‘किसना कईलस कमाल’ शुक से मुंबई में

भोजपुरी सुपर स्टार विनय आंनद के फिलिम ‘किसना कईलस कमाल’ शुक का दिने मुंबई में हंगामा बरसावे आवे वाली बा. एह फिल्म में विनय आनंद क नायिका बाड़ी गुंजन पंत. ‘किसना कईलस कमाल’ के निर्माता हउवें लक्ष्मण आर. पांडे आ निर्देशक हउवें चुनमुन पंडित.

विनय आनन्द के एगो अउर फिलिम ‘पागल प्रेमी’ओ खूबे चर्चा में बिया. इहो फिलिम जल्दिये रिलीज होखी. ‘पागल प्रेमी’ के निर्माता नवीन कुमार सिंह आ निर्देशक अजय कुमार हउवें.


(शशिकांत सिंह रंजन सिन्हा के रपट)

भोजपुरी माटी के सुगन्ध बा किसना कइलस कमाल में

Vinay Anand and Gunjan Pant
पिछला दिने ९ अप्रैल के बिहार में आपन पहिलका फिल्म किसना कइलस कमाल के निर्माता लक्ष्मण आर पाण्डेय कहलन कि विकास का ओर अग्रसर भोजपुरी सिनेमा अपना अश्लीलता का चलते ओह जगहा पर नइखे चहुँप पावत जहवाँ के ऊ असल हकदार बा. एही चलते ऊ अपना फिल्म के साफ सुथरा आ परिवार का संगे देखे लायक बनवले बाड़न. फिल्म के निर्देशक चुनमुन पंडित कहलें कि फिल्म में भोजपुरिया माटी के सुगन्ध रचल बसल बा. फिल्म के मुख्य कलाकारन में विनय आनन्द, गुंजन पंत, प्रिया शर्मा, राकेश पान्डेय, विष्णु ओझा, पंकज मेंहता, आ अनुराग भारद्वाज बाड़े. संगीत अशोक घायल के ह.


(स्रोत : संजय भूषण पटियाला)

रसीली बाई का संगे विनय आनन्द के ठुमका

मामा का राह पर चलत भाँजा विनय आनन्द गुंजन पंत का साथे साइकिल के सवारी कइला का बाद रसीली बाई का संगे ठुमका लगइहें. फिल्म ह किसना कइलस कमाल जवना का बारे में विनय आनन्द के कहना बा कि ई उनुकर एह साल के सबले बड़ हिट फिल्म साबित होखी.

एह फिल्म में विनय के बड़ भाई आ एगो स्कूल मास्टर के भूमिका में लोकगायक विष्णु ओझा पहिला बेर भोजपुरी फिल्म में आइल बाड़े. फिल्म के अधिकतर शूटिंग बक्सर में भइल बा. लक्ष्मण आर पाण्डे के बनावल एह फिल्म के निर्देशन चुनमुन पंडित कइले बाड़न आ संगीत अशोक घायल के ह. फिल्म के गाना कल्पना, उदित नारायण, आ इन्दु सोनाली के आवाज में बाड़ी स.


(स्रोत : संजय भूषण पटियाला)