भोजपुरी फिल्म इण्डस्ट्री न्यूज एक नजर में (19 जून 2011)

रिलीज आ रिलीज के बाद

  • बिहार में पचासवाँ दिन का तरफ बढ़त बा दुश्मनी. निर्माता दुर्गा प्रसाद, निर्देशक राजकुमार आर पाण्डेय. मुख्य कलाकार दिनेशलाल यादव, विराज भट्ट, पाखी हेगडे, रिंकू घोष वगैरह.
  • विनय आनन्द अभिनीत फिल्म त्रिनेत्र के बिहार में चउथका हफ्ता. निर्माता प्रतिमा डी मिश्रा. निर्देशक शाद कुमार. मुख्य अभिनेता विनय आनन्द, दिव्या द्विवेदी, पंकज केसरी वगैरह. कैमरामैन से निर्देशक बनल शाद आ इंजीनियर से एक्टर बनल धर्मेश खातिर ई बड़का उपलब्धि बा. धर्मेश के काम के सभत्तर सराहल जात बा. एही लोग के ना, एह फिल्म के मिलल सफलता एकरा के विनय आनन्द, पंकज केसरी, विजय लाल यादव, समर्थ चतुर्वेदी, सीमा पाण्डेय, दिव्या द्विवेदी, रुबी सिंह, पूजा सिंह सभका खातिर एह फिल्म के खास बना दिहले बा. फिल्म में अंडर वाटर फिल्मावल गइल आयटम डांस एकर एगो जानदार खासियत बा. सपना आ सीमा सिंह के डांस सभके नचा रहल बा.
  • होत बा जवानी अब जियान ए राजा जी बिहार में चउथका हफ्ता. निर्माता सेवेन स्टार इन्टरटेनमेंट. निर्देशक अरविंद चौबे. मुख्य कलाकार विराज भट्ट, छोटू छलिया, रुबी सिंह वगैरह.
  • साजन चले ससुराल के बिहार में धमाकेदार दुसरका हफ्ता. निर्माता आलोक कुमार. निर्देशक प्रेमांशु सिंह. मुख्य कलाकार खेसारीलाल यादव, स्मृति सिन्हा वगैरह. बतावल जात बा कि फिल्म के छपरा, सिवान, मीरगंज, मोतिहारी, डेहरी, सासाराम, आरा, बक्सर हर जगहा रिकार्ड कलेक्शन मिलल बा. निर्माता आलोक कुमार के ई लगातार सातवाँ सुपर हिट फिल्म हो गइल बा. एह सफलता पर आलोक कुमार के बधाई.
  • हम हईं धर्मयोद्धा मुंबई में शान से रिलीज भइल. निर्माता नारायण सिंह गुड्डू. निर्देशक स्वप्निल मयंकर. मुख्य कलाकार सुदीप पाण्डेय, अविनाथ शाही, प्रिया शर्मा वगैरह. फिल्म शान से चलत बिया. एह पारिवारिक फिल्म में दू भाईयन के कहानी बा. बड़का भाई छोटका के शहर भेज के बड़का आदमी बनावे खातिर का का करत बा आ जब छोटका भाई बड़का आदमी बन जात बा त बड़का भाई के अपना कर्म के का फल मिलत बा, इहे देखावल गइल बा एह फिल्म में. प्रिया शर्मा आ कोमल ढिल्लो एह फिल्म के नायिका हईं जा.

रिलीज से पहिले सेंसर

  • लड़ाई ल अँखिया ए लौण्डे राजा २४ जून के बिहार में रिलीज होखी. निर्माता निर्देशक रामाकान्त प्रसाद. मुख्य कलाकार पवन सिंह, विराज भट्ट, मोनालिसा वगैरह.
  • १३ जून के मुंबई का स्टार हाउस में रंगबाज के स्पेशल स्क्रीनिंग कइल गइल. निर्माता एएससी डिजिटल. निर्देशक शिवराम यादव. मुख्य कलाकार हैदर काजमी, रानी चटर्जी, सीमा सिंह वगैरह.
  • यादव पान भण्डार के तीन गो देश, भारत, मारीशस, आ त्रिनिडाड में एक साथ रिलीज कइल जाई. निर्माता जीतेश दुबे. निर्देशक अजय कुमार. मुख्य कलाकार मनोज तिवारी, गुंजन पंत, मनोज टाइगर वगैरह.

