रफ्तार धइले अभिनेता दीपक दूबे

भोजपुरी परदा के नयका सितारा दीपक दूबे के कैरियर अब रफ्तार पकड़े लागल बा. ‘बृजवा’ से भोजपुरी परदा पर इंट्री मारे वाला दीपक दूबे के अबहो ले ‘तू ही मोर बालमा’ आ ‘मार देब गोली केहूं ना बोली’ जइसन सुपरहिट फिलिम रिलीज हो चुकल बाड़ी स.

एगो अउर फिलिम ‘बुलंदी’ अब रिलीज खातिर तइयार हो चुकल बा जवना में दीपक एक्शन भूमिका में बाड़न. फिलिम में इनकर नायिका बनल बाड़ी राखी त्रिपाठी.

दीपक जल्दिये निर्मात्री रीता प्रकाश आ निर्देशक पारसनाथ सिंह के फिलिम में नजर अइहे. अबही एह फिलिम के नाम नइखे धराइल बाकिर नायिका तनूश्री रहीहें.

एकरा अलावे दीपक दूबे जीतेश दूबे के फिल्म ‘मुन्नी बदनाम भईल सईया तोहरे खातिर’ में रानी चटर्जी का साथे नजर अइहे,


(प्रशांत निशांत के भेजल रपट)

दीपक दूबे के कैरियर बुलन्दी पर बा


“मुन्नीबाई नौटंकी वाली”, “बृजवा” आ “मार देब गोली केहू ना बोली” का बाद त दमदार अभिनेता दीपक दूबे के लाटरी लाग गइल बुझात बा. हालही में उनकर फिल्म “बुलन्दीः के शूटिंग पूरा भइल बा जवना के निर्देशन अशोक अत्री कइले बाड़न. एह फिल्म खातिर पिछला दिने खण्डाला में शूटिंग का दौरान दीपक दूबे के स्टंट सीन देख हर केहू दाँत तर अंगूरी दबा लिहल. आपन जान जोखिम में डाले वाला सीन करत दीपक दूबे बहुते उत्साहित रहलन. उनकर कहना बा कि निर्माता निखिल नंदा आ निर्देशक अशोक अत्री से एह फिल्म के कहानी सुनला का बाद जब ऊ सुनलन कि एह फिल्म के नायक उनुके बने के बा त चउँक गइल रहले. कहले कि “बुलन्दी” बहुते बढ़िया बनल बा.


(स्रोत – शशिकांत सिंह)

भोजपुरी सिनेमा के खिसियाइल नौजवान दीपक दूबे


दीपक दूबे बतौर नायक अबले चार गो फिल्म में काम कइले बाड़न आ चारो सुपर डुपर हिट रहल. “मुन्नी बाई नौटंकीवाली” त साल २००९ के सबले बड़ हिट फिल्म साबित भइल रहे. ओकरा बाद आइल उनुकर तीनो फिल्म, “बृजवा, तू ही मोर बालमा, मार देब गोली केहू ना बोली”, दीपक दूबे के सफलतम स्टारन का सूची में शामिल करा दिहलसि. आजु हर निर्माता अपना फिल्म में दीपक दूबे के लिहल चाहत बा काहे कि ऊ गजब के एक्शन करेले, कामेडी में बेजोड़ बाड़न, आ रोमांस में त उनुकर जबाबे नइखे. अब दीपक दूबे के चाकलेटी हीरो का तरह पेश करत फिल्म “बुलन्दी”जल्दिये रिलीज होखे वाला बा. एह फिल्म खातिर महीना भर के मशक्कत का बाद दीपक दूबे आपन देह सलमान खान का तरह बना लिहले. फिल्म में उनुकर एक्शन आ अभिनय लाजवाब उतरल बा. लागत बा दीपक दूबे भोजपुरी सिनेमा के खिसियाइल नौजवान वाली खाली जगहा पर काबिज होखे जा रहल बाड़न. उनका साथे काम करे खातिर भोजपुरी सिनेमा के कई गो नायिका तइयार बाड़ी.


(स्रोत – शशिकांत सिंह)

"मार देब गोली केहू ना बोली"

भोजपुरी सिनेमा का परदा पर “धर्मवीर”, “मुन्नी बाई नौटंकी वाली”, आ “बृजवा” जइसन सुपर डुपर हिट फिल्म देबे वाला निर्माता जितश दूबे के अगिला फिल्म “मार देब गोली केहू ना बोली” छठ का मौका पर १२ नवम्बर के रिलीज होखे जा रहल बा. तमंचा आ कारतूस का बल पर माफियन में दहशत पसरा देबे वाला खाकी वर्दी के दबंग के कहानी बा एह फिल्म में.

“मार देब गोली केहू ना बोली” का मुख्य भूमिका में भोजपुरी सिनेमा के सुपर स्टार रविकिशन बाड़े. फिल्म में ऊ भोजपुरिया चुलबुल पाण्डे बनल बाड़न. अपना बेल्ट आ नेमप्लेट से माफिया गिरोहन के नींद उड़ा देबे वाला रविकिशन के भूमिका सभका के चउँका के राख दी. उनकर नायिका बनल बाड़ी भोजपुरी सिनेमा के काजोल कहाये वाली नायिका गुंजन पंत. फिल्मि दुनिया के पंडितन के कहना बा कि गुंजन एह फिल्म से दर्शकन के दिल जीत ले जइहें.

फिल्म में डायनामिक एक्टर दीपको दूबे बाड़न जिनकर “बृजवा” में भूमिका के भरपूर सराहल गइल रहुवे. साथी कलाकारन में कल्पना शाह, बृजेश त्रिपाठी, आ किरण कुमार के नाम बावे. श्रीकृष्णा क्रियेशंस का बैनर में एह फिल्म के निर्मात्री हई पायल दूबे.

हर कोई एह फिल्म के परफारमेंस पर नजर गड़वले बा.


(स्रोत – शशिकान्त सिंह)