आलोक कुमार-निरहुआ के बहुते सफल जोड़ी फेरू साथ-साथ

सिनेमा भोजपुरी के सबले सफल निर्माता आलोक कुमार आ सबले सफल स्टार दिनेशलाल यादव ‘निरहुआ’ क सुपरहिट जोड़ी एक बेर फेरू धमाल मचावे ला तइयारी करत बा. आलोक कुमार निरहुआ लेके आपन नइकी फिलिम ‘दूध का कर्ज’ बनावल शुरू कइले बाड़न.

एह जोड़ी के सफल फिलिमन के सूची में ‘हो गईल बा प्यार ओढ़निया वाली से’, ‘निरहुआ चलल ससुराल’, ‘हो गइनी दिवाना तोहरे प्यार में’ शामिल बाड़ी सँ आ ‘गंगा जमुना सरस्वती’ एही महीना रिलीज होखे वाली बा. एह जोड़ी के तुलना ट्रेड पंडित आ दर्शक मनमोहन देसाई-अमिताभ बच्चन, पहलाज निहलानी-गोविन्दा, सुभाष घई-जैकी श्रॉफ, आदित्य चोपड़ा-शाहरूख खान जइसन सफल जोड़ियन से करेलें. आलोक कुमार आ निरहुआ दुनु के बारे में मानल जाला कि ई लोग भोजपुरी सिनेमा देखेवालन के नब्ज पकड़े में माहिर ह. एहीसे जब जब एह जोड़ी के कवनो फिलिम आवेला त ओह फिलिम के सफलता तय मान लिहल जाला.


(प्रशांत निशांत के रपट)

आलोक कुमार क ‘देवरा पे मनवा डोले’ धूम मचवलसि

सिनेमा भोजपुरी के सबले सफल निर्माता आलोक कुमार क नयकी फिलिम ‘देवरा पे मनवा डोले’ एह घरी पूरा बिहार में धुम मचवले बिया. अब ले बॉक्स ऑफिस पर सात गो सुपरहिट फिलिम देब वाला आलोक कुमार क एहू फिलिम के हर वर्ग के दर्शकन के प्यार मिलत बा. एहसे इहो फेर साबित भइल कि भोजपुरी में साफ-सुथर, पारिवारिक मनोरंजन वाला फिलिमो सफलता क झंडा गाड़ सकेले. एह फिल्म के खासियत बा कि एहमें दुअर्थी डायलाग आ आईटम गीत नइखे राखल गइल. माँ-बेटा, देवर-भाभी, भाई-बहिनन के प्यार देखावल गइल बा एह पारिवारिक मनोरंजन वाली फिलिम में.

बिहार के 45 गो सिनेमाघर में निकहा ओपनिंग क संगे रिलीज भइल ई फिलिम तीन हफ्ता में साठ लाख बिटोरले बिया. नयका सुपरस्टार खेसारीलाल यादव, स्मृति सिन्हा, अंजना सिंह, रानी चतुर्वेदी, अनुप अरोड़ा, माया यादव, प्रकाश जैस, सतेन्द्र सिंह आ ब्रजेश सिंह क प्रमुख भूमिका वाली एह फिलिम के देखे औरतन के भारी उमड़त बा. फिल्म के निर्देशक हउवें प्रेमांशु सिंह.

आलोक कुमार एह घरी अपना नयकी फिलिम ‘गंगा जमुना सरस्वती’ के पोस्ट प्रोडक्शन में व्यस्त बाड़ें.


(प्रशान्त निशान्त के रपट)

पूरा भइल ‘गंगा जमुना सरस्वती’ के शूटिंग

भोजपुरी सिनेमा के सबले चर्चित फिल्म ‘गंगा जमुना सरस्वती’ के शूटिंग दस दिन के आखिरी शेडयूल में मुंबई के विभिन्न लोकेशन पर पूरा कर लिहल गइल. संयोगिता फिल्म्स आ यशी फिल्म्स के प्रस्तुति आ निर्माता अभय सिन्हा के ‘गंगा जमुना सरस्वती’ में पहिला बेर भोजपुरी सिनेमा के तीन गो बड़का सुपरस्टार रवि किशन, मनोज तिवारी ‘मुदुल’ आ दिनेशलाल यादव ‘निरहुआ’ एक साथ नजर अइहें. भोजपुरी सिनेमा के सबले सफल निर्माता आलोक कुमार के एह फिल्म में मनोज के अपोजिट रिंकु घोष, रवि किशन के अपोजिट रानी चटर्जी आ निरहुआ के अपोजिट पाखी हेगडे के जोड़ी बनल बा. कथा-पटकथा लिखे आ निर्देशन करे के कमान सम्हरले बाड़न हैरी फर्नाडिस.

निर्माता आलोक कुमार कहलें कि काशी के पावन नगरी में ऊ भोजपुरी के तीनो स्तम्भ के ले के ‘गंगा जमुना सरस्वती’ बनावे क नींव रखले रहन जवन अब पूरा हो गइल. उनुका उमेद बा कि फिल्म ‘गंगा जमुना सरस्वती’ दर्शकन ला एह=गो समहर मनोरंजन वाली फिल्म होखी.

