सिनेमा भोजपुरी के टाईगर हउवें पवन सिंह

भोजपुरी अभिनेता पवन सिंह एक बेर फेरू साबित कर दिहलन कि उहे असल टाईगर हउवन सिनेमा भोजपुरी के. उनुका चाहे वालन में उनुकर अइसन क्रेज बा जे उनुकर फिलिम देखे दर्शकन के हजूम उमड़ पड़ेला. हालही में रिलीज पवन सिंह के फिलिम ‘डकैत’ के सफलता के आलम ई बा कि सगरी सिनेमा हाल में शो शूरु होखे से एक घंटा पहिलही हाउस फुल हो जात बा.

फिल्म डकैत देखे ला भिवंडी समेत मुंबई के तमाम सिनेमाघरन में हालात ई रहुवे कि लगभग डेढ़ डेढ़ हजार लोग सिनेमाघर के बहरी टिकट खरीदे खातिर लाइन में रहलें. रमजानो का महीना में तमाम सिनेमा घर हाउस फुल चलत बाड़ी सँ. प्रीमियर ला जब मुंबई आ भिवंडी के सिनेमाघरन में पवन सिंह फिलिम के पूरा टीम संगे चहुँपलें त उनकर एक झलक देखे खातिर हजारन के भीड़ उमड़ पड़ल. भीड़ सम्हारे ला पुलिस के लाठी भाँजे पड़ल. अगल बगल का घर का छतो पर से लोग एह भोजपुरिया टाईगर के दीदार करत रहलें.

मिथिला टॉकीज के बैनर में बनल ‘डकैत’ के निर्माता मनोज चौधरी आ निर्देशक रवि भूषण हउवें.


(शशिकांत सिंह रंजन सिन्हा के रपट से)

Advertisements

बिहार में ‘डकैत’ के राज चलत बा

मिथिला टॉकिज के हालमें रिलीज भइल फिलिम ‘डकैत’ के राज सगरी बिहार में चलत बा. चालीस से अधिका सिनेमाघरन में निर्माता मनोज चौधरी के ‘डकैत’शानदार बिजनेस करत बा. पहिला दू हफ्ता में एकर नेट कलेक्शन पैंतीस लाख रुपिया भइल. तय बा कि दर्शक फिलिम के खूबे पसंद कइले बाड़न.

फिल्म के निर्देशक रविभूषण हउवें आ कलाकारन में पवन सिंह, मोनालिसा, प्रतिभा पाण्डेय, चाँदनी चोपड़ा, मनोज टाईगर, अनिल यादव, मनीष चतुर्वेदी, सुबोध सेठ, दीपक भाटिया, गौरी शंकर आ बृजेश त्रिपाठी के प्रमुख भूमिका बा.

पिछला हफ्ता एकरा के मुंबईओ में रिलीज कइल गइल आ ओहिजो एकरा बढ़िया समर्थन मिलल बा दर्शकन के. अपना एह सफलता से निर्माता मनोज चौधरी बहुते उत्साहित बाड़ें.


(प्रशांत निशांत के रपट)


रमज़ानो में हाउस फुल रहल पवन सिंह की ‘डकैत’
भोजपुरी स्टार पवन सिंह के जादू बिहार क बाद मुंबईओ में चलल आ रमज़ान में रिलीज भइला का बावजूद हर जगहा हाउस फुल रहल. पहिला बेर देखे के मिलल कि मुम्बई के अधिकतर सिनेमाघर में दुपहरिया बारहे बजे हाउस फुल के बोर्ड लाग जाव. अइसन पहिला हाली भइल बा.


(शशिकांत सिंह रंजन सिन्हा के रपट से)

फिलिम डकैत आ खुद्दार २७ जुलाई के बिहार में रिलीज भइली सँ

पिछला शुक 27 जुलाई के बिहार में पवन सिंह स्टारर ‘‘डकैत’’ आ विराज भट्ट अभिनीत ‘‘खुद्दार’’ रिलीज कइल गइल. ‘‘डकैत’’ 40 गो सिनेमाघरन में आ ‘‘खुद्दार’’ बिहार के 30 गो सिनेमाघरन का साथे मुंबईओ में रिलीज कइल गइल, दुनु के शुरूआती ओपनिंग बढ़िया रहल.


