‘रंगबाज’ के होम वीडियो जारी

भोजपुरी फिलिमन के असली रंगबाज हैदर काजमी अपना फिल्म ‘रंगबाज’के होम वीडियो क डीवीडी पिछला दिने अपना कंपनी नरजिस म्यूजिक से जारी कइलन त लोग एकरा के हाथों हाथ खरीद लिहल. एह डीवीडी से बेहतर क्वालिटी वाली फिल्म ‘रंगबाज’ देखे के आनंद अउरी बढ़ जाई जब लोग अपना घर में बइठल एकरा के देखी.


(शशिकांत सिंह रंजन सिन्हा के रपट)

उत्तर प्रदेश में रिलीज भइल हैदर काज़मी के रंगबाज

मुम्बई आ बिहार में डंका पीट चुकल हैदर काजमी के फिल्म ‘रंगबाज’ 18 नवंबर से उत्तर प्रदेश आ दिल्ली में रिलीज होखी, एह टेरिटरी में पचास गो सिनेमाघर मे एकेसाथ रिलीज कइल गइल बा. एह फिल्म के प्रोमोट करे खातिर खुद हैदर काजमी एक हफ्ता उत्तर प्रदेश में रहीहें.

बिहार आ मुंबई में फिल्म के सफलता काबिले तारीफ रहल आ भोजपुरी सिनेमा के हैदरा काजमी जइसन दमदार स्टार मिल गइल. रंगबाज इहो साबित कर दिहलसि कि अगर बढ़िया से प्रचार कइल जाव त नयको कलाकार वाली फिल्म सुपर हिट हो सकेले बशर्ते फिल्म बढ़िया बनल होखे.

रंगबाज में कृष्णा यादव दरोगा बनल हैदर काजमी के एक एक डायलाग पर थपड़ी बाजत बा. नायिका बनल बाड़ी रानी चटर्जी आ डांसिंग क्वीन सीमा सिंह आयटम नंबर कइले बाड़ी जवन दर्शकन के झूमा के राख देता.


(स्रोत – शशिकान्त सिंह, रंजन सिन्हा)

मुंबईओ में रंगबाज आपन कमाल देखवलसि

हालही में जब भोजपुरी फिलिम “रंगबाज” मुंबई में रिलीज भइल त देखे खातिर दर्शकन के बड़हन भीड़ उमड़ि पड़ल. नवरंग थियेटर में दर्शकन से रुबरु होत फिल्म के नायक हैदर काजमी दर्शकन के ताली खूब बटोरलन. साथ में निर्देशक शिवराम यादव आ नायिका रानी चटर्जीओ मौजूद रहली. रानी चटर्जी पूछली कि फिलिम कइसन लागल त दर्शकन के कहना रहे कि हैदर काजमीए यूपी आ बिहार के असल रंगबाज बाड़े. एह मौका पर रानी चटर्जी फिल्म के गाना गा के सुनवली आ ठुमको लगवली. शिवरामो यादव दर्शकन से भोजपुरी में बतियवले.

कुछ अइसने हाल रहल भिवंडी के पायल सिनेमा के जहाँ अपना चहेता कलाकारन के देखे खातिर हॉल खचाखच भर गइल रहुवे. “रंगबाज” फिल्म एगो बाति त साबित कर देखवलसि कि अगर भोजपुरी फिलिमन के प्रचार ढंग से कइल जाव त नया कलाकारनो वाला फिलिम सफल हो सकेला. फिल्म में इंसपेक्ट कृष्णा यादव के एक एक डायलाग पर ताली बाजत बा, सीमा सिंह के आयटम लोग के पसन्द आवत बा आ अनिल यादव आ बृजेश त्रिपाठी के खलनायकी दिल पर चोट करत बा.

फिल्म के सफलता पर सगरी इंडस्ट्री हैदर काजमी के बधाई दिहले बिया आ कहल जात बा कि भोजपुरी सिनेमा के एगो अउरी सुपर स्टार मिल गइल बा हैदर काजमी में.


(स्रोत : शशिकान्त सिंह)

डंका का चोट पर ‘रंगबाजी’ देखवले हैदर काजमी

‘मुगल-ए-आजम’ के बाद हाथी पर चढ़के सिनेमाघर चहुँपल ‘रंगबाज’ के प्रिंट.

