एक बिहारी आ ज्वालामंडी से जगदीश शर्मा के चल निकलल

जगदीश शर्मा अइसन निर्देशक हउवन जे बालीवुड के रंगीन दुनिया छोड़ भोजपुरी इंडस्ट्री के आगे बढ़ावे के जिम्मा ले लिहलन. जगदीश शर्मा के निर्देशन में बनल आ हालही में रिलीज भइल “निरहुआ“ अभिनीत एक बिहारी सौ पे भारी के बिहार के दर्शक बालीवुड स्टार सलमान खान के फिल्म एक था टाइगर से टक्कर में ज्यादा बाव दिहलें आ फिलिम पहिलके हफ्ता में चालीस लाख से बेसी के नेट कलेक्शन कर लिहलसि.

एही तरह रविकिशन अभिनीत ज्वालामंडी के सफलता एह सफलता के कई गुना बढ़ा दिहलसिल एह फिलिम में रविकिशन आ अवधेश मिश्रा के बीच को बड़ छोट कहत अपराधू वाला हाल बा. दुनु के अदाकारी फिलिम के लाजवाब बना दिहले बावे. बिहारी दर्शक बारी बारी दुनु फिलिम के आनंद लेत बाड़ें आ वितरकन के लागत बा कि सिनेमा भोजपुरी के गाड़ी फेर आपन रफ्तार धर लिहले बिया.

दुनु फिलिमन के सफलता से निर्देशक जगदीश शर्मा के मिले वाला बधाईयन के ताँता लागल बा.


(संजय भूषण पटियाला के रपट)

Advertisements

देखनिहारन के नीक लागत बाड़े विक्रान्त सिंह

भोजपुरी अभिनेता विक्रांत सिंह के हालही में रिलीज फिल्म “कर्तव्य” बिहार में धमाल मचा रहल बा. एह फिल्म के लोग खूब पसन्द कइले बा. आ ओहू ले बेसी खुशी के बाति ई बा कि विक्रांत के लुक आ स्टाइल नवहियन के खूबे निमन लागल बा. कुछ लोग त बाकायदा विक्रांत लुक में लउके लागल बा. फिल्म में परदा पर विक्रांत सिंह जब जब आवत बाड़न तब तब दर्शक उनुकर उछाह का साथ स्वागत करत बाड़े. विक्रांत के कहना बा कि ई सब कुछ निर्देशक जगदीश शर्मा के कमाल बा जे ऊ विक्रांत के किरदार के अतना बढ़िया से परदा पर पेश करवले बाड़न.


(स्रोत – प्रशान्त निशान्त)

पवन सिंह आ जगदीश शर्मा के जोड़ी ले आवत बिया कुरुक्षेत्र

भोजपुरी सिनेमा के सुपर स्टार पवन सिंह आ चर्चित निर्देशक जगदीश शर्मा के जोड़ी अबकी भोजपुरी फिल्म कुरुक्षेत्र ले के आ रहल बा. एह पूरा तौर से एक्शन मूवी में पवन सिंह मुख्य अभिनेता बाड़े आ एह फिल्म के निर्देशक जगदीश शर्मा कर रहल बाड़न.

दौलत मूवीज का बैनर में बनत एह फिल्म में पवन सिंह एकदमे नया रुप में सामने अइहें. ई रुप रही एक्शन हीरो के. उनकर नायिका बाड़ी मोनालिसा जे पवन खातिर हमेशा लकी रहल बाड़ी. एह फिल्म में एगो अउरी जोड़ी बा विक्रांत सिंह आ रुबी सिंह के. पवन आ विक्रान्त दू गो बिछुड़ल भाईयन का किरदार में बाड़े.

जगदीश शर्मा के कहना बा कि उनकर आ पवन सिंह के जोड़ी एहसे पहिले हिट फिल्म “रंगबाज दारोगा” में काम कइले रहुवे आ उम्मीद बा कि अबकियो “कुरुक्षेत्र” के दर्शक ओतने प्यार दीहें. अभिनेता पवन सिंह के कहना बा कि जगदीश शर्मा का साथे काम करे में मजा आवेला आ ऊ एकरा के खूबे इंज्वाय करेलें. इहो कहलें कि “कुरुक्षेत्र” बहुते मनोरंजक फिल्म बा जवन हर तरह से बढ़िया बा.

फिल्म के बाकी कलाकारन में बृजेश त्रिपाठी, हिमाक्षी, किरण कुमार, आ टीनू वर्मा खास किरदारन में बाड़े. कथा पटकथा मनोज हंसराज के बा आ गीत विनय बिहारी आ श्याम देहाती के. फिल्म के डायलाग सुरेन्द्र मिश्रा के लिखल बा. कैमरा मुकेश मारू सम्हरले बाड़े.