(प्रशांत निशांत के रपट)

पवन सिंह के ‘डकैत’ बजवलसि बिहार में सफलता के डंका

सिनेमा भोजपुरी के बड़का अभिनेता पवन सिंह के फिल्म ‘डकैत’ के बिहार में शानदार सफलता मिलल बा. एह फिल्म में पवन सिंह टाइटिल भूमिका में बाड़न आ उनका साथे तीन गो हीरोइन बाड़ी मोनालिसा, प्रतिभा पाण्डेय आ चांदनी चोपड़ा. पवन सिंह के शानदार एक्शन स्टंट्स दर्शक बहुते पसंद क५६ बाड़ें.


(शशिकांत सिंह रंजन सिन्हा के रपट)

बजरंग पवन डकैत बन गइल

भोजपुरी के मशहूर लोकगायक आ अब सुपर स्टार पवन सिंह के फिल्म बजरंग के बिहार में धूम मच गइल बा. अब बजरंग पवन आपन चोला बदल के डकैत बन गइल बाड़ें आ एही नाम के फिल्म “डकैत” में उनुकर टाइटल भूमिका बा. आठ जून से बिहार में तहलका मचावे के तइयार बावे मिथिला टाकिज के बैनर तले बनल निर्माता मनोज चौधरी के फिल्म ‘डकैत’. एकर लेखक-निर्देशक रवि भूषण हउवें.

एह फिल्म में पवन सिंह क साथे मोनालिसा, चांदनी चोपड़ा आ प्रतिभा पाण्डेय आँख लड़ावत नजर अइहें. साथी कलाकारन में मनोज टाईगर, ब्रजेश त्रिपाठी, मनीष चतुर्वेदी, आनंद मोहन, आफरीन खान, विजया, संजय वर्मा आ अनिल यादव के खास भूमिका बा. एह फिल्म के फर्स्ट लुक जेही देखले बा सेकरे मानल बा कि ‘डकैत’ के राज दर्शकन पर चल के रही.


(उदय भगत के रपट)

4 मई से बिहार में ‘डकैत’ के राज चली

4 मई से बिहार में ‘डकैत’ के राज चले वाला बा. मिथिला टॉकिज के बैनर तले बनल निर्माता मनोज चौधरी के फिल्म ‘डकैत’ ओह दिन बिहार के सिनेमाघरन में रिलीज होखे वाली बा.

डकैत के मुख्य कलाकारन में सुपरस्टार पवन सिंह ‘डकैत’ का साथे मोनालिसा, चांदनी चोपड़ा आ प्रतिभा पाण्डेय, मनोज टाईगर, ब्रजेश त्रिपाठी, मनीष चतुर्वेदी, आनंद मोहन, आफरीन खान, विजया, संजय वर्मा आ अनिल यादव के बड़की भूमिका बा.

ढेर दिन से एह फिल्म के इन्तजार होखत रहे आ जेही एकर फर्स्ट लुक देखले बा ओकर इहे कहना बा कि मिथिला टॉकिज के ‘डकैत’ दर्शकन पर राज करी.


(प्रशांत निशांत के रपट)

डकैत का साथ प्रतिभा पाण्डेय

सिनेमा का दुनिया में कब के का कर जाई एकरा बारे में कुछउ ना कहल जा सके. पिछला दिने सुपर स्टार रविकिशन चोर बनल रहले त अब चर्चित अभिनेत्री प्रतिभा पाण्डेय डकैत के साथ देत बाड़ी. जी हँ, ई खबर सोरहो आना साच बा. सुपर स्टार रवि किशन की नायिका बनके फिल्म “हमरा से बियाह करबऽ” से सिने दुनियां में गोड़ धरे वाली गायिका आ अभिनेत्री प्रतिभा पाण्डेय अबले अनेके सुपर हिट फिलिमन के नायिका बन चुकल बाड़ी. आ अब स्टार गायक अउर नायक पवन सिंह डकैत का साथे मुजरा करे वाली मुन्नी बाई के रूप में आवत बाड़ी. निर्माता मनोज कुमार चौधरी आ निर्देशक रवि भूषण के फिल्म “डकैत” में.