हैदर काजमी के रंगबाजी बिहार में चलल आ खूब चलल. बिहार में शुक २९ जुलाई के रिलीज फिल्म ‘रंगबाज’ के सफलता के आलम ई रहल कि ढेर दिन बाद कवनो फिल्म देखावत सगरी थियेटर में हाउसफुल के बोर्ड लटकल मिलल. पटना में रंगबाज के नायक हैदर काजमी के प्रशंसक उनुका के हाथी पर बइठा के आ फूल माला से लादके थियेटर ले चहुँपवले, आ फिल्म ‘मुगल-ए-आजम’ का बाद पहिला बेर अइसन भइल कि कवनो फिल्म के प्रिंट हाथी का पीठ पर थियेटर चहुँपल.

‘रंगबाज’ फिल्म देखे खातिर हर जगहा सबेरही से लमहर लाइन लागल रहुवे आ जसही टिकट काउंटर खुलल आधा घंटा का भितरे सगरी टिकट बिका गइल. ‘रंगबाज’ के नायक, आ भोजपुरी फिलिमन के मिथुन चक्रवर्ती, हैदर काजमी खातिर सुरक्षा के खास तगड़ा इंतज़ाम कइल गइल रहे बाकिर हैदर काजमी सुरक्षा घेरा तूड़ के दर्शकन से हाथ मिलवले. मानल जात बा कि भोजपुरी सिनेमा के इतिहास में मनोज तिवारी का बाद पहिला बेर कवनो कलाकार अपना प्रशंसक से मिले खातिर सुरक्षा घेरा तूड़ले बा.

हाल का दिन में सबले चर्चित भोजपुरी फिल्म ‘रंगबाज’ 29 जुलाई के मुंबई आ बिहार के सौ गो से बेसी सिनेमाघर में एके साथ प्रदर्शित भइल. एह फिल्म के आयटम नम्बर ‘लच लचके तोहरी कमरिया, जोबना मारे उफान…’ पहिलही बिहार में सुपर डुपर हिट हो चुकल बा आ अब फिल्म के शानदार सफलता से हैदर काजमी का रूप में भोजपुरी सिनेमा के एगो अउरी सुपर डुपर स्टार मिल गइल बा.

एह फिल्म के निर्देशन शिवराम यादव कइले बाड़न.


(स्रोत – शशिकान्त सिंह, रंजन सिन्हा)

फिलिम में काम करे के मन बा त रंगबाज देखऽ

अब सिनेमाहाल में से सिनेमा के कलाकार खोजल जइहे. पहिले नयका कलाकारन के खोज आडिशन से होत रहल बाकिर अब रंगबाज फिल्म से एगो नया शुरुआत कइल जा रहल बा. फिल्मकार हैदर काजमी ई तरीका निकलले बाड़न. अंडरवर्ल्ड पर बनल फिलिम पथ आ अवार्ड जीतल फिलिम कजरी के निर्माता हैदर काजमी के नयका फिलिम रंगबाज २९ जुलाई से बिहार में रिलीज होखे जा रहल बा. अपना अगिला फिलिम कालिया खातिर कलाकार खोजे बदे हैदर काजनी तय कइले बाड़न कि ई तलाश रंगबाज देखावे वाला सिनेमाघरन में कइल जाई. दर्शकन से रंगबाज का बारे में पाँच गो सवाल कइल जाई जवना के सही जबाब देबे वाला के स्क्रीन टेस्ट मुफ्त करावल जाई. सवाल के जबाब देत घरी दर्शक का लगे फिलिम के टिकिट मौजूद रहे के चाहीं. स्क्रीन टेस्ट मे सफल रहे वाला प्रतिभागियन के तब पटना, बनारस, गोरखपुर, भा दिल्ली में आडिशन लिहल जाई आ अंतिम रुप से सफल रहल प्रतिभागी के कालिया में काम करे के मौका मिल जाई.

शिवराम यादव निर्देशित ‘रंगबाज’ में हैदर काजमी नायक का भूमिका में आ रानी चटर्जी नायिका के भूमिका में बाड़ी. बिहार के 50 से बेसी सिनेमाघर में एक साथ प्रदर्शित हो रहल ‘रंगबाज’ मौजूदा समय के सबले चर्चित भोजपुरी फिल्म ह जवना के सगरी बड़का निर्माता निर्देशक सराहत बाड़े. ई फिल्म भोजपुरी सिनेमा के प्रचार के तरीके बदल दिहले बा आ देखा दिहले बा कि भोजपुरीओ सिनेमा बड़की हिंदी फिलिमन के प्रचार का मामिला में टक्कर दे सकेला.


(स्रोत : शशिकान्त सिंह)

पहिला बेर होखे जा रहल बा भोजपुरी फिलिम के प्रीमियर जहानाबाद में

‘रंगबाज’ हैदर काजमी के रंगबाजी के जबाब नइखे. इनकर पहिलका भोजपुरी फिल्म रंगबाज के प्रीमियर मुंबई आ पटना का साथे-साथ नक्सल प्रभावित जहानोबाद में करवावल जाई जवना में भोजपुरी वर्ल्ड के तमाम बड़का सिनेमाई अउर राजनैतिक हस्ती शिरकत करीहे.