(स्रोत – प्रशान्त निशान्त)

समाज के सच्चाई झलकेला हमरा फिलिमन में, कहलें जगदीश शर्मा

अपना जुनून से सपना के सच्चाई में बदल देबे वाला निर्देशक हउवें जगदीश शर्मा. हर सला उनकर फिल्म आवेली सँ आ सीधे दर्शकन का दिल में उतर जाली सँ. पिछला साल उनकर फिल्म रंगबाज दारोगा सफलता के मंजिल तय कइलस त एह साल आ रहल बा प्रवेश सिप्पी के मृत्युंजय, जीतेश दूबे के मार देब गोली केहू ना बोली, आ दौलत ठाकुर राजू सिंह के कुरुक्षेत्र साथही आ रहल बा टेकनीशियन फिल्म्स के छोटका भईया जिन्दाबाद.देवानन्द का साथे लश्कर, अक्षय कुमार का साथे सपूत आ कमाल खान का साथे देशद्रोही निर्देशित करेवाला निर्देशक जगदीश शर्मा से पिछला दिने भइल बातचीत से जवन सामने आइल एहिजा पेश कर रहल बानी.

Jagdish Sharma

कहल जाला कि सिनेमा दिलन के जोड़ेला. का भोजपुरी सिनेमा दिल जोड़े के काम कर रहल बा?

बिल्कुलजोड़ रहल बिया. भोजपुरी सिनेमा आज मारीशस सुरीनाम ले चहुँप गइल बा त एकरा के दिले जोड़ल नु कहल जाई.

एह साल राउर तीन गो फिल्म आ रहल बाड़ी सँ. का फरक बा तीनो में?

तीनो अलगा अलगा बाड़ी सँ. मृत्युंजय में एगो आदमी के हौसला के बात कइल गइल बा, ओकरा लक्ष्य के बात कइल गइल बा. जबकि मार देब गोली केहू ना बोली पूरा तरह से पॉलिटीशियन्स, बाहुबलियन, आ पुलिस आफिसर्स का संबंध पर बनल बा. छोटका भईया जिन्दाबाद के कहानी संपत्ति विवाद के कहानी बा.

हमरा कहे के मतलब रहुवे कि मौजूदा दौर से ई फिलिम कवना तरह से अलगा बाड़ी सँ?

तीनो फिलिम रियलिस्टिक बाड़ी सँ जवना में समाज के सच्चाई देखावल गइल बा. साथ ही साथ मनोरंजनो के पूरा ध्यान राखल गइल बा.

प्रवेश सिप्पी हिन्दी के आ जीतेश दूबे भोजपुरी के नामचीन निर्माता ह लोग. कइसन अनुभव ररहल ओह लोग का साथ फिल्म बनावत में?

प्रवेश जी हर काम अपना अनुभव का हिसाब से करेलें जबकि जीतेश दूबे के सीधा फंडा ह कि फिल्म बनाव आ पूरा दिल से बनावऽ. दुनु का साथे काम करे में आनन्द मिलल.

भोजपुरी सिनेमा के रउरा पहिला निर्देशक हईं जे भोजपुरी के सगरी सुपर स्टारन केनिर्देशित कइले बा. कुछ ओहू बारे में?

प्रवेश सिप्पी का चलते मृत्युंजय में दिनेशलाल के पहिला बेर निर्देशित करे के मौका मिलल. रविकिशन का साथे पहिलहू काम कर चुकल बानी आ ओहि घरी से हमनी के बढ़िया ट्यूनिंग बा. मार देब गोली में रविकिशन कमाल के काम कइले बाड़े. छोटका भईया जिन्दाबाद आ एकरा से पहिले देवा में मनोज तिवारी के निर्देशित करे के अनुभव बहुते बढ़िया रहल. उनका साथे फिल्म बनावे के मतलब होला टेंशन फ्री हो के काम कइल. कुरुक्षेत्र में पवन सिंह के निर्देशित कर रहल बानी. पवन त एकदम बच्चा हउवें. जइसन चाहीं वआसन रुप दे दीं. सेट पर हँसावत हँसावत लोटपोट करा देलन. एही क्रम में दीपक दूबे आ गुंजनो पंत के चर्चा कइळ ठीक रही. दीपक दूबे पावर पैक्ड एक्टर हउवें आ गुंजन के गूंज त पूरा भोजपुरी वर्ल्ड में गूंजत बा. इहो दुनु जने बहुते आगा जाई.

मार देब गोली केहू ना बोली का बारे में एक लाइन?

ई फिल्म तमंचा आ कारतूस का बल पर बिहार में लहलहात अपराध के फसल के कच्चा चिट्ठा खोलत बिया. जीतेश दूबे के प्रस्तुति आ पायल दूबे के निर्माण ई फिल्म कमाल के बनल बिया.

आ मृत्युंजय का बारे में?

मृत्युंजय पूरा तरह से रियलिस्टिक फिल्म बा जवन सिनेमा के परदा पर आ के दर्शकन के ई सोचे पर मजबूर कर दी कि का अइसनो कमाल के फिल्म बन सकेले


स्रोत : शशिकान्त सिंह