पोस्ट प्रोडक्शन

  • प्राण जाई पर वचन ना जाई के पहिला कापी बाहर निकलल. निर्माता – महिपाल दास गुप्ता. निर्देशक – के॰डी॰. मुख्य कलाकार – रविकिशन, राजीव दिनकर, अक्षरा सिंह वगैरह.
  • केहु हमसे जीत ना पाई के संपादन पूरा भइल. निर्माता डा॰वजाहत करीम आ डा॰सुरहित करीम. निर्देशक एम आई राज. मुख्य कलाकार रविकिशन, रिंकू घोष, सुशील सिंह वगैरह.
  • राम लखन में एगो अउरी गाना जोड़ल गइल. निर्माता राजकुमार दहिमा. निर्देशक इकबाल बख्श. मुख्य कलाकार सुशील सिंह, अनारा गुप्ता, सोम यादव वगैरह.
  • ज्वाला मण्डी – एक प्रेम कहानी में एगो अउरी गाना जोड़ल गइल. निर्माता राजू सिंह. निर्दशक जगदीश शर्मा. मुख्य कलाकार रविकिशन, रानी चटर्जी, अवधेश मिश्रा वगैरह.
  • मल्ल युद्ध के डबिंग पूरा हो गइल. निर्माता सुनील चौहान, निर्देशक चाँद मेहता. मुख्य कलाकार रविकिशन, रानी चटर्जी, शुभम तिवारी.
  • पियवा बड़ा सतावेला के पोस्ट प्रोडक्शन के काम चल रहल बा. निर्माता विनोद गुप्ता आ अंकित शाह, निर्देशक राजकुमार आर पाण्डेय. मुख्य कलाकार रविकिशन, विराज भट्ट, रानी चटर्जी, कृशा खंडेलवाल वगैरह. एह फिल्म में रविकिशन आ विराज भट्ट के जोड़ी पहिला बेर आ रहल बा. फिल्म के निर्माता विनोद कुमार भोजपुरी सिनेमा के पहिलका अवार्ड के संस्थापक हउवें. रविकिशन के पूरा उमेद बा कि उनुकर आ निर्देशक राजकुमार पाण्डे के ई फिल्म “देवरा बड़ा सतावेला” जइसन कमाल कर के देखाई.
  • निरहुआ मेल के संपादन पूरा हो गइल. निर्माता के एस साईं बाबा, निर्देशक जी सुबब्बाराव. मुख्य कलाकार दिनेशलाल यादव, पाखी हेगडे, मनोज टाइगर वगैरह.
  • सईंया ड्राइवर बीबी खलासी के मिक्सिंग हो रहल बा. निर्माता अनुज गुप्ता निर्देशक अंजनी कुमार. मुख्य कलाकार कुणाल सिंह, रिंकू घोष, अवधेश मिश्रा वगैरह.

शूटिंग

  • तुलसी बिन सुना अँगनवा के स्टार्ट टू फिनिश शूटिंग पूरा भइल. निर्माता आर॰बी शर्मा. निर्देशक शैलेश श्रीवास्तव. मुख्य कलाकार विनय आनन्द, मोनालिसा, एस एम जहीर वगैरह.

शूटिंग से पहिले

  • पिछला दिने निर्माता बी के सिन्हा के फिल्म तकदीर के संगीतमय मुहुर्त कुणाल सिंह का हाथे नारियल तूड़वा के करावल गइल. अशोक घवाहिल का संगीत पर उदित नारायण का आवाज में गाना रिकार्ड करावल गइल. फिल्म के निर्देशन कमर हाजीपुरी करीहे.
  • धक धक धड़के जियरा हमार के मुहुर्त करावल गइल. निर्माता रविशंकर ज्योति के कहना बा कि एह फिल्म में बिहार के मुख्यमंत्री नीतीशो कुमार लउकीहे. फिल्म के कहानी के नायक दू भाई के किरदार मोहन राठौर आ आलोक कुमार करीहे आ रानी चटर्जी के मुख्य भूमिका रही.
  • रिंकू घोष अंधा कानून खातिर नायिका साइन भइली. एह फिल्म में कादर खान पहिला बेर भोजपुरी में आइल बाड़े. नायक मनोज तिवारी. एह फिल्म में मशहूर नृत्य निर्देशक गणेश आचार्य पहिला बेर मनोज तिवारी के निर्देशित करीहें.
    रिंकू घोष आ मनोज तिवारी छह साल बाद एक साथ कवनो फिल्म मे काम करे जा रहल बा लोग. एहसे पहिले ई जोड़ी “दरोगा जी आई लव यू” आ “सौगंध” जइसन हिट फिल्म दे चुकल बा. सौगन्ध साल २००५ में रिलीज भइल रहे आ एह जोड़ी के खूबपसन्द कइल गइल रहे.
  • नंबर वन निर्देशक राजकुमार पाण्डेय नंबर वन खलनायक संजय पाण्डे के एक बेर फेर अपना फिल्म खातिर साइन कइले बाड़न. दुनु जने एह बेर नौंवा हाली एक साथ काम करे जा रहल बा.

