भोजपुरी सिनेमा के कमाई खातिर नया राह खोल दिहलें प्रकाश अवस्थी

भोजपुरी फिलिम निर्मातन के कमाई के एगो अउर राह मिल गइल बा छत्तीसगढ़ टेरेटरी से. भजन सम्राट अनूप जलोटा के कंपनी अपना भोजपुरी फिलिम ला छत्तीसगढ़ी सिनेमा के सुपर स्टार प्रकाश अवस्थी के भोजपुरी परदा पर उतारे जात बाड़ें जवना से अब भोजपुरी फिलिमन के छत्तीसगढ़ी संस्करण ओहिजा प्रदर्शित करे के नया राह खुल गइल बा.

छत्तीसगढ़ी सिनेमा में प्रकाश अवस्थी बीसन से बेसी फिलिमन में काम कर चुकल बाड़ें आ सगरी फिलिम सुपर डुपर हिट रहल बाड़ी सँ. उनकर सबले बड़हन फिलिम रहल ‘मया’ जवना के मिलल सफलता से प्रकाश अवस्थी छत्तीसगढ़ी सिनेमा के सुपर स्टार बन गइलें. ओकरा बाद आइल ‘टू ए रिक्शावाला’, ‘भावर’ आ ‘दो लफाड़ू’ छत्तीसगढ़ में खूब कमाई कइली सँ. एह यंग्री यंग मैन स्टार के नामे बहुत होला छत्तीसगढ़ में फिलिम के सफलता ला.

प्रकाश अवस्थी भोजपुरी फिल्म ‘चिंगारी’ में बतौर नायक बनके नजर अइहें. जइसे नेपाली सुपर स्टार विराज भट्ट के सिनेमा भोजपुरी में उतार के एगो नया प्रयोग कइल गइल रहे ओइसहीं अब प्रकाश अवस्थी के उतार के कइल जात बा. एहसे भोजपुरी सिनेमा के एगो नया बड़हन बाजार मिले के राह खुलल बा.


(शशिकांत सिंह, रंजन सिन्हा के रपट)

हॉलीवुड स्टार वार्विक डेविस करीहें भोजपुरी फिल्म में अभिनय

हैरी पोर्टर अउर स्टार वार के किरदार अब भोजपुरी में बोली

हैरी पोटर, स्टार वार्स समेत अनेके हॉलीवुड फिलिमन मं अपना अभिनय खातिर दुनिया भर में चर्चित हॉलीवुड स्टार वार्विक डेविस अब भोजपुरी सिनेमा में काम करे वाला बाड़ें. पिछला दिने वार्विक डेविस भारत के खुशी क्रियेशंस एण्ड कम्यूनिकेशन अउर हांगकांग के सिटी इंटरटेनमेंट लिमिटेड के बैनर तले बने जात भोजपुरी फिल्म ‘चिंगारी’ में काम करे के सहमति दिहले बाड़ें.

एह भोजपुरी फिल्म ‘चिंगारी’ के निर्माता हउवें श्रेय श्रीवास्तव आ निर्देशन करीहें मशहूर निर्देशक के.डी. फिल्म के शूटिंग भारत में कइल जाई आ एह खातिर वार्विक जल्दिए भारत अइहें. फिल्म के निर्माता श्रेय श्रीवास्तव के कहना बा कि हॉलीवुड स्टार वार्विक डेविस के भूमिका लोग के चउँका के रख दी. हमेशा कुछ अलग करे आ भोजपुरी सिनेमा में बदलाव लावे का दिशाईं ई कदम उठावल गइल बा.

एह फिल्म के कैमरामैन रहीहें मनोज कुमार, कहानी आ पटकथा खुद श्रेय श्रीवास्तव के लिखल ह, जबकि संवाद वीरेन्द्र पाठक के. संगीत दीहें वैष्णव देवा आ नरजिस म्यूजिक संगीत जारी करी. फिल्म के कलाकारन में रानी चटर्जी, सुशील सिंह, श्वेता हलदर, प्रकाश अवस्थी, दीपा सिंह आ खुद श्रेय श्रीवास्तव के मुख्य भूमिका रही. साथ में रहीहें प्रकाश जैस, सिकंदर खान, राजीव वशिष्ठ, कौशल, गौरी शंकर, आ डांसिंग क्वीन सीमा सिंह.


(शशिकांत सिंह रंजन सिन्हा के रपट)

सीमा सिंह चिंगारी से खेलीहें


भोजपुरी सिनेमा के आयटम गर्ल सीमा सिंह के सीन आवे आ देखेवाला लोग सीटी ना बजावे से होइये ना सके. अब दर्शकन का दिल में आग पैदा करे वाली सीमा भोजपुरी फिल्म “चिंगारी” में नायिका बन के आवत बाड़ी. सीमा एहसे पहिले पवन सिंह का साथे “चोरवा बनल दामाद” में नायिका बन के आइल रहली बाकिर उनकर ध्यान नायिका से बेसी आयटम नंबर करे पर रहेला. एक एक दिन में तीन चार गो आयटम नंबर कर डालेली सीमा आ एह चलते उनुका नायिका बनल फायदा के सौदा ना लागे. अब “चिंगारी” में नायिका बनलो बाड़ी त ओहूमें दू गो आयटम नंबर करीहें सीमा सिंह. निर्देशक हउवें के॰डी॰ आ सहयोगी कलाकार रहीहें सुशील सिंह, रानी चटर्जी, श्रेया श्रीवास्तव.

पिछला सप्ताह सीमा सिंह फिल्म साईन करे के चौका मार दिहले बाड़ी. फिल्मन के नाम बा, विराज भट्ट का साथे “है कोई माई के लाल” आ “गजब होई गवा”, शक्ति कपूर का साथे “ससुरो कबो दामाद होला” आ चउथकी फिल्म बा “सईंया ड्राइवर बीबी खलासी”. सीमा सिंह हालही में पाँच गो फिल्म में अपना आयटम के जलवा देखवली. एह फिल्मन के नाम ह, चिंगारी, बंधनमुक्त, ठुमके वाली, बागी आ केहु हमसे जीत ना पाई.


(स्रोत – शशिकांत सिंह)