खेसारीलाल आ स्मृति के सुपरहिट जोडी के ‘लाल दुपटटा मलमल का’

भोजपुरी के नयका स्टार नायक खेसारीलाल यादव आ स्टार नायिका स्मृति सिन्हा के सुपरहिट जोड़ी फेरू एक हाली भोजपुरी परदा पर धमाल मचाई‘साजन चले ससुराल’ आ ‘देवरा पे मनवा डोले’ जइसन सुपरहिट फिल्म देबे वाली एह जोड़ी के दीदार दर्शक श्रीमती रमादेवी प्रोडक्शन के बैनर तले बनत ‘हवा में उड़ता जाये लाल दुपट्टा मलमल का’ फिलिम में करीहें.

निर्माता अनिल सिंह आ लेखक, संगीतकार अउर निर्देशक अशोक कुमार दीप के एह फिल्म में खेसारी-स्मृति के प्रेमी जोड़ी पर एक से बढ़ के एक मीठ गीत आ बेहतरीन सीन फिलिमावल गइल बा. नाग नागिन का रूपो में एह लोग पर एगो खास गीत बा एह दुनु पर.

साथी कलाकारन में अपूर्वा, अयाज खान, प्रकाश जैस आ समर्थ चतुर्वेदी के नाम बा. सह-निर्माता बाड़ें अविनाश सिंह.


(प्रशांत निशांत के रपट)

यूपी में खेसारीलाल के धूम मचल बा

भोजपुरी के नया-नवेला सुपरस्टार खेसारीलाल यादव के आजुकाल्हु पूरा यूपी में धूम मचल बा. खेसारी के ‘जान तेरे नाम’ बिहार में पचसवाँ दिन मनवला क बाद अब यूपी में ऐतिहासिक कलेक्शन बटोरत बिया. यूपी. के गोरखपुर के साथ आधा दर्जन सिनेमाघरन में पहिले के सगरी रिकार्ड ध्वस्त करत एह फिल्म के शानदार कलेक्शन मिलल बा. ई फिल्म पिछला दू साल के ओपनिंग रिकॉर्ड तूड़ले बिया.

निर्माता-निर्देशक रमाकांत प्रसाद हउवें. फिल्म के सफलता से उत्साहित खेसारी के कहना बा कि ऊ हमेशा दर्शकन के पसंद के खयाल रखीहें.


(प्रशांत निशांत के रपट)

खेसारीलाल के लाजवाब रिकार्ड

भोजपुरी सुपरस्टार खेसारीलाल यादव एगो लाजवाब रिकार्ड बनवले बाड़न. उनुकर लगातार दू गो फिलिम सफलता का साथे पचासवाँ दिन मनवले बाड़ी सँ. खेसारी क पहिलका फिलिम ‘साजन चले ससुराल’ बिहार के आधा दर्जन सिनेमाघरन में पचास दिन मनवले रहुवे आ अब उनुकर दोसरको फिलिम ‘जान तेरे नाम’ बिहार के सात गो सिनेमाघरन में लगातार पचास दिन सफलता से चले के रिकार्ड बनवले बिया. एह लाजवाब रिकार्ड से खेसारीलाल उछाह में बाड़न. खेसारी अभिनीत आ आलोक कुमार के बनावल ‘देवरा पे मनवा डोले’ फिलिमवो एह घरी बिहार में धूम मचवले बिया.


(प्रशांत निशान्त के रपट)

‘‘जान तेरे नाम” में खेसारीलाल-विराज भट्ट पहिला बेर साथ-साथ

भोजपुरी के नयका स्टार खेसारी लाल यादव आ एक्शन स्टार विराज भट्ट के जोड़ी पहिला बेर एक साथ प्रसिद्ध निर्माता-निर्देशक रामाकांत प्रसाद के ‘‘जान तेरे नाम’’ में नजर आवे वाली बा. आदिशक्ति इंटरटेनमेंट आ सीता आर्टस प्रस्तुत कुमारी माई मूवीज के बैनर तले बनल एह फिल्म में खेसारीलाल आ विराज भट्ट के जबरदस्त टक्कर देखे के मिली.

फिल्म में खेसारी के नायिका बाड़ी नवोदित तनुश्री चटर्जी आ विराज के नायिका प्रिया शर्मा. साथी कलाकारन में नीरज पौडेल, मनीष चतुर्वेदी, देव सिंह, धामा आ ब्रजेश त्रिपाठी बाड़े. निर्माता-निर्देशक रामाकांत प्रसाद आ लेखक हउवें मनोज के॰ कुशवाहा.