फिल्म के बाकी मुख्य कलाकारन में अनूप अरोडा, माया यादव, संतोष श्रीवास्तव, अनिल नागराथ, विजय कृष्ण चतुर्वेदी, मुश्ताक खान आ टीनू वर्मा के नाम बा. गीतकार प्यारेलाल यादव ‘कवि’, श्याम देहाती आ एस. कुमार, संगीतकार राजेश-रजनीश, छायांकन अकरम खान, एक्शन आर. पी. यादव, नृत्य-निर्देशक रामदेवन, कानू मुखर्जी आ कार्यकारी निर्माता विकास कुमार हउवें.


(प्रशांत निशांत के रपट)

आपन रगड़ा खतम करे के फैसला कइले रविकिशन आ मनोज तिवारी

सिनेमा भोजपुरी के दू गो महान कलाकार रवि किशन अउर मनोज तिवारी का बीचे अब सुलह हो गइल बा. दुनु जने आपन गिला शिकवा मेटावत भोजपुरी खातिर एकजुट हो के काम करे के फैसला कइले बाड़े. आ ई सब कुछ भइल निर्माता आलोक कुमार के फिल्म “गंगा जमना सरस्वती” के सेट पर. सभका मालूम बा कि रवि किशन आ मनोज तिवारी के आपसी रगड़ा का चलते कई बेर मीडिया के मसाला मिलत रहल बा, दुनु के बयानबाजी से आए दिन अखबारन में मसालेडार खबर छपत आइल बा.

बुध का दिने मुंबई के एसजे स्टूडियो में निर्माता आलोक कुमार आ निर्देशक हैरी फर्नांडिस के फिल्म “गंगा जमना सरस्वती” के सेट पर सरस्वती चंद ( निरहुआ) के मौजूदगी में गंगा प्रसाद ( मनोज तिवारी ) अउर जमना प्रसाद ( रवि किशन ) सीज फायर क एलान कइलन. एह सुलह समझौता का बाद रवि किशन आ मनोज तिवारी बतवले कि ओहन लोग का बीच लड़ाई ना बलुक वैचारिक मतभेद रहल जवना से भोजपुरी फिल्म इंडस्ट्रीज़ के गलत तस्वीर आम लोगो का सोझा आवत रहुवे. एहसे अब दुनु जने एक दोसरा का खिलाफ बयानबाजी भा कवनो कदम उठावे से तौबा कर लिहले बाड़,

एह दुनु सितारन का सीज फायर से भोजपुरी के अमनपसंद लोग में खुशी के माहौल बा.


(उदय भगत के रपट)


बात बहुत पुरान हो गइल जब बनारस में गंगा नदी का घाट पर आयोजित ईटीवी भोजपुरी फिल्म समारोह में ई दुनु जने मंच पर से घोषणा कइले रहले कि अब से ई लोग आपस में लड़ाई ना करी. आ ओही मौका पर निर्माता आलोक कुमार ओही मंच से एलान कइले रहलें कि ऊ मनोज तिवारी, रविकिशन आ निरहुआ के लेके गंगा जमुना सरस्वती फिलिम बनइहें. चार साल लाग गइल एह फिलिम के बने में. अब शायद जल्दिए पूरा हो जाई.

समारोह से पहिले दिन में एह लोग के विवाद नाजुक मोड़ पर चहुँप गइल रहे जब एह दुनु जने आ भोजपुरी के शुभचिन्तक लोग भोजपुरी समाज के प्रभुनाथ राय आ भोजपुरिया गुरू मनोज श्रीवास्तव का पहल पर एह दुनु जने के विवाद सलटावे में सफल भइल रहलें.

संतोष के बात बा कि तबसे एह दुनु जने का बीच के विवाद कबहियो आपन सीमा पार ना कइलसि आ बहुते खुशी के बात होखी अगर अबसे सभे आपसी रंजिश भुला के गठरिया तोर कि मोर का फेर में ना पड़ले बिना भोजपुरी खातिर काम करे के फैसला करें.
– संपादक

आलोक कुमार के ‘देवरा पे मनवा डोले’

सिनेमा भोजपुरी में लगातार सात गो सुपरहिट फिलिम दे चुकल सबले सफल निर्माता आलोक कुमार अब भोजपुरी फिल्म ‘‘देवरा पे मनवा डोले’’ लेके आवत बाड़न. पिछला साल के सबले बड़हन हिट फिल्म ‘‘साजन चले ससुराल’’ देबे वाला निर्माता आलोक कुमार के एह नयकी फिल्म में एक बेर फेरू भोजपुरिया दिल के धड़कन बन गइल खेसारीए लाल यादव नायक का भूमिका में बाड़े.

