

एह रोड शो खातिर मीडिया से रुबरू अंजना सिंह कहली कि जवना शहर में पलइली पसइली ओही शहर में एगो सेलिब्रेटी का रूप में आइल कवनो सपना पूरा भइल जस लागत बा.


(उदय भगत के रपट)

अंजना सिंह के डबल धमाका

सिनेमा भोजपुरी के हॉट केक अंजना सिंह खाति जश्ने आजादी के ६६ वां सालगिरह दू गो ख़ुशी लेके आइल. पंद्रह अगस्त के अंजना के दू गो फिलिम रिलीज भइली सँ आ दुनु सफलता के राहे बढ़ल जात बाड़ी सँ.

एह फिलिमन में “एक बिहारी सौ पे भारी” बिहार में रिलीज़ भइल जवना में अंजना सिहं पहिला हाली बड़का अभिनेता दिनेश लाल यादव निरहुआ संगे परदा पर नजर आइल बाड़ी. एहमें अक्षरा सिंह, अवधेश मिश्रा, आ संजयो पाण्डेय वगैरह के बड़हन भूमिका बा. जगदीश शर्मा निर्देशित एह फिलिम के बिहार में निकहा सफलता मिलल बा.

एही दिन मुंबई में रिलीज़ भइल अंजना सिंह के फिल्म “दिल ले गइल ओढनिया वाली” जवना में उनुका सोझा बाड़ें खेसारी लाल यादव. बाकी खास कलाकारन में शशिमोहन सिंह, प्रिया पाण्डे, रजनीश झांजी, जय सिंह आ बालेश्वर सिंह वगैरह शामिल बाड़ें. ई फिलिम बिहार में पहिलहीं दर्शकन के दिल जीत चुकल बिया आ अब मुंबईओ में एकरा जबरदस्त ओपनिंग मिलल बा. अरविन्द चौबे निर्देशित आ फिल्म वितरण कंपनी बाला जी सिने विजन निर्मित एह फिल्म के देखे ला भारी उमड़ल. फिल्म प्रोमोट करे आइल अंजना सिंह के अपना सोझा देख के दर्शक उनकर जोरदार स्वागत कइलें.

अपना एह डबल सफलता से उत्साहित अंजना सिंह एकरा के दर्शकन के प्यार बतवले बाड़ी आ कहली कि – दर्शकन के जवन प्यार उनुका मिलल बा ऊ एगो सपना जइसन बा. ख़ुशी जतावत कहली कि दर्शक आ फिल्म इंडस्ट्री उनुका के सकार लिहलसि एहला ऊ हमेशा सभकर एहसानमंद रहीहें.


(उदय भगत आ अपना न्यूज के रपट से)

पवन सिंह-अंजना सिंह क जोड़ी ‘लावारिस’ में

पवन सिंह आ अंजना सिंह क सुपरहिट जोड़ी ‘लावारिस’ में जल्दिए देखे के मिली. आरोही फिल्म्स के प्रस्तुति आ निर्माता अजय सिन्हा अउर नासिर जमाल के एह फिल्म में पवन आ अंजना के लव एंगल बा. एह दुनु पर देव पाण्डे का निर्देशन में एक से बढ़के एक जबरदस्त गाना आ मदमस्त दृश्य फिल्मावल गइल बा.

पवन अंजना के जोड़ी एहले पहिले ‘ट्रक ड्राईवर’ जइसन सुपरहिट फिलिम दे चुकल बा. आ उमेद जतावल जात बा कि एहु फिलिम के ओइसने सफलता मिली.


(प्रशांत निशांत के रपट)

अंजना का जनम दिन पर लचकलें भोजपुरिया सितारा

सिनेमा भोजपुरी के गरम लिट्टी बनल अभिनेत्री अंजना सिंह के जनम दिन पर मुंबई के एगो पब में भोजपुरिया सितारन के जमावड़ा लागल आ सबही भोजपुरी गानन पर जम के ठुमका लगवलें.

मुंबई के क्लब एस्केप में मंगल का दिने अंजना सिंह धूम धाम से आपन जनमदिन मनवली. एह मौका पर उनुका के बधाई देब चहुँपलें रवि किशन, दिनेश लाल यादव निरहुआ, पंकज केसरी, सुदीप पाण्डे, खेसारी लाल यादव, अवधेश मिश्रा, संजय पाण्डे, सूर्या, राजेश राज, पाखी हेगड़े, पायल सेठ, फ़रीन शेख, डोल्फिन, जगदीश शर्मा, इक़बाल बक्श, सुशील उपाध्याय, मंजुल ठाकुर, रवि शर्मा, अनिल कुशवाहा वगैरह.

