अनारा तांडव करे चलली

सिनेमा भोजपुरी के चर्चित अदाकारा अनारा गुप्ता अपना नया लुक आ अंदाज़ में एक बेर फेर से भोजपुरिया परदा पर तांडव करे आइल बाड़ी. एकर कुछ महीना ले परदा से दूर रहि के अपना परिवार संगे समय बितवला का बाद अनारा फिल्म ‘अंतिम तांडव’ के शूटिंग बिहार के झंझारपुर में शुरू कर दिहले बाड़ी. झंझारपुर जात घरी पटना में पत्रकारन से कहली कि “अंतिम तांडव” में उनुकर रोल एगो बिंदास आ मुहफट लड़िकी के बा. फिल्म में उनुकर साथ दिहले बाड़न शुभम तिवारी, निर्देशन करत बाड़न योगी.

एहसे पहिले अनारा गुप्ता आखिरी बेर महुआ टीवी के शो ‘नाच नचैया धूम मचैया’ में लउकल रही जहवाँ ऊ अपना नृत्य कौशल से टॉप थ्री में जगह बनवले रही आ गणेश आचार्य, सुधा चंद्रन आ कानू मुखर्जी जइसन धुरंधरन के आशीर्वादो पवले रही.

एह बीच अनारा आपन लुक एकदम बदल लिहले बाड़ी आ नया जोश का साथ बिहार के तपत गरमी में भीषण गर्मी में ‘तांडव’ करे निकलल बाड़ी. एह चरचा से भोजपुरी फिल्म जगत के गरमी बढ़ गइल बा.


(अपना न्यूज के रपट)

अनारा गुप्ता आ राजीव दिनकर के “ज्वाला’

सिनेमा भोजपुरी के जानल मानल अदाकारा अनारा गुप्ता आ चर्चित अभिनेता राजीव दिनकर अब युवा फिल्मकार जितेन्द्र कुमार गुप्ता के फिल्म “ज्वाला” में नजर अइहें. एह एक्शन भरल फिल्म के निर्देशक हउवें मंजल निर्देशक इकबाल बख़्श जिनकर फिल्म “हम हई मुन्ना भईया’ सफलता के एगो नया रिकार्ड बनवले रहुवे.

“ज्वाला’ के दिलछुआ गीत लिखले बाड़न संतोष पुरी आ संगीत हवे आबिद जमाल के. कहानी लेखक रमेश मिश्रा, नृत्य निर्देशक दिलीप मिस्त्री, एक्शन मास्टर शकील शेख आ कला निर्देशक हउवें रवि कोडके. अनारा गुप्ता के कहना बा कि “ज्वाला” उनुका ला एगो चैलेंज बावे. निर्माता जितेन्द्र कुमार गुप्ता इकबाल बख़्श के निर्देशित फिल्म “हम हई मुन्ना भईया’ देखले रहुवन आ एह कमाल के निर्देशक के एह फिल्म के जिम्मेदारी दिहलन. राजीव दिनकर के कहना बा कि एह फिल्म से इकबाल बख्श के निर्देशन में काम करे के उनुकर साध पूरा हो गइल.

एह फिल्म का कलाकारन में अनारा गुप्ता, राजीव दिनकर, बृजेश त्रिपाठी, गोपाल राय, अयाज खान, राहुल दायमा, शिवम, मनोज टाइगर, सिकन्दर खान, उस्मान गनी अउर अवधेश मिश्रा के मुख्य भूमिका बा.

एकर सगरी गाना रिकार्ड करावल जा चुकल बा आ फिल्म अब जल्दिये सेट पर जाई.


(शशिकांत सिंह रंजन सिन्हा के रपट से.)