निर्देशक प्रेमांशु सिंह हउवे. फिल्म में खेसारी लाल यादव का साथे स्मृति सिन्हा, अंजना सिंह, रानी चतुर्वेदी, प्रकाश जैस, अनुप अरोड़ा, माया यादव, पूनम सिंह, विनोद मिश्रा, सतेन्द्र सिंह, संतोष श्रीवास्तव, सत्य प्रकाश, अखिल तिवारी, अनिता रस्तोगी, संजीव झा आ ब्रजेश सिंह के खास भुमिका बा. एह समहर पारिवारिक मनोरंजन देबे वाली फिल्म एगो प्रेम कहानी ह.

गीतकार विनय बिहारी, फणिन्द्र राव, कृष्णा बेदर्दी आ प्यारेलाल यादव, संगीतकार मधुकर आनंद, एक्शन आर. पी. यादव, नृत्य राम देवन, छायांकन हीरा सरोज, संपादन जितेन्द्र सिंह ‘जीतू’ आ कार्यकारी निर्माता विकास कुमार हउवें.

फिल्म मई में रिलीज कइल जाई.


(प्रशांत निशांत के रपट से)

‘साजन चले ससुराल’ पचासा पुरवलसि

भोजपुरी फिल्मोद्योग के सबले सफल निर्माता आलोक कुमार के हालिया प्रदर्शित फिल्म ‘साजन चले ससुराल’ बिहार के छः गो सिनेमाघरन में पचासा लगा दिहले बा. बिहार के सीतामढी के शंकर टॉकीज, गया के किरण टॉकिज, मोतीहारी के पायल टॉकिज, सिवान के दरबार टॉकिज, बिहारशरीफ के नाज टॉकिज, आ आरा के सपना सिनेमा हॉल में लगातार सात हफ्ते एक दिन चलके पचास दिन पूरा कर लिहलसि साजन चले ससुराल.

भोजपुरी सिनेमा के नया नया आइल सितारा खेसारी लाल यादव अभिनीत एह फिल्म के सफलता से आलोक कुमार फेर साबित कर दिहलन कि भोजपुरिया दर्शकन के नब्ज़ ऊ खूब जानेले. आलोक कुमार एहसे पहिले ‘राजा भोजपुरिया’, ‘हो गइल बा प्यार ओढनिया वाली से’, ‘निरहुआ चलल ससुराल’, ‘गवनवा ले जा राजा जी’, ‘हो गईनी दीवाना तोहरे प्यार में’, ‘भईया के साली ओढ़निया वाली’ जइसन सुपरहिट फिलिम दे चुकल बाड़े.

‘साजन चले ससुराल’ के निर्देशन प्रतिभाशाली निर्देशक प्रेमांशु सिंह कइले बाड़न कलाकारन में खेसारी लाल यादव, स्मृति सिन्हा, नेहा श्री, आकाश सहाय, किरण यादव, अनुप अरोड़ा, गिरीश शर्मा, संतोष श्रीवास्तव, सी. पी. भट्ट, विकास विरप्पन के खास भूमिका बा. फिल्म के गीतकार अशोक कुमार दीप, प्यारे लाल यादव, अउर कृष्णा बेदर्दी आ संगीतकार अशोक कुमार दीप हउवे.

फिलिम साजन चले ससुराल के सफलता खातिर आलोक कुमार के हार्दिक बधाई.


(स्रोत – प्रशांत निशांत)

नाचऽ गावऽ मजा करऽ के म्युजिकल लांचिंग

केबीसी पिक्चर्स का बैनर में बने जा रहल निर्माता शरद बागला आ उमेश यादव के फिल्म “नाचऽ गावऽ मजा करऽ” के म्यूजिकल लांचिंग पिछला दिने मुंबई के पंचम स्टूडियो में करावल गइल.
महुआ टीवी के रियलिटी शो “सुर संग्राम” के संयुक्त विजेता रहल मोहन राठौर आ आलोक कुमार एह फिल्म के नायक बा लोग आ फिल्म के गानो गाई लोग. बाकी कलाकारन में पूनम सागर, परी सिंघानिया, सुगन्धा, माया यादव, सुनीता सिंह, संजय यादव, रतन कुमार, उमेश यादव. सौम्या, मंजू श्रीवास्तव, संजय वर्मा, राजकुमार, सोनम आ मनोज वर्मा शामिल बाड़े. एह फिल्म में कुल एक दर्जन गाना बा जवना के आलोक कुमार आ मोहन राठौर का अलावे डालिया, कल्पना, इन्दु सोनाली आ अनुराधा सिंह गवले बाड़ी.
फिल्म के निर्देशक राजकुमार बागला, लेखक हंदय मिश्रा, पटकथा आ संवाद लेखक ललित शुक्ला, गीतकार सुबोध गाँधी आ रुस्तम घायल, संगीतकार राज सेन, नृत्य निर्देशक ज्ञान सिंह, कैमरामैन करीम खत्री, प्रोडक्शन मैनेजर सागर जायसवाल आ सह निर्माता कमलेश चौहान हउवें.
फिल्म के स्टार्ट टू फिनिश शूटिंग २० मई से पनवेल का सुर्वे फार्म हाउस में करावल जाई जवन २५ दिन ले चली.


(स्रोत – समरजीत)