एह जनमदिन पार्टी में चार चाँद लागल अभिनेता अभिनेत्रियन के डांस से. अंजना सिंह ख़ुशी के इजहार करत कहली कि जनमदिन के पार्टी त बहाना भर रहुवे. दरअसल ऊ भोजपुरी फिल्म इंडसट्रीज़ से जुड़ल सगरी लोग के शुक्रिया अदा कइल चाहत रहली काहे कि थोड़ही दिन में उनुका सभकर साथ मिल गइल. अपना डेढ़े साल का कैरियर में रवि किशन संगे शुरुआत करे वाली अंजना के सगरी भोजपुरी सितारन संगे दू गो भा बेसी फिलिम करे के मौका मिलल. भोजपुरी के नयका सुपर स्टार खेसारी लाल यादव संगे त ऊ चउथा फिलिम करत बाड़ी “दूध का क़र्ज़” जवना के शूटिंग चलत बा.


(उदय भगत के रपट)

खेसारीलाल के दिल उड़ा ले गइली ओढनिया वाली अंजना

सिनेमा भोजपुरी के हॉट केक अंजना सिंह भोजपुरी के नयका सुपरस्टार खेसारीलाल यादव के दिल चोरा लिहले बाड़ी. एह दुनु जने के अभिनय से सजल फिल्म “दिल ले गइल ओढनिया वाली” के हकीकत इहे ह. बालाजी सिनेविजन प्रा. लि. के बैनर तले बनत प्रसिद्ध वितरक पप्पू भाई, राजेश सिंह आ संजय कनूगा निर्मित एह फिल्म के निर्देशक हउवें अरबिंद चौबे.

अंजना सिंह के कहना बा कि खेसारी लाल क साथ उनकर केमेस्ट्री ओँन स्क्रीन आ ऑफ स्क्रीन दुनु बढ़िया बा. एह जोड़ी के पहिला फिलिम रहल आलोक कुमार क “देवरा पर मनवा डोले”. फिलहाल राजपिपला में खेसारीए लाल का साथे “लहू के दो रंग” का शूटिंग में व्यस्त अंजना सिंह अपना एह फिल्म के सफलता खातिर आश्वस्त बाड़ी. फिल्म में शशि मोहन सिंह, प्रिया कपूर, मनोज टाईगर, आनंद मोहन, प्रिया पाण्डेय, रत्नेश वरनवाल, आशा शर्मा, जसवंत कुमार, बालेश्वर सिंह, जय सिंह आ रजनीश झांजी के प्रमुख भूमिका बा.


(उदय भगत के रपट)

जब मल्लाहन का बस्ती चहुँपली भोजपुरिया हॉट केक अंजना सिंह

भोजपुरी सिनेमा के हॉट केक अंजना सिंह एह घरी अक्सर मल्लाहन का बस्ती में लउकेली आ उहो अपना भाई रविंद्र संकरन संगे. सोचे लगनी नू कि कवना फिलिम के बात होखत बा?

दरअसल अंजना सिंह मशहूर निर्माता आलोक कुमार आ निर्देशक प्रेमांशु सिंह क फिल्म “देवरा पे मनवा डोले” में एगो मजगर भूमिका में बाड़ी. १० मई के रिलीज़ होखे जात एह फिलिम में उनुका साथे खेसारी लाल आ स्मृति सिन्हा बाड़ी. अंजना सिंह के मुताबिक “देवरा पर मनवा डोले” में उनुकर भूमिका एगो अइसन मल्लाहिन के बा जे याददाश्त खो चुकल खेसारी लाल से दिल लगा लेत बाड़ी.

फिल्म में कई गो मधुर गाना आ रोमांटिक सीन अंजना सिंह अउर खेसारी लाल पर फिल्मावल गइल बा. अंजना के भाई बनल बाड़े रविंद्र संकरन जे बिहार में आई पी एस बाड़ें. अभिनय से लगाव का चलते ऊ दक्खिन भारतीय होखला क बावजूद भोजपुरी फिलिम में अभिनय कइले बाड़े.

