राज ठाकरे के जवाब में मराठी फिल्म के शूटिंग शुरू कइलन रवि किशन

भोजपुरी के सदाबहार अभिनेता रवि किशन पिछला अतवार का दिने अपना मराठी फिल्म “मध्यवर्ग” के शूटिंग मुंबई के एसजे स्टुडियो में शुरू कइलन. कहेवाला एकरा के राज ठाकरे के बिहार विरोधी बयान के मुँहतोड़ जवाब कहत बाड़ें बाकिर रवि किशन के कहना बा कि एह बात के राज ठाकरे के बयान पर पलटवार बतावल गलत होखी काहे कि कवनो कलाकार जाति धर्म भा प्रान्त के भेद ना माने.

मराठी फिल्म “मध्यवर्ग” में रविकिशन नायक बनल बाड़ें आ ई पहिला मौका बा जब कवनो भोजपुरी अभिनेता मराठी फिलिम के नायक बनल बा. फिल्म के निर्देशक हैरी फर्नांडीज कहलन कि रवि किशन फर्राटा से मराठी बोलेलें आ उनकर टोन एकदम मराठीए मानुष जस लागेला. दोसरे एह किरदार लायक सबले फिट रवि किशन रहलन एहसे ऊ रविकिशन से संपर्क कइलन त रवि किशन तुरते तइयार हो गइलन कि नेतवन के आपन काम करे दिहल जाव आ हमनी का आपन काम करत रहीं जा.

रविकिशन बतवलन कि फिलिम त ऊ बहुत पहिलही साइन कइले रहलन बाकिर अपना व्यस्तता का चलते सितम्बर के तारीख दिहले रहलन जब अब अपना पहिले से तय तारीखे पर शुरू भइल बा. कहलन कि यूपी बिहार के लोग के मराठीओ भाषा से लगाव बा. दोसरे ऊ खुद मुंबई में अपना गृहप्रांत उत्तर प्रदेश से अधिका रहल बाड़ें.


(स्रोत – उदय भगत के रपट)

Advertisements

मराठी फिल्म में सीमा के लावणी

लावणी महाराष्ट्र के लोक नृत्य विधा ह जवना के संगीतमय बातचीतो कहल जा सकेला. ई बहुते कठिन विधा ह बाकिर जब भोजपुरी के आयटम डांसर सीमा सिंह एगो मराठी फिल्म खातिर लावणी कइली त देखे वाला माने के तइयार ना रहले कि ऊ ई पहिला बेर करत बाड़ी. सीमा सिंह पहिलका आयटम डांसर बाड़ी जे लावणी कइले बाड़ी. ओह मराठी फिल्म में सीमा के किरदारो बा मैनाबाई का रुप में. सीमा सिंह बतवली कि लावणी सीखे खातिर ऊ बहुते मेहनत कइली आ मैना देवी का बारे में जानकारी इकट्ठा कर के पढ़े में सारी रात जागे के पड़ गइल रहे. ओकरा बादे ऊ मैना देवी के किरदार आ लावणी करे में सफल भइली. सीमा सिंह भोजपुरी में लगातार हिट पर हिट फिल्म देबे खातिर जानल जाली आ अचरज ना होखि जब मराठीओ फिल्म में ऊ हिट फिल्मन
के कतार लगा देस. हाल ही में सीमा सिंह नया साल का मौका पर देखावल जा रहल महुआ टीवी के कार्यक्रम खातिर लाइव परफारमेंस दिहली जवना के देख के दर्शक बाग बाग हो गइलन.


(स्रोत – शशिकांत सिंह)

मराठी सिनेमा में भोजपुरिया धमक

कला आ कलाकार कवनो भाषावाद भा प्रांतवाद से अलगा होले. एह साँच के पुख्ता कइले बाड़न भोजपुरी फिल्मन के सदाबहार सुपर स्टार रवि किशन, जे जल्दिये निर्माता शंकर निकालजे के मराठी फिल्म “अशी ही हेराफेरी” में नजर आवे जा रहल बाड़े.

फिल्म में रवि किशन का साथे रहीहें कविता कौशिक. रवि किशन अबे हाल ही में एगो साक्षात्कार में इच्छा जतवले रहलें कि मौका मिलल तो ऊ मराठीओ फिल्म करल चहीहें. शंकर निकालजे अपना एह फिल्म से रवि किशन के मनसा पूरा दिहलें.

“प्राप्ति फिल्म्स” का बैनर में बने वाली एह फिल्म में मराठी के जानल मानल कलाकार संजय नार्वेकर आ विजय चव्हाण मुख्य भूमिका में बाड़े. फिल्म के शूटिंग जल्दिये खंडाला आ लोनावाला में कइल जाई. फिल्म के निर्देशक राजेंद्र बढे हउवें. शंकर निकाल्जे फिल्म के कहानी बतावत कहले कि रवि किशन हीरो बने, कविता कौशिक हिरोइन बने, आ संजय नार्वेकर निर्देशक बने के सपना लेके मुंबई आवत बा लोग. एह तीनो के मण्डली में हास्य के रंग कइसे घोरात बा एही विषय के ताना बाना बुनल गइल बा एह फिल्म में. निकाल्जे बतवलें कि कुछ नया प्रयोग करे का मकसदे से फिल्म में मुख्य भूमिका खातिर रवि किशन के लिहल गइल बा. रवि किशन निकहा मराठी बोल लेलें एहसे कवनो समस्या नइखे पैदा होखे के.

बतावे लायक बा कि भोजपुरी फिल्मन में वर्षा उर्षगाँवकर, मोहन जोशी, अशोक सर्राफ, सदाशिव अमरापूरकर वगैरल मँझल कलाकार काम कर चुकल बाड़े बाकिर ई पहिला मौका होखी जब भोजपुरी के कवनो सितारा मराठी फिल्म में मुख्य भूमिका करी.


(स्रोत – उदय भगत)