चलते चलत इहो जान ली

  • हालही में जब वोडाफोन कंपनी अपना गाहकन के अपना चहेता स्टार से बितयावे खातिर एगो स्पेशल सेवा स्टार टॉक के शुरुआत कइलसि त मनोज तिवारी से बतियावे खातिर एके घंटा में दू लाख लोग फोन कर दिहल. अब अतना लोग से अतना कम समय में त नाहिये बतियावल जा सकत रहे से चुनिंदा बीस लोग के बात करे के मौका मिल पावल आ बाकी लोग के एह बात के आडियो सुन के संतोष करे के पड़ल. मनोज तिवारी से बतियावे वालन में हर उमिर के लोग रहे. बतावल जात बा कि पिछला बेर अइसने एगो कार्यक्रम में एगो दोसर सुपर स्टार से बतियावल चाहे वालन के संख्या तीने हजार तक चहुँप पावल रहे.
  • महेश पाण्डे के शादी २४ जून के बनारस में होखे जा रहल बा. छोटका परदा पर कहानी घर घर की, क्योंकि सास भी कभी बहू थी जइसन धारावाहिक लिख लिख के एगो नया ट्रेंड शुरु करे वाला महेश पाण्डे ३३२ मुंबई टू इण्डिया, गब्बर सिहं, हम बाल ब्रह्मचारी तू कन्या कुँआरी जइसन फिल्मन के निर्माण आ निर्देशनो कर चुकल बाड़े. महेश पाण्डे के शादी बनारस के कन्या मधु का साथे होखे जा रहल बा आ एह शादी में भोजपुरी सिनेमा के बहुते लोग मौजूद रहेवाला बा.
  • टी सीरीज से औलाद के म्यूजिक रिलीज भइल. निर्माता दिनेश लाल यादव निरहुआ, निर्देशक असलम शेख. मुख्य कलाकार निरहुआ, प्रवेशलाल, पाखी हेगडे, शुभी शर्मा वगैरह.
  • Rahul Khanपटना के रहेवाला राहुल खान भोजपुरी फिल्म में कलाकार का रुप में आपन कैरियर शुरु कइले बाड़े. बाबूजी के मन रहे कि बेटा इंजीनियर बने त ऊ बन गइले. बाकिर साथही एक्टिंग करे के सपनो जिन्दा रखले. रविकिशन अभिनीत फिल्म “युद्ध हथकड़ी” के शूटिंग में राहुल खान हालही में शामिल हो के लवटल बाड़न.

(स्रोत – प्रशान्त निशान्त, शशिकान्त सिंह, समरजीत, उदय भगत, व अन्य)

भोजपुरी फिल्म इण्डस्ट्री न्यूज : एक नजर में (9 जून 2011)

रिलीज आ रिलीज के बाद

  • साजन चले ससुराल के बिहार में धमाकेदार रिलीज. निर्माता आलोक कुमार. निर्देशक प्रेमांशु सिंह. मुख्य कलाकार खेसारीलाल यादव, स्मृति सिन्हा वगैरह.
  • हम हईं धर्मयोद्धा मुंबई में शान से रिलीज भइल. निर्माता नारायण सिंह गुड्डू. निर्देशक स्वप्निल मयंकर. मुख्य कलाकार सुदीप पाण्डेय, अविनाथ शाही, प्रिया शर्मा वगैरह.
  • प्राण जाई पर वचन ना जाई जल्दिये रिलीज होखे वाला बा. निर्माता – महिपाल दास गुप्ता. निर्देशक – के॰डी॰. मुख्य कलाकार – रविकिशन, राजीव दिनकर, अक्षरा सिंह वगैरह.
  • विनय आनन्द अभिनीत फिल्म त्रिनेत्र के बिहार में तिसरका सफल सप्ताह. निर्माता प्रतिमा डी मिश्रा. निर्देशक शाद कुमार. मुख्य अभिनेता विनय आनन्द, दिव्या द्विवेदी, पंकज केसरी वगैरह.
  • होत बा जवानी अब जियान ए राजा जी बिहार में तिसरका बम्पर हफ्ता. निर्माता सेवेन स्टार इन्टरटेनमेंट. निर्देशक अरविंद चौबे. मुख्य कलाकार विराज भट्ट, छोटू छलिया, रुबी सिंह वगैरह.
  • बिहार में दुश्मनी के छठवाँ सुपर डुपर हिट सप्ताह. निर्माता दुर्गा प्रसाद, निर्देशक राजकुमार आर पाण्डेय. मुख्य कलाकार दिनेशलाल यादव, विराज भट्ट, पाखी हेगडे, रिंकू घोष वगैरह.

रिलीज से पहिले सेंसर

  • प्यार जिन्दाबाद १२ अगस्त के रिलीज होखी. निर्माता श्रीकाशी. निर्देशक मोहन राव. मुख्य कलाकार पंकज केसरी, सेजल शर्मा, सारा वगैरह.
  • लागी ऐसी लगन के सेंसर बोर्ड से यू सर्टिफिकेट मिल गइल. निर्माता निर्देशक मुमताज हुसैन. मुख्य कलाकार राकेश पाण्डेय, मनोज वर्मा, मानसी पाण्डैय वगैरह.
  • रंगबाज सेंसर सर्टिफिकेट खातिर सेंसर बोर्ड में. निर्माता एएससी डिजिटल. निर्देशक शिवराम यादव. मुख्य कलाकार हैदर काजमी, रानी चटर्जी, सीमा सिंह वगैरह.
  • हमार देवदास सेंसर बोर्ड का लगे गइल. निर्माता उमेश सिंह. निर्देशक किरणकांत वर्मा. मुख्य कलाकार रविकिशन, मोनालिसा, अक्षरा सिंह.
  • लड़ाई ल अँखिया ए लौण्डे राजा सेंसर बोर्ड में चहुँपल. निर्माता निर्देशक रामाकान्त प्रसाद. मुख्य कलाकार पवन सिंह, विराज भट्ट, मोनालिसा वगैरह.