अंजना सिंह के अनेके फिलिम प्रदर्शन खातिर तइयार बाड़ी सँ जवनन में “दिल ले गइल ओढनिया वाली”, “एक बिहारी सौ पे भारी”, “वर्दी वाला गुंडा”, “लावारिस” वगैरह शामिल बा. एकरा अलावे उनुकर लगभग आधा दर्जन फिल्म पोस्ट प्रोडक्शन स्टेज में बा. मात्र एक साल पहिले भोजपुरी फिल्म में डेग धरे वाली अंजना आज दर्शक, निर्माता, निर्देशक अउर फिल्म वितरक सबही के पसंद बन गइल बाड़ी. .


(उदय भगत के रपट)

गोला बारूद के प्रोमोशनल सोंग में अंजना सिंह

सिनेमा भोजपुरी के गरम लिट्टी बन गइल अंजना सिंह, मशहूर अभिनेता बृजेश त्रिपाठी, सिरमौर खलनायक अवधेश मिश्रा आ कोमेडी किंग मनोज टाइगर पर पिछला दिने मुंबई के रसियन विला में ग्रीन चिल्ली फिल्म्स एंड मीडिया प्राइवेट लिमिटेड के फिल्म “गोला बारूद” ले प्रोमोशन सोंग के शूटिंग भइल. पीछा करके हमार लोगवा चुम्मा माँगऽ ता .. बोल वाला गाना पर भोजपुरी के एह मशहूर सितारन पर डांस मास्टर रिक्की गुप्ता दू दर्जन डांसरन का साथे फिल्मवले. एह गाना के बड़हन कैनवास पर उतारे खातिर भोजपुरी के नंबर वन निर्देशक राज कुमार आर.पाण्डेय आ कैमरामेन से निर्देशक बनल फ़िरोज़ खान के सहयोग लिहल गइल.

प्रसिद्ध वितरक प्रदीप सिंह आ पी.जे फिल्म्स एंड म्यूजिक के हरीश जायसवाल बतवले कि अंजना सिंह पर प्रोमो फिल्मावे के मकसद एह फिल्म के स्तर उठावे के रहल काहें कि अंजना सिंह आजु के व्यस्ततम अदाकारा हई. एकरा अलावे भोजपुरिया दिग्गजन के मौजूदगी से गाना के शोभा अउरी बढ़ गइल बा. अंजना सिंह कहली कि एह प्रोमो सांग के प्रस्ताव मिलते सकार लिहले रही काहे कि अबही भोजपुरी में प्रोमोशनल सोंग के चलन शुरू नइखे भइल.


(उदय भगत के रपट)

अंजना सिंह कइली एगारह महीना में एगारह फिलिम

मात्र एगारहे महीना में सिनेमा भोजपुरी जगत में आपन मुकम्मल जगहा पा लेबे में कामयाब रहल आ सिनेमा भोजपुरी के हॉटकेक बन गइल अंजना सिहं का नामे एगो रिकार्ड बने वाला बा.

लखनऊ के ई शहजादी एगारहे महीना का छोटहन अवधि में एगारह गो फिलिम कर के अपना अभिनय के जादू त चलइबे कइले बाड़ी, साथ ही सिनेमा भोजपुरी के सगरी बड़का सितारन का साथे काम करे के मौका ले चुकल बाड़ी. शूरूआत रविकिशन का साथे फौलाद से कइली, ओकरा बाद पवन सिंह का साथे ट्रक ड्राइवर आ लावारिस, रविकिशन आ मनोज पाण्डेय का साथे कईसन पियवा के चरित्तर बा, निरहुआ का साथे एक बिहारी सौ पे भारी आ वर्दी वाला गुंडा, खेसारी लाल का साथे दिल ले गइल ओढनिया वाली आ देवरा पे मनवा डोले, विराज भट्ट का साथे कर्जा माटी के, लाल दुपट्टा वाली आ एगो अउरी फिलिम जवना के नाम नइखे रखाइल.

एह में से फौलाद, ट्रक ड्राइवर आ कईसन पियवा के चरित्तर बा रिलीज़ होके बॉक्स ऑफिस पर धूम मचा चुकल बाड़ी सँ, लावारिस, एक बिहारी सौ पे भारी, दिल ले गिल ओढनिया वाली, आ देवरा पे मनवा डोले के शूटिंग पूरा हो गइळ बा. वर्दी वाला गुंडा के शूटिंग चालू बा.

