भोजपुरी सिनेमा के कमाई खातिर नया राह खोल दिहलें प्रकाश अवस्थी

भोजपुरी फिलिम निर्मातन के कमाई के एगो अउर राह मिल गइल बा छत्तीसगढ़ टेरेटरी से. भजन सम्राट अनूप जलोटा के कंपनी अपना भोजपुरी फिलिम ला छत्तीसगढ़ी सिनेमा के सुपर स्टार प्रकाश अवस्थी के भोजपुरी परदा पर उतारे जात बाड़ें जवना से अब भोजपुरी फिलिमन के छत्तीसगढ़ी संस्करण ओहिजा प्रदर्शित करे के नया राह खुल गइल बा.

छत्तीसगढ़ी सिनेमा में प्रकाश अवस्थी बीसन से बेसी फिलिमन में काम कर चुकल बाड़ें आ सगरी फिलिम सुपर डुपर हिट रहल बाड़ी सँ. उनकर सबले बड़हन फिलिम रहल ‘मया’ जवना के मिलल सफलता से प्रकाश अवस्थी छत्तीसगढ़ी सिनेमा के सुपर स्टार बन गइलें. ओकरा बाद आइल ‘टू ए रिक्शावाला’, ‘भावर’ आ ‘दो लफाड़ू’ छत्तीसगढ़ में खूब कमाई कइली सँ. एह यंग्री यंग मैन स्टार के नामे बहुत होला छत्तीसगढ़ में फिलिम के सफलता ला.

प्रकाश अवस्थी भोजपुरी फिल्म ‘चिंगारी’ में बतौर नायक बनके नजर अइहें. जइसे नेपाली सुपर स्टार विराज भट्ट के सिनेमा भोजपुरी में उतार के एगो नया प्रयोग कइल गइल रहे ओइसहीं अब प्रकाश अवस्थी के उतार के कइल जात बा. एहसे भोजपुरी सिनेमा के एगो नया बड़हन बाजार मिले के राह खुलल बा.


(शशिकांत सिंह, रंजन सिन्हा के रपट)

हम अबहीं ले सीखते बानी – प्रकाश अवस्थी

छत्तीसगढ़ी फिलिमन के बादशाहत लिहला क बाद भोजपुरी फिलिमन के रुख कइले प्रकाश अवस्थी के कहना ह कि अभिनय के दायरा बहुते बड़हन होला आ उनुका लगे अबही त पूरा आसमान खुलल बा. त फेर काहे ना आपन उड़ान लगातार बनवले राखसु, छत्तीसगढ़ी सिनेमा में तरह तरह क भूमिका कइला क बाद उनुकर भूख अउरी बढ़ गइल बा. कहलन कि भोजपुरी एगो बड़का कैनवास ह आ शायद एहिजा उनुकर अभिनय जिज्ञासा कुछ हद ले शांत हो सकी. कहलन कि आदमी त भर जिनिगी सीखते रहेला आ उहो अबहीं सीखे में लागल बाड़न,

हिन्दी सिनेमा का बारे में बतियावत प्रकाश अवस्थी कहलन कि ई ख्वाब त हर ऐक्टर देखेला बाकिर ओहिजा चहुपे क राह आसान नइखे. भोजपुरी हिन्दी के बाद हिन्दुस्तान में बड़का प्लेटफार्म ह. अगर एहिजा अपना के साबित कर देखवलें त आगे क राह खुद-ब-खुद बने लागी. भोजपुरी में बदलत प्रतिस्पर्धा पर कहलन कि ई त हमेशा चलत रही आ अपना के इंडस्ट्री में बनवले राखे खातिर लगातार मेहनत करत रहे के पड़ी.

बतौर हीरो अब ले प्रकाश अवस्थी पाँच गो फिलिम में काम कइले बाड़न. भोजपुरी में इनकर पहिला फिलिम रहल “चिंगारी” जवना में भोजपुरी क स्टार एक्ट्रेस रानी चटर्जी नायिका रहली. प्रकाश अवस्थी मोनालिसा संगे “मेहरारू बिन रतिया कइसे कटी”, मोनालिसा अउर कोमल ढिल्लो साथे “लागल बा प्यार के बुखार” में, “टीप टॉप लैला अंगुठा छाप छैला” में शिखा संगे नजर आवे वाला बाड़ें. “मेहरारू बिन रतिया” रिलीज खातिर तइयार बा.


(दिनेश यादव के रपट)

हम त अबहीं सिखते बानी – प्रकाश अवस्थी

छत्तीसगढ़ी फिलिमन में आपन बादशाहत देखा के भोजपुरी में आपन परचम लहरावे मुंबई आइल छतीसगढ़ी स्टार प्रकाश अवस्थी के कहना बा कि अभिनय के दायरा बहुते बड़हन होला आ उनका लगे त खुला आसमान बा त फेर काहे ना आपन उड़ान बरकरार राखसु! कहलन कि सिनेमा भोजपुरी के कैनवास छतीसगढ़ी फिलिमन से बहुते बड़हन बा एहिजा शायद उनका आपन अदाकारी देखावे के कोशिश कुछ हद ले तृप्त हो पाई. बाकिर प्रकाश अवस्थी के मानना बा कि इंसान ता उम्र कुछ ना कुछ सिखते रहेला आ ऊ त अबही सिखते बाड़े. कहलन कि खुद के साबित करे के मौका मिलत रहे त आदमी के संतुष्टी मिलेला.

हिन्दी सिनेमा के आपन लक्ष्य बतावत प्रकाश अवस्थी कहलन कि देश में हिन्दी का बाद भोजपुरिए सिनेमा के बाजार बा. अगर एहिजा अपना के साबित करा दिहलन त आगे क राह अपने आप खुले लागी. अबहीं ले दू गो भोजपुरी फिलिमन में काम कर चुकल प्रकाश के कहना बा कि बतौर मुख्य अभिनेता काम करे ला फिलिमन के चुने आ अपना अभिनय में विविधता बनावे रखला पर ध्यान दिहल जरूरी होला. भोजपुरी में इनकर पहिला फिल्म रहे ’चिंगारी’ जवना में इनकर नायिका रहली रानी चटर्जी. एकरा बाद आइल मोनालिसा क साथे ’मेहरारू बिन रतिया कइसे कटी’. अब मोनालिसा आ कोमल ढिल्लो का साथ ’लागल बा प्यार के बुखार’ में प्रकाश दुतरफा इश्क फरमावत लउकीहें, ’टीप टॉप लैला अंगुठा छाप छैला’ में शिखा के साथ रोमांस करीहें.


(दिनेश यादव)