पोस्ट प्रोडक्शन

  • आग के बैकग्राउण्ड म्यूजिक मिक्स कर दिहल गइल. निर्माता . निर्देशक रामाशंकर. मुख्य कलाकार पंकज केसरी, ऋतिका शर्मा, जय यादव वगैरह.
  • एलान के संपादन के काम चलत बा. निर्माता जीतूभाई शाह. निर्देशक गोविन्द दुबे. मुख्य कलाकार मनोज तिवारी, राहुल राज, लवी रोहतगी वगैरह.
  • राम लखन के अंतिम शूटिंग शेड्यूल पूरा हो गइल. निर्माता राजकुमार दहिमा. निर्देशक इकबाल बख्श. मुख्य कलाकार सुशील सिंह, अनारा गुप्ता, सोम यादव वगैरह.
  • मल्ल युद्ध खातिर कुणाल सिंह आपन डबिंग करवले. निर्माता सुनील चौहाम, निर्देशक चाँद मेहता. मुख्य कलाकार रविकिशन, रानी चटर्जी, शुभम तिवारी.
  • अचल रहे सुहाग के संपादन के शुरू भइल. निर्माता सुमीत खान, विकास शर्मा. निर्देशक अभिलाष शर्मा. मुख्य कलाकार विक्रान्त सिंह, ऋचा सोनी, राखी त्रिपाठी वगैरह.
  • केहु हमसे जीत ना पाई के पोस्ट प्रोडक्शन काम शुरु भइल. निर्माता डा॰वजाहत करीम आ डा॰सुरहित करीम. निर्देशक एम आई राज. मुख्य कलाकार रविकिशन, रिंकू घोष, सुशील सिंह वगैरह.
  • फौलाद के डबिंग के काम चल रहल बा. निर्माता रजनीश गुप्ता. निर्देशक फिरोज खान. मुख्य कलाकार रविकिशन, प्रकाश जैस, अबधेश मिश्रा, किरन यादव वगैरह.
  • इंटरनेट पर जारी होखी यादव पान भण्डार के फर्स्ट लुक. निर्माता जीतेश दुबे. निर्देशक अजय कुमार. मुख्य कलाकार मनोज तिवारी, गुंजन पंत, मनोज टाइगर वगैरह.
  • नम्बर वन खलनायक संजय पाण्डेय आ नम्बर वन निर्देशक राजकुमार आर पाण्डेय नउवाँ हाली एक साथ.
  • एलान-ए-जंग के डबिंग के काम शुरु हो गइल बा. निर्माता राजीव गुप्ता. निर्देशक रवि सिन्हा. मुख्य कलाकार विनय आनन्द, विक्रांत सिंह, मोनालिसा वगैरह.
  • ज्वाला मण्डी – एक प्रेम कहानी के डबिंग शुरु भइल. निर्माता राजू सिंह. निर्दशक जगदीश शर्मा. मुख्य कलाकार रविकिशन, रानी चटर्जी, अवधेश मिश्रा वगैरह.
  • निरहुआ मेल के संपादन पूरा होखे जा रहल बा. निर्माता के एस साईं बाबा, निर्देशक जी सुबब्बाराव. मुख्य कलाकार दिनेशलाल यादव, पाखी हेगडे, मनोज टाइगर वगैरह.
  • सईंया ड्राइवर बीबी खलासी के डबिंग पूरा हो गइल. निर्माता अनुज गुप्ता निर्देशक अंजनी कुमार. मुख्य कलाकार कुणाल सिंह, रिंकू घोष, अवधेश मिश्रा वगैरह.
  • औलाद के पोस्ट प्रोडक्शन काम तेजी से चलत बा. निर्माता दिनेश लाल यादव निरहुआ, निर्देशक असलम शेख. मुख्य कलाकार निरहुआ, प्रवेशलाल, पाखी हेगडे, शुभी शर्मा वगैरह.
  • राजा के रानी से प्यार हो गइल के संपादन पुरा होखेवाला बा. निर्माता स्वप्नदीप. निर्देशक शैलेश पाण्डेय आ स्वप्न दीप. मुख्य कलाकार प्रवेशलाल, शुभी शर्मा, मेघा घोष, संजय पाण्डेय वगैरह.
  • हमार लभ स्टोरी के मिक्सिंग के काम पूरा भइल. निर्माता के अभिनव रेड्डी आ सारा शर्मा. निर्देशक जगदीश पाण्डेय. मुख्य कलाकार विक्रान्त आनन्द, सुरभि शुक्ला, एहसान कुरेशी वगैरह.
  • भईया हमार दयावान के डबिंग शुरू भइल. निर्माता हरीश गुप्ता. निर्देशक असलम शेख. मुख्य कलाकार मनोज तिवारी, पाखी हेगडे, रिंकू घोष, मोनालिसा वगैरह.
  • चुन्नु बाबू सिंगापुरी के संपादन पूरा रफ्तार में बा. निर्माता के एस टेंग. निर्देशक मनोज श्रीपति झा. मुख्य कलाकार बीरेन्द्र पाण्डेय, राखी त्रिपाठी, प्रिया शर्मा वगैरह.
  • ससुरो कबो दामाद रहल के संपादन के काम पूरा हो गइल. निर्माता शिवकुमार गुप्ता. निर्देशक शैलेश श्रीवास्तव. मुख्य कलाकार गुड्डू रंगीला, शक्ति कपूर, संगीता तिवारी वगैरह.
  • प्यार हो जाला के पहिला कापी निकले वाला बा. निर्माता सर्वेश सैनी. निर्देशक हीरा सरोज. मुख्य कलाकार सर्वेश सैनी, कोमल ढिल्लन, अवधेश मिश्रा वगैरह.
  • तोहरे बिना भी का जीना के पहिला कापी निकले वाला बा. निर्माता जय प्रकाश यादव. निर्देशक मनोज एस तोमर. मुख्य कलाकार कुणाल सिहं, संजय यादव, अनारा गुप्ता वगैरह.
  • सुगना के पोस्ट प्रोडक्शन काम शुरु भइल. निर्माता निर्देशक अजय ओझा. मुख्य कलाकार आदित्य ओझा, काजल, राजीव दिनकर, कल्पना शाह वगैरह.
  • बागी के के संपादन पुरा हो गइल. निर्माता एआरएस सरकार, शकील खान आ मंसूर आजमी. निर्देशक एआरएस सरकार. मुख्य कलाकार अजय दीक्षित, रानू पाण्डेय, विजय खरे वगैरह.