अंजना सिंह के एह सफलता का पीछे उनुकर लगन आ डाउन टु अर्थ वाली इमेज बतावल जात बा.


(उदय भगत के रपट से)

भोजपुरिया माटी के करजा चुकइहे अंजना

भोजपुरी फिल्म जगत में हॉट केक बन गइल मशहूर अभिनेत्री अंजना सिंह एह महिना के आखिरी हफ्ता में भोजपुरी फिल्म जगत में अपना अइला के पहिला सालगिरह मनावे जात बाड़ी. एह एक साल में ऊ अपना अदाकारी से दर्शकन के दिल त जीतिये लिहले बाड़ी, निर्माता – निर्देशकन आ साथी कलाकारनो के अपना ओर आकर्षित कइले बाड़ी. इहे वजह बा कि अंजना सिंह एक साल का भितरे भोजपुरी सिनेमा के सगरी बड़का कलाकारन का साथे काम करे के मौका पा चुकल बाड़ी.

रवि किशन के साथ फौलाद से बड़का परदा पर डेग धरे वाली अंजना पवन सिंह का साथे ट्रक ड्राइवर, लावारिस, निरहुआ का साथे एक बिहारी सौ पर भारी आ वर्दी वाला गुंडा, खेसारी लाल का साथे दिल ले गइल ओढनिया वाली अउर देवरा पर मनवा डोले, रवि किशन आ मनोज पाण्डेय का साथे कईसन पियवा के चरित्तर बा वगैरह फिलिमन में काम कइले बाड़ी. एह आठ फिलिमन के बाद अब अंजना निर्देशक जगदीश शर्मा के फिलिम “कर्जा माटी के” साइन कइले बाड़ी. एह फिलिम में उनुका साथे बाड़न विराज भट्ट.

बकौल अंजना – भोजपुरिया माटी के उनुका पर बड़हन करजा बा जवना के उतार पावल एह जनम में त संभव नइखे बाकिर फिलिम के नामे से सही ई करजा उतारे के प्रयास जरूर करीहे.


(उदय भगत के रपट से)

होली पर रिलीज़ होई कईसन पियवा के चरित्तर बा

सिनेमा भोजपुरी के एह साल के सबले चर्चित फिलिम “कईसन पियवा के चरित्तर बा” के होली का शुभ मौका पर पूरा भारत में एके साथ रिलीज कइल जाई. बिहार में एकरा के हिन्दी फिलिमन के जानल मानल वितरक माँ सोना फिल्म्स रिलीज़ करत बिया त मुंबई में भोजपुरी फिलिमन के नंबर वन वितरक प्रदीप भईया.

भोजपुरी सिने उद्योग में चर्चा का विषय बन रहल एह फिल्म पर भोजपुरी के दिग्गजन के निगाहें लागल बा. काहे कि विविधता भरल एह फिल्म में जहाँ भोजपुरिया सुपर स्टार रवि किशन के दर्जनों रूप नज़र आई ओहिजे मनोज पाण्डेय के एक्शन लोग के आकर्षित करी. भोजपुरिया दर्शकन के रानी अदाकारा रानी चटर्जी रवि किशन से नैन मटक्का करीहें त केक अंजना सिंह मनोज पांडे का साथे. एह लोग का अलावे फिलिम में शक्ति सिंह, संजय पाण्डेय, अयाज़ खान अउर हितेन पाण्डेय दुनु नायकन के हेकड़ी ठंढा करे का जुगत में लागल रहीहें.

माँ विन्ध्वासिनी विजन प्रस्तुत निर्मात्री नेहा तिवारी के एह फिल्म के निर्देशक हउवें संतोष मिश्रा जिनका खाते भोजपुरी के सबले बेसी हिट फिलिमन के लिखनाई जुड़ल बा. “कईसन पियवा के चरित्तर बा” के एगो अउरी मजबूत पक्ष बावे एकर संगीत जवना के रचले बाड़न मधुकर आनंद. एक्शन, इमोशन, रोमांस आ रोमाच से सजल एह फिल्म का बारे में रवि किशन के कहना बा कि सिनेमा भोजपुरी के तिसरका दौर में सफल भइल फिलिमन का अगिला पाँत में ई फिलिम रहे वाली बिया.

बहरहाल होली के रंग का संग लोग बेसब्री से जानल चाही कि कईसन पियवा के चरित्तर बा.


(उदय भगत के रपट से)