विनय आनन्द के ‘मंगल फेरा’ अब तीन भाषा में

भोजपुरी सिनेमा के स्टार अभिनेता विनय आनंद के नामे एगो नया रिकार्ड जुटे जात बा. विनय आनन्द भोजपुरी के पहिलका अभिनेता बन गइल बाड़ें जिनकर फिलिम एके साथ तीन गो भाषा में बनावल जात बा.

विनय आनंद अभिनीत फिल्म ‘मंगल फेरा’ के भोजपुरी, गुजराती अउर नेपाली, तीन गो भाषा में बनावल जात बा. आ तीनों में नायक विनय आनन्द शूटिंग करत बाड़ें. नेपाली फिल्म के शूटिंग नेपाल में होखत बा आ भोजपुरी अउरी गुजराती ‘मंगल फेरा’ के शूटिंग गुजरात में.

हॉरर फिल्म ‘मंगलफेरा’ के निर्माण गायत्री फिल्म प्रोडक्शन के बैनर में गायत्री राठौड़ करत बाड़ी आ निर्देशक बाड़ें श्रीधर शेट्टी. पिछला दिने नेपाल में पत्रकारन से बतियावत विनय आनंद आ श्रीधर शेट्टी बतवलें कि ‘मंगलफेरा’ में स्पेशल इफेक्ट के अलावा एगो अउर नया तकनीक के इस्तेमाल होखत बा जवन भोजपुरी में पहिला बेर होखत बा.


(ब्रेकिंग मैक्स मीडिया के रपट)

हिंदी के रीमेक वाली भोजपुरी फिलिम ना करीहें विनय आनंद

विनय आनंद एहला दुखी बाड़न कि आखिर भोजपुरी निर्माता हिंदी फिलिमन के रीमेक काहे बनावत बाड़ें. कहलन कि एह रीमेक से सिनेमा भोजपुरी के बढ़न्ती में बाधा पड़ट बा. एहसे विनय आनंद इहो तय कइले बाड़न कि ऊ हिन्दी फिलिमन के रीमेक वाली भोजपुरी फिलिमन से तौबा कर लीहें. कहलन कि एक बेर रीमेक फिलिम देखला का बाद दर्शक दोसर भोजपुरी फिलिम देखे से पहिले दस हाली सोचे लागत बा. कहलन कि हमनी कलाकारन के दायित्व बनता कि हमनी का अपना प्रशंसक के ताजा मनोरंजन दीं.

अपना आवेवाली फिलिमन में ‘लक्ष्मण रेखा’ के जमके तारीफ करत विनयआनन्द कहलें कि ई फिलिम एकदमे नया कहानी पर बनल बा. एकरनिर्माता विजय सिंह अउर लक्ष्मण गुप्ता आ निर्देशक मनोज गिरि हउवें.

एह साल विनय आनंद के करीब एक दर्जन फिलिम रिलीज होखेवाली बा. जवना में ‘हमरे नामे जिला हिलेला’, ‘एलान-ए-जंग’, ‘कजरा मोहब्बतवाला’, ‘तुलसी बिन सूना अंगनवा हमार’, ‘दामाद चाहीं फोकट में’, ‘दबंग दामाद’, ‘विनय भईया कईलस कमाल’, ‘काली’, ‘लक्ष्मण रेखा’, ‘दंगल’ ‘गुलाब थियेटर’ अउर ‘चुनरी संभाल गोरी’ जइसन फिलिमन के शूटिंगो विनय आनंद पूरा कर लिहले बाड़न.


(शशिकांत सिंह रंजन सिन्हा के रपट)

विनय आनंद के सबले डरावन फिलिम ‘मंगल फेरा’

सिनेमा भोजपुरी में डरावनी फिलिमन के हमेशा कमी रहल बा, अब एह कमी के दुर करे आवत बावे विनय आनंद के फिलिम ‘मंगल फेरा’. एह फिलिम के पूरा शूटिंग नेपाल में भइल बा आ एह फिलिम के बनावे में बहुते उच्च तकनीक के इस्तेमाल भइल बा. फिलिम के हॉरर सभकर रोंआ खड़ा कर दी.

गायत्री राठौड़ के बनावल आ श्रीधर शेट्टी निर्देशित एह फिल्म के कहानी दर्शन राठौड़, पटकथा पियूष शाह अउर श्रीधर शेट्टी, आ संवाद मोहम्मद रफी खान लिखले बाड़ें, संगीतकार हउवें राकेश त्रिवेदी, कैमरामैन हउवें श्रीनिवास आर.

ई फिलिम जल्दिए रिलीज होखे वाली बा.