शूटिंग

  • तुलसी बिन सुना अँगनवा के स्टार्ट टू फिनिश शूटिंग पनवेल में शुरु. निर्माता आर॰बी शर्मा. निर्देशक शैलेश श्रीवास्तव. मुख्य कलाकार विनय आनन्द, मोनालिसा, एस एम जहीर वगैरह.
  • बजरंग में सीमा सिंह के एगो अउरी डांस जोड़ल गइल. निर्माता जीतेन्द्र प्रताप सिंह. निर्देशक नंद किशोर महतो. मुख्य कलाकार पवन सिंह, अक्षरा सिंह, संजय पाण्डेय वगैरह.
  • माई के लाल के शूटिंग जोर शोर से छपरा हाजीपुर, पटना वगैरह लोकेशन पर हो रहल बा. निर्माता मितेन्द्र सिंह आ द्वारिकानाथ जायसवाल. निर्देशक विमल राज. मुख्य कलाकार सुदीप पाण्डेय, मितेन्द्र सिंह, सुगंधा वगैरह.
  • राजीव दिनकर अभिनीत जइसन करनी वइसन भरनी के शूटिंग जल्दिये शुरु होखी. निर्माता पी॰ राकेश. निर्देशक करन लकी. मुख्य कलाकार आदित्य ओझा, काजल राघवानी, राजीव दिनकर वगैरह.

शूटिंग से पहिले

  • सनकी के गाना के रिकार्डिंग जोर शोर से चल रहल बा. निर्माता गुड्डु प्रसाद. निर्देशक धीरज कुमार. संगीतकार गुणवन्त सेन. मुख्य कलाकार योगेन्द्र तिवारी.

(स्रोत – प्रशान्त निशान्त, शशिकान्त सिंह, समरजीत, उदय भगत, व अन्य)

निरहुआ इन्टरटेनमेंट के औलाद आ निरहुआ ताँगावाला के लांचिंग


पिछला दिने दिनेश लाल यादव के फिल्म निर्माण कंपनी “निरहुआ इन्टरटेनमेंट” का तरफ से दी गो नया फिल्म के लांचिंग कइल गइल. एह फिल्मन के नाम बा “औलाद” आ “निरहुआ ताँगावाला”. दुनु फिल्मन में निरहुआ आ पाखी हेगडे के मुख्य जोड़ी बा आ साथ में हास्य कलाकार मनोज टाइगर, अवधेश मिश्रा, गोपाल राय आ एयाज खान दुनु फिल्म में बा लोग. प्रवेश लाल यादव आ शूभी शर्मा “औलाद” फिल्म के दोसरका खास जोड़ी रही लोग जवना के निर्देशन फारुक सिद्दिकी करीहें. साथ में संतोष श्रीवास्तवो एगो खास किरदार में रहीहें. “निरहुआ ताँगावाला” के निर्देशन असलम शेख का जिम्मे बा. दुनु फिल्म के शूटिंग जल्दिये आजमगढ़ में शुरु होखे जा रहल बा. “निरहुआ ताँगावाला” के कुछ शूटिंग मुंबई में भा हैदराबाद के रामोजी फिल्म सिटी में करावल जाई. निरहुआ के कहना बा कि ऊ फिल्म के निर्माण पइसा कमाये खातिर ना शूरु कइलें. उनुकर कोशिश बा कि भोजपुरी कला आ संस्कृति के सही तरीका से फिल्मन का माध्यम से प्रसारित कइल जाव.
(स्रोत – प्रशान्त-निशान्त)

बिहार में पवन सिंह के धूम मचल बा

बिहार भोजपुरी सिनेमा के सबसे मालदार टेरिटरी ह आ एह गढ़ में भोजपुरी सुपर स्टार पवन सिंह के धूम मचल बा. बाक्स आफिस पर पवन सिंह के सिक्का अइसन चलल बा कि बिहार के ८५ गो सिनेमाघरन में उनकर फिल्म जबरदस्त कलेक्शन करत जमल बाड़ी सँ.

हाल ही में पवन सिंह के दू गो फिल्म “देवर भाभी” आ “दरार” बिहार में रिलीज भइल बा आ दुनु के दर्शकन के भरपूर प्यार मिल रहल बा. “दरार” बिहार में चालीसो से बेसी सिनेमाघर में रिलीज कइल गइल आ ओवर हाउसफुल जा रहल बा. “देवर भाभी” ओ के बढ़िया प्रतिसाद मिल रहल बा.