(प्रशांत निशांत के रपट से)

निर्माता अभय सिन्हा, अभिनेता खेसारीलाल यादव आ प्रचारक प्रशांत-निशांत बिहार दिवस पर सम्मानित भइले


बिहार सरकार की संस्था बिहार फाउंडेशन मुंबई चैप्टर पिछला दिने बिहार दिवस पर मुंबई में एगो समारोह आयोजित कइलसि. एह समारोह में भोजपुरी सिनेमा में उत्कृष्ट योगदान कइला बदे सुप्रसिद्ध निर्माता अभय सिन्हा, भोजपुरी सिनेमा के नयका सितारा खेसारी लाल यादव आ भोजपुरी फिल्म प्रचारक प्रशांत निशांत के बिहारी बाबू शत्रुध्न सिन्हा के हाथे विशेष सम्मान से सम्मानित कइल गइल. साथ ही भोजपुरी संगीत में महती योगदान खातिर मशहूर लोकगायिका कल्पना पटवारी, सुर संग्राम 1 के विजेता मोहन राठौर, सुर संग्राम 2 के विजेता ममता राउत आ सुनील सांवरा के सम्मानित कइल गइल. सामरोह सायन के षणमुखानंद हॉल में आयोजित रहे.
एह मौका पर मुख्य अतिथि डॉ. सी. पी. ठाकुर, विशेष अतिथि बिहारी बाबू शत्रुघ्न सिन्हा, आ सम्मानित अतिथियन में सांसद सैयद शहनवाज हुसैन, यु. के. सिन्हा, (सेबी चेयरमैन), एन. एन. कुमार चेयरमैन नवा सेवापोर्ट, देवेश चन्द ठाकुर (एम.एल.सी) उपस्थित रहले. मुख्य अतिथि सी. पी. ठाकुर कहलन कि बिहार आवे वाला समय के नंबर वन राज्य हवे. बिहार बाबू शत्रुघ्न सिन्हा कहलन कि बिहार आ बिहारियन में बहुत दम बा आ बिहारी अपना मेहनत के लोहा मनवा लेले. सांसद सैयद शहनवाज हुसैन कहलन कि बिहारी जहँवे जाले ओहिजा के विकास हो जाला.

बिहार फाउन्डेशन मुंबई चैप्टर के चेयर मैन रविशंकर श्रीवास्तव धन्यवाद भाषण आ वाइस चेयरमैन अभय कुमार स्वागत भाषण दिहलें. एह कार्यक्रम में बिहार फाउन्डेशन इमर्जिंग बिहारी सम्मान से अभिनेत्री सोनाक्षी सिन्हा, तबरेज रबड़वाला, मोहन जी प्रसाद, ब्रहमदेव राम पंडित के सम्मानित कइलसि. महाराष्ट्र विधान सभा के सदस्य अशोक भाऊ जाधव आ विवेकानंद पाटिल अउर सायन अस्पताल के सहायक डीन राजेश गुप्ता के ‘बिहार-मित्र’ पुरस्कार से सम्मानित कइल गइल. एह अवसर पर उपाध्यक्ष अख्तर राशिद, टी. वी. सिन्हा, सचिव अहसान हुसैन, प्रवक्ता रागिनी गौतम, मनोज सिंह राजपूत, संयोजक रणवीर, कोषाध्यक्ष निंरज का साथे प्रसिद्ध व्यवसायी सर्वेस शाही, उद्योगपति कुमार बिहारी पाण्डेय, आ कैप्टन एन. बी. पाण्डेय वगैरह उपस्थित रहले.

सांस्कृतिक कार्यक्रम के शुरूआत प्रसिद्ध गायिका कल्पन भिखारी ठाकुर के गीत से कइली, सिंगर अभिनेता खेसारीलाल यादव, मोहन राठौर, सुरेश आनंद आ ममता रावत अपना मधुर आवाज से सुनेवालन के मन मोह लिहले.


(बिहार फाउन्डेशन मुबंई चैप्टर के संयुक्त प्रवक्ता मनोज सिंह राजपूत, उदय भगत, आ प्रशांत निशांत से मिलल जानकारी)

रामाकांत प्रसाद के ‘‘जान तेरे नाम’’ में खेसारीलाल

भोजपुरी फिलिमन के चर्चित निर्माता-निर्देशक रामाकांत प्रसाद अब भोजपुरी परदा के नयका स्टार ‘‘साजन चले ससुराल’’ फेम खेसारीलाल यादव के लेके फिल्म बनावे जात बाड़े, नाम राखल गइल बा ‘‘जान तेरे नाम’’. एह फिल्म की अंतिम शूटिंग शेड्यूल मुंबई में जोर-शोर से जारी बा. आदिशक्ति इंटरटेनमेंट आ सीता आर्टस के प्रस्तुति आ कुमारी माई मूवीज के बैनर तले बनत एह फिल्म में खेसारी लाल यादव का साथे विराज भट्ट आ तनुश्री चटर्जी के मुख्य भूमिका बा.

गीतकार विनय बिहारी, अशोक कुमार दीप, प्यारेलाल यादव आ बृजेश पाण्डे, संगीतकार अशोक कुमार दीप, आ छायांकनकर्ता देवेन्द्र तिवारी हउवें. फिल्म में प्रिया शर्मा, नीरज राज पौडेल, धामा वर्मा, देव सिंह वगैरहो के खास भूमिका बा.

अबले निरहुआ, पवन सिंह आ विराज भट जइसन स्टारन का साथ ब्लाकबस्टर फिल्म देबेवाला रामाकांत प्रसाद ‘जान तेरे नाम’ से बहुते उम्मीद रखले बाड़न.


(स्रोत – प्रशांत निशांत)