एक और बगावत की आग

सिनेमा भोजपुरी के चलन का खिलाफ त अनेके फिल्मकार विद्रोह के आग सुलगावत रहल बाड़ें बाकिर दर्शकन के एह आग से कवनो नया रोशनी नइखे मिलल. अबकी अनेके धारावाहिकन के निर्देशन कर चुकल निर्देशक दिनेश चन्द्र मिश्रा अपना फिल्म “एक और बगावत की आग” से एह बगावत के झंडा बुलंद करे जात बाड़न. बी. आर .इशारा जइसन मशहूर निर्देशकन के सहायक रहल दिनेश चन्द्र मिश्रा के कहना बा कि भोजपुरी सिनेमा कथ्य आ शिल्प के हिसाब से बहुते पिछड़ल बाड़ी सँ काहे कि एहन के कथानक पर बाजारवाद हावी हो गइल बा. भोजपुरी सिनेमा के बदहाली खातिर दिनेश चन्द्र मिश्रा स्टार सिस्टमो के दोषी मानेलें. हालाकिं उनकर इहो कहना बा कि अबही मार्केट में कवनो अइसन स्टार नइखे जे अकेले अपना दम पर फिल्म के कामयाबी दिलवा सके. मिश्रा के पूरा यकीन बा कि बढ़िया कहानी के अगर नयको सितारन का साथे परदा पर पेश कइल जाव तबो फिल्म जरूर चली. देखल जाव उनकर ई यकीन हकीकत बन पावऽता कि ना.


(स्पेस क्रिएटिव मीडिया के रपट)

एगो अउरी बगावत क आग लहकल मुहूर्त भइल एक और बग़ावत की आग के

सिस्टम लोग खातिर बनल भा बनावल जाले, बाकिर सिस्टम क हिसाब से लोग ना बनावल जा सके. जबहिए अइसन कोशिश होखि त बगावत त होखबे करी. इहे संदेश ले के आवत बा निर्देशक दिनेश मिश्रा के अगिलका फिलिम “एक और बग़ावत की आग”. निर्माता बलराम सी शर्मा अउर सुनील दतिया के एह फिल्म क म्यूजिकल मुहूर्त हाल ही में धूम-धाम से मुंबई का कृष्णा स्टूडियो में कइल गइल. एह मौका पर गायिका रेखा राव, अलका झा आ आलोक कुमार क अलावे फिल्म के कलाकार कल्पना शाह, शुभी शर्मा, कृष्णा पाण्डेय वगैरह मौजूद रहलें.

ट्रिनिटी एंटरटेनमेंट के बैनर तले बनत एह फिल्म में विजयलाल यादव, कल्पना शाह, मणिराम शर्मा, काजल, शुभी शर्मा, कृष्णा पाण्डेय जइसन सितारा आपन जौहर देखइहें. कहानी आ पटकथा विंध्या शुक्ला के बा, संगीत बावे माणिक दा के.


(स्पेस क्रिएटीव मीडिया के रपट)