“दरार” में पवन सिंह एगो मस्तमौला जवान का भूमिका में बाड़े आ भोजपुरी के हॉट अदाकारा मोनालिसा का साथे उनकर रोमांटिक सीन दर्शकन के खूबे ताली बिटोरत बा. “देवर भाभी” में पवन पाखी के जोड़ीओ दर्शकन के निमन लागत बा. पवन सिंह के अइसन सफलता भविष्य के कुछ संकेत दे रहल बा. एह साल पवन सिंह के तीन गो फिल्म “देवरा बड़ा सतावेला, सईंया का साथ मड़ईया में”, आ “भईया के साली ओढ़निया बाली” के एतिहासिक सफलता मिलल बा. पवन सिंह के दू गो अउरी फिल्म “कुरुक्षेत्र” आ “गुण्डईराज” आवे वाली बा.


(स्रोत – प्रशान्त निशान्त)

छठ पर रिलीज होखे जा रहल बा निरहुआ के लोफर

अबकी का छठ पर्व का पावन मौका पर भोजपुरी सिनेमा के बादशाह सितारा दिनेश लाल यादव निरहुआ के फिल्म “लोफर” रिलीज होखे जा रहल बा. मोनिका सिंह के निर्माण आ संजय सिन्हा के प्रस्तुति “लोफर” के निर्देशन रवि सिन्हा कइले बाड़े. रवि सिन्हा के निर्देशित “भोजपुरिया डॉन” आजुकाल्हु चारो ओर गरदा उड़वले बा.

“लोफर” में दिनेश लाल यादव के नायिका पाखी हेगडे आ सेक्सी बाला मोनालिसा बाड़ी. फिल्म के गीत पहिलही सुपर हिट हो चुकल बाड़े सँ. एह हाई वोल्टेज फिल्म के खलनायक अवधेश मिश्रा बाड़े. निरहुआ एह फिल्म में दू गो रोल में बाड़े आ एह चलते ऊ डबल उत्साहो में बाड़े.

निरहुआ के कहना बा कि “लोफर” में दर्शक भरपूर मसालेदार फिल्म देखीहें. निर्मात्री मोनिका सिन्हा के भरोसा बा कि दर्शकन के एह फिल्म से भरपूर मनोरंजन होखी.

त चलीं अबकी का छठ पर निरहुआ, पाखी, आ मोनालिसा के लोफरई देखल जाव.

स्रोत शशिकान्त सिंह

भोजपुरिया आकाश का आदित्य

भोजपुरिया आकाश पर आजु काल्हु एगो नया आदित्य, माने कि सूरज, चमके का तइयारी में बा … आ एह सूरज के नामो हऽ आदित्य ओझा. फिल्मी परिवेश में पलाइल बढल आदित्य वइसे त भारतीय प्रशासनिक सेवा का तइयारी में लागल बाड़न बाकिर अभिनय के शौक उनुका का वजह से ऊ भोजपुरी फिल्म “सुगना” में बतौर हीरो अभिनय करत बाड़े. “ब्राउन आईज” का बैनर तले निर्माता निर्देशक अजय ओझा के फिल्म “सुगना” में आदित्य दोहरी भूमिका में बाड़े. उनकर पिता अब ले दू गो हिंदी फिल्म बनवले बाड़न.

हिंदी का वजाय भोजपुरी फिल्म से आपन कैरियर के शुरुवात करे का बारे में आदित्य के कहना बा कि ऊ मूल रूप से बिहार के छपरा के रहे वाला हउवन आ उनकर दादी माँ भोजपुरीए बोलेली. एहीसे मुंबई में पलाइल बढला का बादो अपना कैरियर के शुरुवात भोजपुरीए फिल्म से करे के फैसला कइलन. एह फिल्म में आदित्य के एक्शन आ इमोशन दुनु दर्शकन के देखे के मिली.

सुगना में आदित्य के अलावा राजीव दिनकरो मुख्य भूमिका में बाड़े.


(स्रोत – उदय भगत)

बतिया साँच बा , बाकि कहे में लाज लागऽता

– चुनमुन पंडित

भोजपुरी सिनेमा उद्योग में आजु जेने देखीं भीड़ भरल हलचल नजर आ रहल बा. ए हलचल के भीड़ में बहुत तरह के लोग शामिल बाड़े. केहू सफलता के पास त केहू दौड़ में हिस्सा ले के दउड़ रहल बा. केहू गिर के फेर से उठऽता आ केहू सबके देखा देखी आ के कतार में खड़ा हो रहल बा. भले ई दोसर बाति बा कि ऊ जा कहाँ रहल बा, ओकरा इहो मालूम नइखे ?