(शशिकांत सि्ह रंजन सिन्हा के रपट)

गुंजन पन्त आ विनय आनद के बिआह करावल गइल


पिछला दिने उत्तर प्रदेश के बाबा काशी विश्वनाथ क पावन नगरी काशी (बनारस) में गंगा किनारे मंगल फेरा लेके, अग्नि के साखी मानत, वैदिक मंत्रोंच्चार संगे विनय आनंद आ गुंजन पंत के बिआह करावल गइल. एह मौका पर घाट के पंडित, महात्मा, बाबा विश्वनाथजी के दर्शन हेतु आइल श्रद्धालु, आस पड़ोस के लोग का साथे मौजूद फिल्म निर्माता अशोक गुप्ता आ बृजेश सिंह, अउर निर्देशक मनोज गिरी एह ‘नव दम्पति’ के आशीष दिहलें.

ई सबकुछ कइल गइल फिलिम ‘लक्ष्मण रेखा’ के एगो सीन खातिर. एह फिल्म के शूटिंग बनारस जौनपुर में जोर शोर से चलत बा. फिल्म में गुंजन पन्त एगो आम घरेलू महिला के किरदार करत बाड़ी जे आजु के जमाना से नावाकिफ बाड़ी. सिनेमा का परदा पर तीन गो शादी कर चुकल विनय आनंद के ई चउथा शादी रहल. विनय आनंद के पँचवा शादी जल्दिए फिल्म ‘भईल तोहरा से प्यार- आई लव य़ू’ में होखे वाला बा.


(अपना न्यूज के रपट)

जौनपुर में ‘लक्ष्मण रेखा’ खींचे में लागल बाड़ें विनय आनन्द

एह तपाइल गरमी में विनय आनन्द जौनपुर में अपना फिलिम लक्ष्मण रेखा के शूटिंग करत बाड़ें, विजय सिंह आ लक्ष्मण गुप्ता के एह फिल्म के निर्देशन करत बाड़ें मनोज गिरि जिनका साथे विनय आनंद के ई तिसरकी फिलिम होखी.

पिछला दिने विनय आनंद जब जौनपुर से सटले जलालपुर टीसन पर एगो जबरदस्त एक्शन सीन शूट कइलन त अपना चहेता स्टार के देखे ला लोग के भारी भीड़ उमड़ पड़ल. विनय आनंदो ओह लोग के निराश ना कइलन आ जम के ऑटोग्राफ दिहलन आ फोटो निकलवलन. विनय आनंद के जौनपुर के लोग आ एहिजा के लस्सी दुनु कमाल के लागल. कहलन कि एह लस्सी से गरमी से बहुते राहत मिलल.

एह साल विनय आनंद के पूरा एक दर्जन फिलिम रिलीज होखे वाली बा. एहमें से दस गो फिलिमन के शूटिंगो पूरा कर लिहले बाड़न विनय आनन्द आ ‘काली’, ‘लक्ष्मण रेखा’ अउर ‘दंगल’ अबहीं फ्लोर पर बाड़ी सँ. ‘हमरे नामे जिला हिलेला’ आ ‘एलान-ए-जंग’ भोजपुरी आ छत्तीसगढ़ी दुनु भाषा में बनल बाड़ी सँ आ दुनु के निर्देशक हउवें रवि सिन्हा.


(शशिकांत सिंह रंजन सिन्हा के रपट)

विनय आनंद अउर सुदीप पांडे क ‘खूनी दंगल’

भोजपुरी सुपर स्टार विनय आनंद आ सुदीप पांडे क जोरदार मारधाड़ से सजल रोमांटिक एक्शन भोजपुरी फिल्म ‘खूनी दंगल’ के निर्माण सुहानी सुहाना फिल्म्स के बैनर संजय कुमार करत बाड़ें आ प्रस्तुत करत बाड़े कुमार दिवाकर. निर्देशक हउवें जानल मानल निर्देशक श्रीधर शेट्टी. गीतकार राकेश निराला, संगीतकार राकेश त्रिवेदी, कथा लेखक सबा मुस्तफा, पटकथा लेखक सबा मुस्तफा अउर मोहम्मद रफी खान, संवाद लेखक मोहम्मद रफी खान, मारधाड़ निर्देशक हीमल, नृत्य निर्देशक केदार सुब्बा, कैमरा मैन श्रीनिवास आर.

फिल्म के मुख्य कलाकारन में विनय आनंद, सुदीप पांडे, अपूर्वा सिंह, दिव्या श्री, गोपाल राय, उदय श्रीवास्तव, जफर खान, दीपक आनंद, रोहित सिंह मटरू, मोहम्मद रफी खान, संजय कुमार, पुरुषोत्तम ओझा, निरुपमा जी, अर्जुन खोदकर अउर कयूम रजा के नाम बा.

एह फिल्म में पहिला बेर विनय आनंद एगो गाना गवले बाड़े. बाकी गायकन में उदित नारायण, कल्पना, विनोद राठौड़, इंदू सोनाली, अउर ममता राउत शामिल बाड़ी.