अनारा गुप्ता मोहब्बत में कइली एगो प्रमोशनल आयटम नम्बर

भोजपुरी सिनेमा के इतिहास में पहली बेर कवनो फिल्म के प्रमोट करे ला एगो प्रमोशनल सांग फिल्मावल गइल भोजपुरी फिल्म कजरा मोहब्बत वाला खातिर. आ ई आयटम फिल्मावल गइल हॉट एण्ड हीट गर्ल अनारा गुप्ता का ऊपर. निर्माता हरीश जायसवाल, प्रमोद शास्त्री आ धर्मेन्द्र सिंह के एह फिल्म के श्रीधर शेट्टी कइले बाड़न.

भोजपुरी सुपर स्टार विनय आनंद, प्रतिभा पांडे, धीरज पंडित आ लवी रोहतगी के मुख्य भूमिका वाली एह फिल्म के प्रमोशनल सांग का बारे में निर्देशक श्रीधर शेट्टी के कहना रहल कि ऊ अनारा गुप्ता के बतौर नायिका लिहल चाहत रहले बाकिर डेट्स के दिक्कत रहल. से अब एह प्रोमोशनल सांग का सहारे अनारा गुप्ता के फिल्म से जोड़ल जा रहल बा. पिछला दिने एह गाना के शूटिंग खातिर भारी तामझाम वाला इंतजाम कइल गइल. अनारा गुप्ता के कहना बा कि एहसे एगो नया ट्रेंड शुरु होखी आ अब हिंदी का तर्ज पर भोजपुरीओ में प्रमोशनल आयटम नंबर नामी अभिनेत्रियन का साथे शुरु होखी.


(स्रोत – शशिकांत सिंह )

गब्बर दीदी का रोल में अनारा गुप्ता

भोजपुरी फिल्म “राम लखन” में अनारा गुप्ता ढाबा चलावे वाली बिजली के किरदार में बाड़ी. अगर खाना खइला का बाद केहू पइसा देबे से इन्कार करेला त ओकरा के खटिया से बान्ह के तबले बेल्ट से पीटेली जबले ऊ पूरा दाम ना दे देव. अनारा के एह फिल्म में शोले के बसंती वाला लुक दिहल गइल बा. एकाध सीन में उनुका के बीड़ी पियतो देखावल गइल बा. निर्माता राजकुमार दायमा आ निर्देशक इकबाल बख्श के एह फिल्म में लखन का किरदार में सुशील सिंह आ राम का किरदार में नवोदित अभिनेता सोम यादव बाड़े.


(स्रोत – शशिकान्त सिंह)

अग्निकुण्ड में अनारा के स्टंट सीन

तीन भाषा में बनत भोजपुरी, तमिल, छत्तीसगढ़ी फिल्म “अग्निकुण्ड” में चर्चित नायिका अनारा गुप्ता के जबरदस्त एक्शन सीन देखे के मिले जा रहल बा जवना खातिर अनारा आजुकाल्हु स्टट सीखे में लागल बाड़ी. एह फिल्म के निर्देशन करत बाड़े इकबाल बख्श आ नायक हउवें एक्शन स्टार सुशील सिंह. सुशील सिंह आ अनारा गुप्ता के जोड़ी एकरा पहिले “हम हईं मुन्ना भईया” में आ चुकल बा आ “रामलखन” अउर “अग्निकुण्ड” में आवे जा रहल बा. एह फिल्म में अनारा गुप्ता के जैकी स्टाइल एक्शन, तलवारबाजी आ फाईट देखे के मिलल जवना खातिर अनारा बहुते उत्साह से एक्शन सीखत बाड़ी. उनुका उमेद बा कि फिल्म तीनो भाषा में सुपर डुपर हिट रही.