एह फिल्म में पवन सिंह डकैत बनल बाड़न आ प्रतिभा पाण्डेय फिल्म “उमराव जान” के रेखा वाला किरदार आत्मसात कइले पग-पग पर उनुका दुश्मनन के खात्मा खातिर साथ निभावत बाड़ी. एह फिल्म में खलनायक बनल मनोज टाईगर के आतंक खतम करे के उनुकर संकल्प कइसे पूरत बा से त फिलिम देखला का बादे पता चली.

बकौल प्रतिभा पाण्डेय अपना पाँच साल का फ़िल्मी सफ़र में ऊ कबो केहू से कम्पटीशन करे के ना सोचली ना ही नंबर वन के कुरसी के लालच कइली. हमेशा अपना किरदार के ईमानदारी से निभावे के कोशिश कइली जेहसे कि देखे वाला प्रतिभा पान्डेय के ना बलुक ओह किरदार के याद राखें. कहेली कि शायद एही चलते उनुका दर्शकन के प्यार आशीर्वाद हमेशा मिलत रहल बा. एकर सबूत पहिला फिल्म “हमरा से बियाह करबऽ” से लिहले “सजना सजाई द मांग”, “जय हो दुल्हे राजा”, “विधाता” अउर हिंदी फिल्म- “रामा रामा गजब होइ गवा” आ दोसर अनेके हिट फिलिमन का अलावा हालही में रिलीज भइल सुपर हिट फिल्म “केहू हमसे जीत न पाई” पक्का सबूत बावे.

फिल्म “डकैत” में प्रतिभा के मुजरा पुरनका जमाना के मीना कुमारी, रेखा, स्मिता पाटिल वगैरह के याद दिलाई आ ऊ संभावना सेठ, सीमा सिंह भा दोसर आयटम गर्ल के प्रस्तुति से फरका होखी.

प्रतिभा पाण्डेय के जल्दिये रिलीज होखे वाली फिलिम “कजरा मोहब्बत वाला” में उनुकर जलवा देखे के मिली जवना में देह नइखे देखावल कला देखावल गइल बा. “भोजपुरिया मजदूर” में बतौर मुख्य नायिका होखला का साथ ही अपने पर फिल्मावल तीन गो गीतो उहे गवले बाड़ी. एह फिल्म के नायक बाड़े मुकेश कुमार. एकरा अलावे प्रतिभा पाण्डेय के अउरी फिलिमन में “नंदू निकम्मा” , “सपना ससुराल के”, “गुमराह” आ “कुर्बानी” शामिल बा.


(अपना न्यूज के रपट से)

मनोज चौधरी आ पवन सिंह ले आवत बाड़े ‘डकैत’

‘गुंडईराज’ जइसन सुपरहिट फिल्म देबे वाला निर्माता मनोज चौधरी आ सुपरस्टार पवन सिंह के जोड़ी गुण्डई से बढ़ि के डकैती पर चढ़ आइल बा. ई जोड़ी अपना फिल्म ‘डकैत’ से एक बेर फेरु धमाल मचावे खातिर तइयार बा. मिथिला टॉकिज के बैनर तले बनत एह फिल्म में पवन डकैत के टाईटिल भूमिका में बाड़न. एह फिल्म में उनुकर शानदार एक्शन स्टंट देखे के मिली.

लेखक-निर्देशक रवि भूषण के एह फिल्म में पवन सिंह का साथे मोनालिसा, चांदनी चोपड़ा, प्रतिभा पाण्डेय, मनोज टाईगर, ब्रजेश त्रिपाठी , मनीष चतुर्वेदी, आनंद मोहन, अनिल यादव, विजया, सुबोध सेठ, आफरीन, सोम भूषण, संजय वर्मा के प्रमुख भूमिका बा. गीतकार विनय बिहारी, संगीतकार मधुकर आनंद, एक्शन मास्टर रियाज सुल्तान हउवें.

अबही फिल्म के पोस्ट प्रोडक्शन के काम मुंबई में जोर-शोर से कइल जात बा.


(प्रशांत निशांत के रपट से)