29 जुलाई के मुंबई अउर बिहार के एक सौ से बेसी सिनेमाघरन में रंगबाज के रिलीज कइल जाई. रंगबाज के प्रीमियर जहानाबाद में करवावे के सवाल पर हैदर काजमी के कहना बा कि ऊ खुदे जहानाबाद के हउवन आ चाहत बाड़न कि लोगन का नजर में जहानाबाद के तस्वीर बदले. जे लोग जहानाबाद के नामो से डेरात रहे ऊ सोचे आ एहिजा आ के देखे कि जहानाबाद वाकई में कतना खूबसूरत बा.

हाल का दिनन में भोजपुरी फिल्मन में सबले बेसी चरचा में आइल ‘रंगबाज’ के गाना ‘लच लचके तोहरी कमरिया, जोबना मारे उफान…’ पहिलही से बिहार में सुपर डुपर हिट हो चुकल बा. शिवराम यादव निर्देशित एह फिल्म के नायक हउवे ठेठ अंदाज के रंगबाज हैदर काजमी आ नायिका बाड़ी रानी चटर्जी. फिल्म में कुल नौ गो गीत बा जवना में सीमा सिंह आ तसलीमा शेख पर फिल्मावल दू गो आयटम नंबरो शामिल बा. फिल्म के मुख्य कलाकार बाड़े -हैदर काजमी, रानी चटर्जी, सीमा सिंह, तस्नीमा शेख, माया यादव, बिपिन सिंह, सी.पी. भट्ट, नीलिमा सिंह, उमा शंकर मिश्रा, अमित मिश्रा, सोनिया मिश्रा, सुप्रिया गोयल, मास्टर समद, सैयद गुलरोज, बाल गोविंद, राम मिश्रा, फूल सिंह, ब्रिजेश त्रिपाठी, अनिल यादव आ विजयलाल यादव.


(स्रोत – शशिकान्त सिंह, रंजन सिन्हा)

इन्टरनेट पर रंगबाज के प्रोमो प्रीमियर

भोजपुरी फिल्म “रंगबाज” कई गो नया परम्परा शुरु करे खातिर जानल जाई. थ्रीजी पर पहिला बेर एह फिल्म के प्रोमोशनल वीडियो जारी भइल रहे जवना के फिल्म के निर्माता कंपनी ए एस सी डिजिटल प्रा॰लि॰ खुदे जारी कइले रहल एयरटेल मोबाइल सेवा पर. आ अब एह फिल्म के प्रोमो इन्टरनेट पर डाल के एगो अउरी नया शुरुआत होखे जा रहल बा. फिल्म के प्रोमोशनल वीडियो आ इन्टरनेट प्रोमो से भोजपुरी सिनेमा के कमाई के एगो अउरी रास्ता मिलल बा जवना पर बाकियो निर्माता जल्दिये चलल शुरु कर दीहें.

“रंगबाज” के निर्देशन शिवराम यादव के बा आ मुख्य किरदार में हैदर काजमी आ रानी चटर्जी बाड़े लोग. देखल जाव रंगबाज के प्रोमो इन्टरनेट पर का कमाल कर देखावत बा.


(स्रोत – शशिकान्त सिंह)

रानी चटर्जी के रंगबाजी देख फाइटर भाग खड़ा भइले

फिल्म “रंगबाज” का शूटिंग का दौरान एगो सीन में रानी चटर्जी के हाथ में एगो घइला दिहल गइल रहे जवना के एगो फाइटर का कपार पर फोड़े के रहल. अब रानी का हाथ में घइला देखते फाइटर भाग पराइल. शूटिंग गुजरात के राजपिपला में होत रहे. सीन रहे कि गुण्डा के सरदार रानी चटर्जी से जबरिया बिआह करत बा आ नायक हैदर काजमी आ के रानी के छोड़ावत बाड़े. ओही फाइट का दौरान रानी एगो मटका ले के एगो गुण्डा के कपारे पर दे मारत बाड़ी आ मटका फूट जात बा. एह सीन के करे से दर्जन भर फाइटर मना कर दिहले. आखिर में एगो फाइटर तइयार भइल त एह शर्त पर रिहर्सल ना होखी आ रिटेक ना होई. आ साचहू सीन एके बार में ओके हो गइल. फिल्म के निर्देशन शिवराम यादव करत बाड़े.