(स्रोत – शशिकान्त सिंह)

अनारा गुप्ता माधुरी दीक्षित जइसन किरदार में

अभिनेत्री अनारा गुप्ता भोजपुरी फिल्म “राम लखन” में माधुरी दीक्षित जइसन भूमिका में नजर आवे वाली बाड़ी. इकबाल बख्श के निर्देशन में राज कुमार दायमा के बनावल एह फिल्म में अनारा गुप्ता के भूमिका के बसंती वाला लुक दिहल गइल बा. फिल्म “राम लखन” के लखन बानल बाड़े जानल पहिचानल अभिनेता सुशील सिंह जबकि राम का भूमिका में नवोदित अभिनेता सोम यादव बाड़े. अनारा गुप्ता फिल्म के कई सीन में बीड़ी पियत लउकिहें शायद कहल चाहत बाड़ी “जिगर में बड़ी आग है, बीड़ी जला ले पिया”. फिल्म में अनारा गुप्ता के मदमस्त डांसो बा. अपना “आल टाइम फेवरिट” अभिनेत्री माधुरी दीक्षित जइसन रोल पा के अनारा बहुते खुश बाड़ी. फिल्म के नागेश मिश्रा प्रस्तुत कर रहल बाड़न. गीत विनय बिहारी प्यारेलाल यादव कवि, आ संतोष पुरी के लिखल बा जबकि संगीत संयोजन आबिद जमाल के बा. नृत्य निर्देशक दिलीप मिस्त्री आ कैमरा मैन अरुप हाजरा हउवें.


(स्रोत – शशिकांत सिंह)

रविकिशन के बहुरुपिया किरदार

भोजपुरी सिनेमा के सुपर स्टार रविकिशन के प्रशँसक अब एकही फिल्म में रवि किशन के कई गो रुप देखे जा रहल बाड़े. भोजपुरी फिल्म “रामपुर के लक्ष्मण” में रवि किशन एगो गँवई जवान, एगो नेवी आफिसर, त एगो जेन्टल मैन, ना जाने कतना रुप में नजर आवे वाला बाड़े. आ एह फिल्म में उनकर नायिको दू तीन गो ना पूरे पाँच गो बाड़ी. अक्षरा सिंह, संगीता तिवारी, गुंजन पंत, दिव्या द्विवेदी, आ अनारा गुप्ता सबही बा एह फिल्म में. कहल जात बा कि “रामपुर के लक्ष्मण एगो सस्पेंस थ्रिलर ह. फिल्म २६ जनवरी के रिलीज होखे जा रहल बा. षह फिल्म के एनसी इन्टरप्राइजेज का बैनर में चंदन सिंह बनवले बाड़े आ निर्देशन अउर कहानी हैरी फर्नांडिज के बा.
(स्रोत – प्रशान्त-निशान्त)

गुंजन पंत आ अनारा के रामलखन


भोजपुरी सिनेमा के गरमागरम अभिनेत्री गुंजन पंत आ अनारा गुप्ता आजु काल्हु अपना नयका फिल्म “रामलखन” के शूटिंग में व्यस्त बा लोग. एह घरी के हाड़ कँपावे वाली जाड़ा में रातो में शूटिंग करा रहल ई दुनु अभिनेत्री का बीच में बढ़िया पटरी बइठ गइल बा. एह लोग के दोस्ती के आलम ई बा कि दुनु मिल के कबो कबो पूरा यूनिट के परेशान कर देला लोग आ बाद में खिलखिला के सगरी लोग के खीसो भुला देला लोग. “रामलखन” के निर्देशक इकबाल बख्श के कहना बा कि उनकर पूरा फिल्म यूनिट दिल लगा के काम में लागल बा आ काम करे में आनन्द आ रहल बा. इकबाल बख्श खास कर के फिल्म के नायक सुशील सिंह के बड़ाई करत कहलें कि सुशील सिंह कमाल के अभिनेता हउवन. गुंजन के फिल्म “मार देब गोली केहू ना बोली” पिछला साल के सबले बड़हन हिट फिल्मन में शामिल रहे आ एह साल उनकर कई गो फिल्मलाइन में लागल बाड़ी सँ.


