‘काहे कईलऽ हमसे घात’ रिलीज भइल

रीगल थिएटर का बैनर तले बनल भोजपुरी फिल्म ‘काहे कईलऽ हमसे घात’ पिछला हफ्ता बिहार के ३५ गो आ मुंबई के २५ गो सिनेमाघर में रिलीज भइल.

फिल्म के कहानी रानी चटर्जी से शुरु होखत बा जे गर्ल्स हॉस्टल में रहेली आ मारधाड़ में माहिर हई. अपना एह गुण का बदौलत ऊ गुण्डन से अझूरात रहेली. गुण्डा सब के ई गैंग भोली भाली लड़िकियन के फँसा के अश्लील वीडियो बना लेला आ बाद में ओकनी के शोषण करत रहेला. रानी एह गुण्डन से टकरात बाड़ी आ एह काम में राजन नाम के एगो लड़िका ओकर साथ देत बा, राजन के बहादुरी देख रानी ओकरा से प्यार करे लागत बाड़ि. बाकिर बाद में उनुका सदमा लागत बा जब पता चलत बा कि राजन ओह गुण्डन के सरदार के भाई हऽ. फेर त ओकरा राजन से नफरत हो जात बा. ओकरा बाद का होखत बा, इहे देखावल गइल बा एह फिलिम में.

एह फिलिम में रानी चटर्जी के अभिनय कमाल के बा आ उनुकर एक्शन सीन दर्शकन के आकर्षित करत बा. विराज भट्ट अपना भूमिका से पूरा न्याय कइले बाड़न आ खलनायक के रूप में राजप्रेमी के काम सराहे जोग बा.

निर्माता मुन्ना रिजवी, निर्देशक संगीत कुमार, संगीतकार राज सेन, गीतकार एस. कुमार, कैमरामैन रवि चंदन, नृत्यनिर्देशक एंथोनी, संवादलेखक मनोज के. कुशवाहा आ सह-निर्माता शिवा चौधरी अउर कमर कुरैशी हउवें. कलाकारन में रानी चटर्जी, विराज भट्ट, राज प्रेमी, बृजेश त्रिपाठी, सूर्या, सी.पी. भट्ट, मेहनाज, अयाज खान, के.के. गोस्वामी, राम मिश्रा, रानी खान, डा. अभय आशियाना प्रमुख भूमिका में बावे लोग. आयटम सांग पुर्णिला राय कइले बाड़ी.


(समरजीत के रपट)

Advertisements

23 मार्च से बिहार में ‘काहे कईलऽ हमसे घात’

रीगल थियेटर फिल्म्स के बैनर तले बनल भोजपुरी फिल्म ‘काहे कईलऽ हमसे घात’ 23 मार्च के बिहार आ झारखण्ड में एक साथ कई सिनेमाघरन में जानल मानल वितरक न्यू रौनक फिल्म्स (पटना) रिलीज करे जात बाड़न.

निर्माता मुन्ना रिजवी बतावत बाड़न कि एह फिलिम में देखावल जाई कि कइसे आजु के दिलफेंक लड़िका अपना आशनाई मे सोझ सिधवा लड़िकियन के फँसा लेत बाड़े आ फेर ओकनी के शारीरिक शोषण करके बेमौत मरे के मजबूर कर देत बाड़े. कुछ अइसने भइल फिल्म में नायिका का साथे आ नायिका रानी के तब सगरी मरद जाति से नफरत हो जात बा. बाकिर जिनिगी का एगो मोड़ पर ओकरा फिल्म के नायक राजन से भेंट होत बा आ उनुका लागत बा कि सगरी मरद एके जइसन ना होखेले. बाकिर का साँचहू अइसने रहल ? बाद में जब ओकरा पता चलल कि प्यार के नाम पर ओकरा साथ चाल खेलल जात बा त ओकरा बड़हन धक्का लागत बा. ओकरा बाद का होखत बा, इहे देखावल गइल बा एह फिलिम में.

निर्माता मुन्ना रिजवी, निर्देशक संगीत कुमार, संगीतकार राज सेन, गीतकार एस. कुमार, कैमरामैन रवि चंदन, नृत्यनिर्देशक एंथोनी, संवादलेखक मनोज के. कुशवाहा आ सह-निर्माता शिवा चौधरी अउर कमर कुरैशी हउवें. कलाकारन में रानी चटर्जी, विराज भट्ट, राज प्रेमी, बृजेश त्रिपाठी, सूर्या, सी.पी. भट्ट, मेहनाज, अयाज खान, के.के. गोस्वामी, राम मिश्रा, रानी खान, डा. अभय आशियाना प्रमुख भूमिका में नज़र अइहें.

एह फिल्म में आइटम सांग पुरनेला राय पेश कइले बाड़ी.


( समरजीत के रपट से)

के.के.गोस्वामी लिहले “गंगा की सौगंध”

के.के.गोस्वामी एह घरी बहुते बिजी बाड़े. हालही में फिल्म “काहें कईला हमसे घात” में धमाकेदार एक्टिंग का बाद के.के. निकल पड़ले बनारस का ओर आ उहो “गंगा की सौगंध” लेबे.

के.के. गोस्वामी आजुकाल्हु बनारस में फिल्म “गंगा की सौगंध” का शूटिंग में व्यस्त बाड़े. एह फिल्म में एक बेर फेर एह छोटे उस्ताद के अजीबो-गरीब कारनामा से रउरा सभे रु-ब-रु होखब. वइसे ई छोटे मियां जब अपना दर्शकन के हँसावे पर उतारू हो जालें तब इनकर मुकाबला केहू ना कर सके. के॰के॰ के जल्दिये आवे वाली फिल्म हवे निर्देशक संगीत कुमार के “काहे कईला हमसे घात”. एह फिल्म में के.के.गोस्वामी हउवें त छोटके पैकेट, बाकिर एगो आइटम गर्ल बनिके जवन डाँस कइले बाड़न ओकर बड़का जलवा होखी. अब देखे के बा कि “गंगा की सौगंध” ले के के.के. गोस्वामी अउरी कतना धमाका करे वाला बाड़े.
स्पेस क्रिएटीव मीडिया के रपट