खैर, कुल मिला के देखल जाय त ई देख के बहुत खुशी हो रहल बा कि आजु हमनी के भोजपुरी सिनेमा उद्योग सुन्दर आ सुचारु तरीका से स्थापित भइला के साथ साथ रोजे विकास के दू चार डेग आगा बढ़ रहल बा. एह उद्योग से जुड़ल भोजपुरिया आ गैर भोजपुरिया लोग के रोजी रोटी व्यवस्थित ढंग से चल रहल बा. आजु से एक दू दशक पहिले के बाति कइल जाव त तब मायानगरी के सिनेमाई लोग भोजपुरी सिनेमा के बड़ा हीन भाव से आ पराया नजर से देखत रहले. आजु हिन्दी सिनेमा के बड़हन बड़हन कलाकार, निर्देशक, निर्माता, आ तकनीशियन लोग भोजपुरी सिनेमा का ओर धवले आवत बा. कहे के मतलब ई बा कि अब हमनी के भोजपुरी सिनेमा उद्योग अपना बड़ भाई हिन्दी सिनेमा उद्योग से बरोबरी के लड़ाई लड़े जा रहल बा आ ई कवनो बड़बोलापन ना ह.

आजु के आपन ई विकासशील उद्योग देख के गौरव महसूस हो रहल बा. बाकिर का ई नाज आ गौरव हमेशा बनल रही ? हम जानऽतानी एह बाति से रउरा सभे हमरा प बहुत खिसिआइब, कि अब ना लऽ दाल बात में ऊँट के ठेहुन ! भला इहो कवनो बाति भइल ? त सुनी बतिया साँचे बा बाकिर कहे में लाज लागऽता कि आजु हमनी के जवन सफलता के जामा पहिर के घूम रहल बानी जा ऊ सोच का कतना करीब बा. देखल जाय त एक ओर जहाँ झूठ के सफलता का गुमान पर शामेजश्न मनावल जा रहल बा, ऊ सफलता ना हो के विफलता के फाटल दरार भरे के कोशिश भर बा.

आजु भोजपुरी फिल्म धड़ाधड़ दनादन बन त रहल बा, बाकिर सोचे वाली बाति ई बा कि आजु भौजपुरिया समाज के कतना लोग एकर देखेवाला बाड़न ? दस बीस साल पहिले जब भोजपुरी फिलिम बनत रहे त सिनेमा हॉल में गाँव जवार के हर तरह के लोग नजर आ जात रहे जवना में माई, बहिन बेटी, काकी, मामी, भजी लोग सबले आगा रहत रहुवे. आ आजु शायदे केहू अइसन होई जे अपना मेहरारू का संगे भोजपुरी सिनेमा देखे देखावे क बात सकार सके.

एक ओर जहाँ सिनेमा उद्योग से जुड़ल पत्र पत्रिका में कवनो फिलिम से जुड़ल झूठ सफलता के रंग बिरंगा पेज छप रहल बा, दोसरा ओर ओहि फिल्म के वाहवाह करे वाला केहू समाज में खोजलो नइखे भेंटात. कहाँ गइल ऊ घर परिवार समाज के यथार्थता के चित्रण करे वाली कला ? कहाँ गइल ऊ भोजपुरिया माटी के संस्कार सुगन्ध ? कहाँ गइल ऊ आपन लोक परम्परा जवना में पूर्वज आपन आशीर्वाद, संस्कृति पिरो के हिन्दुस्तान के असली संस्कार समाहित कइले रहन ? का आजु के आपन भोजपुरिया समाज मादकता, उदंडता, अश्लिलता, ओछापन, आ दुअर्थी संवाद के भण्डार बन के रह गइल बा ?

बाति बहुते बा, बाकिर कहे से पहिले बहुत हालि सोचीले कि के पढ़ऽता ? काहे हमहू एह उद्योग के रोटी खा रहल बानी ? हँ हमरा रोटी में मक्खन नइखे ई अलग बाति बा. खैर अबही अतने कहब कि भोजपुरी सिनेमा के लमहर बजट पत्र के ना बलुक निमन स्तरीय कहानी, पटकथा, गीत, संगीत का साथे भोजपुरिया रंग गंध वाली सिनेमा बनवला के जरुरत बा जवना से आपन असली सफलता आ बढ़न्ती के जयघोष देश विदेश ले सुनल सुनावल जा सके. कवनो संवाद ना… कवनो विवाद ना….

राउर
चुनमुन पंडित


लेखक भोजपुरी सिनेमा के प्रतिष्ठित निर्देशक आ कथाकार हईं.
संपर्क सूत्र : cpandit1999@gmail.com

अंधेर नगरी, चौपट राजा

– डा॰ सुभाष राय

ई त सभे जानेला कि
सूरुज उग्गी त सबेर होई
इहो मालूम बा सबके कि
चान राति क उगेला
बहुते नीक लागेला
फूल फुलाला त महकेला

बाकिर ई केहू के ना पता
कि महंगाई काहें बढ़ेले
खून-पसीना बहा के भी
किसान काहें सबकर मुंह
तकले के मजबूर बानऽ
काहे दूसरन क जान ले के
लुटेरन क फउज मस्त बा
सुघर-सुघर बचियन के
मइया काहें जनमते फेंकि आवेलीं
बगइचा में चुपचाप
काहें भुखल रहिं जालन स
लइका गरीब लोगन क
काहें मजूर बाप क बेटवा
मजूरे बने के शरापल बा

अदिमी के आंखि रहते काहें
सगरो जग हरियर लउकेला
काहें ई अंधेरनगरी भइल बा
काहें ई चौपट राजा गद्दी प
खूब ठाट से मुस्कियात बा
जहाजि उड़त बा, लाल बत्ती
दौरति बा चउतरफा दिन-रात
कवनो काम रुकत ना बा
तेल क दाम बढ़त बा
दाल-चाउर, रोटी घटति बा
उनक प्रवचन चलत बा
सब कुसल बा, नीक बा
जनता के कवनो दुख ना बा
रामराज अवले चाहत बा

केहू बा करेजा वाला
बीर-बांकुरा, जे रोके इनके
जे चढ़ावे इनके मुंह प जाबी
जे इनके मंच से घसीटि ले
जे इनके मुंह प
इनके झूठ जोर से दै मारे
हां, बा का केहू…?