(स्रोत – शशिकान्त सिंह, रंजन सिन्हा)

अपना शर्त पर जिये वाला रफ टफ आदमी के कहानी बा रंगबाज में

जहानाबाद के मूल निवासी हैदर काजमी कई गो हिन्दी फिल्म आ धारावाहिकन में काम कर चुकला का बाद पहिला बेर भोजपुरी फिल्म “रंगबाज” में बतौर नायक इंट्री करे जा रहल बाड़न. एह सिलसिला में जब उनका से बात करे के मौका मिलल त हैदर काजमी के कहना रहे कि, “फिल्म रंगबाज अपना शर्त पर जिये वाला एगो रफ टफ आदमी के कहानी पर बनल बा. एही रफ टफ आदमी कृष्णा यादव के किरदार करे के मिलल बा हैदर काजमी के. बतवले कि चूंकि एह फिल्म के निर्देशक शिवराम यादव का साथ ऊ पहिले हिन्दी फिल्म “पथ” कर चुकल रहलन आ फिल्म के कहानी में उनकर भूमिका दमदार लागल त हामी भर दिहलन आ एह फिल्म से हैदर काजमी के भोजपुरी सिनेमा जगत में प्रवेश हो गइल. हैदर काजमी के पूरा विश्वास बा कि फिल्म दर्शकन के पसन्द आई काहे कि दर्शक एह फिल्म में आपन खुद के मौजूदगी महसूस करीहें. दोसरे फिल्म में नौ गो गाना बावे जवना में से दू गो पर सीमा सिंह आ एगो पर तसलीमा शेख के आयटम नंबर फिल्मावल गइल बा. फिल्म के नायिका रानी चटर्जी हई जे प्रतिभाशाली अभिनेत्रियन में गिनाली आ एहू फिल्म में ऊ बेहतर काम कइले बाड़ी.

अपना बातचीत में हैदर काजमी एह बात के बखूबी रेघरियवलन कि कवनो जरुरी नइखे कि जे आदमी कला के एक विधा में पारंगत बा ऊ दोसरो विधा में वइसने पारंगत होखे. काजमी के कहना बा कि भोजपुरी सिनेमा में बढ़िया अभिनेता के बहुते कमी बा आ निर्माता लोगन के चाहीं कि बढ़िया अभिनेता के मौका देसु आ सार्थक विषय पर फिल्म बनावसु जेहसे कि भोजपुरी सिनेमा के बढ़न्ती हो सके.

अपना काम का बारे में हैदर काजमी कहले कि रउरा सभे एकबेर रंगबाज जरुर देखीं आ एकरा बारे में ईमानदारी से आपन राय दीं. बढ़िया लागे उहो बताईं आ खराब लागे उहो. जेहसे कि आगा चल के ओकरा के सुधारल जा सके.

पूछला पर कि कवना तरह के भूमिका करल पसन्द करब, काजमी के कहना रहे कि ऊ किरदार जवन उनुका पर फिट हो सके आ जवना में ऊ फिट हो सकसु.
(स्रोत – शशिकान्त सिंह)

रंगबाज लगवलसि पटना में रंगबाजन के जमावड़ा

पिछला दिने जब फिल्म “रंगबाज” के संगीत जारी के रहे त पटना के पाँच सितारा होटल मौर्या में बिहार के रंगबाजन के जमावड़ा लाग गइल. होटल के गेट से पार्टी रुम तक आठ गो गेट सजावल रहे आ पटना के चप्पा चप्पा पर “रंगबाज” के पोस्टर साट दिहल रहे. एह पार्टी में फूल आ गुब्बारा से सजावल विनायल स्टेज पर जब फिल्म के नायक हैदर काजमी का संगे बिहार के मंत्री अइलें त चारो तरफ “रंगबाज” के गाना बाजे लागल. म्यूजिक रिलीज बिहार के खाद्य आपूर्ति मंत्री श्याम रजक का हाथे भइल. मौका पर मौजूद जानल मानल फिल्मकार आ फाइने्सर संजय सिन्हा, अभय सिन्हा आ सगरी अतिथि लोग पूरा टीम के बधाई दिहल. संगीत समारोह में पार्टीओ के आयोजन रहे जवना में बिहार के तमाम दिग्गज शामिल भइले.

“रंगबाज” के म्यूजिक रिलीज के ई समारोह ढेर दिन ले याद कइल जाई. बाद में पत्रकार सम्मेलन में निर्देशक शिवराम यादव, नायक हैदर काजमी आ नंबर वन आयटम डांसर सीमा सिंह सवालन के जबाब दिहलें. फिल्म के संगीत पहिले सुपर डुपर हिट साबित हो चुकल बा.


(स्रोत – शशिकान्त सिंह)