(स्रोत – शशिकांत सिंह)

पाँच गो नायिकायन के नायक बाड़े रविकिशन

भोजपुरी सिनेमा के सदाबहार सुपरस्टार रविकिशन भोजपुरी फिल्म “रामपुर के लक्ष्मण” में पाँच गो नायिका का साथे प्यार करत नजर अइहें. फिल्म में रविकिशन एगो गवई जवान के किरदार में बाड़न जिनका के लुभावे खातिर पाँच गो खूबसूरत बला उनका पाछा पड़ल बाड़ी आ रविकिशन सभका के नचवले बाड़न. एह पाँच नायिका में अक्षरा सिंह, गुंजन पंत, संगीता तिवारी, अनारा गुप्ता आ दिव्या द्विवेदी शामिल बाड़ी. एनसी इन्टरप्राइजेज का बैनर में चन्दन सिंह के बनावल एह फिल्म के हैरी फर्नान्डीज निर्देशित कइले बाड़न. फिल्म में रविकिशन के सगरी नायिकायन का साथे मनमोहक दृश्य, गीत, आ नृत्य बा. फिल्म में एह मुख्य कलाकारन का साथे सिकन्दर खरबन्दा, ब्रजेश त्रिपाठी, अनूप अरोड़ा, के के गोस्वामी, गोपाल राय, माया यादव, रमाशंकर सिंह, संजय सिंह, अवधेश मिश्रा बाड़े. संभावना सेठ आ कोमल ढिल्लो पर जानदार आयटम गीत फिल्मावल गइल बाड़ी सँ. गीत प्यारेलाल यादव, श्याम देहाती, राकेश सिंह, आ सच्चिदानन्द कवच के बा आ संगीत बा गुणवन्त सेन के. डायलाग मनोज सिंह के लिखल बा त कैमरा संचालन प्रमोद पाण्डेय के, नृत्य पप्पू खन्ना, रामदेवन, आ रिक्की गुप्ता के निर्देशन में बा. निर्माता चन्दन सिंह झारखण्ड के हजारीबाग के हउवें आ “रामपुर के लक्ष्मण” से पहिले सुपर हिट फिल्म “राम बलराम” बना चुकल बाड़े. “रामपुर के लक्ष्मण” जनवरी महीना में रिलीज होखे वाला बा.
(स्रोत : प्रशान्त-निशान्त)

भोजपुरिया दर्शकन के दिल के धड़कन अनारा गुप्ता

मिस जम्मू रह चुकल अनारा गुप्ता आज भोजपुरी दर्शकन के दिल के धड़कन बन गइल बाड़ी. कबो सोचलहू ना रहली कि उनका भोजपुरी सिनेमा में ऊ जगहा मिल जाई जहाँ चहुँपे खातिर बड़का बड़का नायिका तरसेली. अनारा गुप्ता भोजपुरी सुपर स्टार रविकिशन, दिनेश लाल यादव, पंकज केसरी, आ सुशीलो सिंह के नायिका बन के ऊ यादगार फिल्म दे चुकल बाड़ी.

आजुकाल्हु अनारा इकबाल बख्श के भोजपुरी फिल्म हम हईं मुन्ना भईया ले के फेर चरचा में बाड़ी. जेही फिल्म के ट्रायल देखल सभे के एके कहना बा कि सुशील सिंह के एक्शन आ अनारा गुप्ता के सेक्सी लुक दुनु एह फिल्म में देखे लायक बा. अनारा गुप्ता इकबाल बख्श के जमके तारीफ करतारी आ कहली कि इकबाल जी से ढेरे कुछ सीखे के मिलल.

अनारा गुप्ता के केहू गॉड फादर नइखे. तबो अपना बलबूते भोजपुरी सिनेमा में छा जायेवाली अनारा आज हर कैंप के पसन्द बाड़ी. अनारा गुप्ता के आवे वाली फिल्मन के नाम ह हमार ललकार, बतासा चाचा, तेजाब, दिल तोहरे प्यार में पागल हो गइल, आज के विधायक.

हम हईं मुन्ना भईया के निर्माता संजय निषाद आ गौतम निषाद हउवे.


(स्रोत : )