डा. सुभाष राय के दूसर कविता


ए-१५८, एम आई जी, शास्त्रीपुरम, बोदला रोड, आगरा
फ़ोन-०९९२७५००५४१
http://www.bat-bebat.blogspot.com
http://www.nukkadh.blogspot.com
http://bat-bebat.mywebdunia.com/

प्रतिभा सिंह के मिली भिखारी ठाकुर सम्मान

भोजपुरी के मशहूर गायिका आ जानल मानल अभिनेत्री प्रतिभा सिंह के आजु २७ मार्च के आरा में भिखारी ठाकुर सम्मान-2010 से सम्मानित कइल जाई. उनका के ई सम्मान भिखारी ठाकुर सामाजिक शोध संस्थान, भोजपुर, का तरफ से दिहल जाई.
संस्थान के अध्यक्ष नरेन्द्र सिंह बतवले बाड़न कि 27 मार्च के साँझ आरा में एगो भव्य संगीत समारोह आयोजित हो रहल बा आ ओहिमें ई सम्मान प्रतिभा जी के दिहल जाई. कोलकाता में रहे वाली गायिका प्रतिभा सिंह पिछला दसियन साल से भोजपुरी गायकी में आपन खास जगह बनावे में कामयाब रहल बाड़ी. उनकर एक दर्जन से बेसी कैसेट आ सीडी एचएमवी, सारेगामा, प्राइम, न्यू विक्टोरिया अउर स्काई का तरफ से जारी कइल गइल बा. हाल ही में ऊ अभिनय आ पार्श्व गायन का दुनिया में डेग धइले बाड़ी आ ‘भाई होखे त भरत नियन’, ‘बहिना तोहरे खातिर’ वगैरह फिल्मन में काम कर चुकल बाड़ी. कुछ अउरियो फिल्मन में ऊ गायन आ अभिनय कर रहल बाड़ी जवना में ‘आई हो दादा’ आ ‘माटी मांगे खून’ खास बाड़ी सँ.
प्रतिभा बलिया जिले के रोहुआं-तिवारी गांव के  रहे वाली हई आ शास्त्रीय संगीत के विधिवत तालीम लिहले बाड़ी. देश भर में सैकड़ों स्टेज शो कर चुकल प्रतिभा के एकरा पहिले आकांक्षा संस्कृति सम्मान मिल चुकल बा. उनकर कार्यक्रम आ इंटरव्यू ईटीवी, महुआ, ताजा़ टीवी, अहिंसा, दूरदर्शन वगैरह पर आवत रहेला.

मनोज गुंजन के यादव पान भण्डार

Gunjan Pant and Manoj Tiwari

भोजपुरी सिनेमा के मेगा स्टार मनोज तिवारी खातिर यादव पान भण्डार एगो खास फिल्म बा काहे कि एहमें ऊ पहिला बेर कवनो पान वाला के किरदार में बाड़े. उनकर नायिका बाड़ी गुंजन पंत. फिल्म के निर्माण पायल दुबे कर रहल बाड़ी आ प्रस्तोता रहीहें जितेश दूबे. अजय कुमार का निर्देशन में बने जा रहल एह फिल्म में देखावल जाई कि कइसे एगो पनवाड़ी अपना जिनिगी के झंझावात झेलत बा.

मनोज तिवारी आ गुंजन पंत के जोड़ी पहिला बेर बनल बा कवनो फिल्म में. कहली कि मनोज तिवारी जी का साथे काम कर के बहुते कुछ सीखे के मौका मिलल. एक से बढ़ के एक वास्तविक आ खूबसूरत लोकेशन पर फिल्म शूट हो रहल बा. जितेश दूबे एह फिल्म में मनोज तिवारी के अभिनय कौशल से बहुते खुश बाड़े. जितेश दूबे एहसे पहिले भोजपुरी के सुपर डुपर हिट फिल्मधर्मवीर, मुन्नीबाई नौटंकीवाली आ बृजवा बना चुकल बाड़े. भोजपुरी सुपर स्टार रविकिशन, गुंजन पंत आ दीपक दूबे का साथ उनकर फिल्म मार देब गोली केहू ना बोली के शूटिंग पूरा हो गइल बा.

यादव पान भंडार में मनोज आ गुंजन का साथे दीपक दूबे, बृजेश त्रिपाठी, आ सीमा सिहं के बड़हन भूमिका बा. गीत श्याम देहाती के, संगीत मधुकर आनन्द के, आ एक्शन डायरेक्शन शकील शेख के बा.


स्रोत : शशिकान्त सिहं, रंजन सिन्हा