(शशिकांत सिंह रंजन सिन्हा के रपट)

‘पागल प्रेमी’ क सफलता का बाद विनय आनंद ‘लक्ष्मण रेखा’ में

भोजपुरी सुपर स्टार विनय आनंद अभिनीत फिल्म ‘पागल प्रेमी’ के सफलता का बाद उनुका में निर्माता निर्देशकन क भरोसा अउरी बढ़ गइल बा. पिछला दिने निर्देशक मनोज गिरि विनय आनंद के अपना फिल्म ‘लक्ष्मण रेखा’ ला साईन कइलन. एहसे पहिले मनोज गिरि उनुका साथे ‘प्यार हो गईल त हो गईल’ आ ‘चंदा’ के निर्देशन कइले रहलें. विजय सिंह आ लक्ष्मण गुप्ता के निर्माण लक्ष्मण रेखा के शूटिग बनारस में होत बा. एहमें विनय आनंद, गुंजन पंत आ अर्चना सिंह क खास भूमिका बा.

विनय आनंद निर्देशक शादो कुमार के अगिला फिलिम ‘भईल तोहरा से प्यार आई लव यू’ साईन कइले बाड़न. अकर निर्माता हउवें धर्मेन्द्र मौर्या.


(शशिकांत सिंह रंजन सिन्हा के रपट)

‘पागल प्रेमी’ भइल सुपर डुपर हिट

पिछला हफ्ता रिलीज फिल्म “पागल प्रेमी” बिहार में सुपर डुपर हिट साबित भइल बिया. सुपर स्टार विनय आनंद आ नंबर वन खलनायक संजय पांडे के जबरदस्त टक्कर से भरल निर्माता नवीन सिंह आ निर्देशक अजय कुमार के फिल्म ‘पागल प्रेमी’ देखे खातिर एह गरमियो में सगरी सिनेमा घरन पर हाउसफुल के बोर्ड लटक गइल,

ना होले भोजपुरी फिलिमन में अश्लीलता : विनय

फिल्म के प्रमोशन का सिलसिला में मोतहारी चहुँपल विनय आनन्द माधव सिनेमा हॉल में दर्शकन के रुबरू हो के ओह लोग के मनोरंजन कइलन. कहलन कि ना होले भोजपुरी फिलिमन में अश्लीलता. एकरा पर अश्लील होखे के अछरंग उहे लोग लगावेला जे भोजपुरी फिलिम देखबे ना करे. कहलन कि कुछ म्यूजिक अलबमन में जरूर अश्लील गाना ठूंसल रहेला बाकिर ओकर संबंध भोजपुरी सिनेमा से नइखे. कहलन कि आजु भोजपुरी सिनेमन में बहुते बदलाव आइल बा आ अउरियो बदलाव के जरूरत बा. आ ई तबहिए हो पाई जब सगरी समाज सिनेमा हॉल में आ के फिलिम देखल शुरु करी.

मोतिहारी में मिलल अपना शानदार स्वागत से खुश विनय आनन्द कहलन कि ऊ बेर बेर मोतिहारी आइल चहीहें.


(शशिकांत सिंह रंजन सिन्हा के रपट)

‘पागल प्रेमी’ 18 मई के बिहार में रिलीज होखी

निर्माता नवीन कुमार सिंह, निर्देशक अजय कुमार आ विनय आनंद स्टारर फिल्म ‘पागल प्रेमी’ बिहार में 18 मई के रिलीज होखे वाला बा. फिल्म में भोजपुरी सुपर स्टार विनय आनंद आ अजीत आनन्द नायक का भूमिका में, संगीता तिवारी आ श्रीकनकनी नायिका का भूमिका में, आ संजय पांडे खलनायक के भूमिका में बाड़े.

सविता श्री प्रोडक्शन के बैनर तले बनल एह फिल्म के शूटिंग छत्तीसगढ़ के रायपुर में भइल रहे. एक से बढ़के एक गीत राजेश मिश्रा, फनीन्द्र राव आ कृष्णा बेदर्दी लिखले बाड़े जवना के संगीत राजेश गुप्ता के बा. कैमरा मैन हउवें तांबन के, एक्शन डायरेक्टर दिलीप यादव, नृत्य निर्देशक एंथोनी हउवें. बाकी कलकारन में अनूप अरोड़ा, जय प्रकाश सिंह, राजेश अवस्थी, सुनीता सिंह, पारितोष त्रिपाठी, सुमन कुमारी, अमित सिंह आ पुष्पांजलि के नाम बा.

फिल्म के कहानी मौजूदा भ्रष्ट सिस्टम में अझूरा के एगो बाहुबली क इशारा पर अपराध करे वाला पागल प्रेमी बनल विनय आनंद एह फिल्म का बारे में निकहा उछाह में बाड़े. निर्देशक अजयो कुमार के उछाह कम नइखे.

त तइयार रहीं 18 मई के ‘पागल प्रेमी’ देखे ला.


(शशिकांत सिंह रंजन सिन्हा के रपट)

विनय आनन्द और श्रीधर शेट्टी चउथा हाली एक संगे

भोजपुरी सुपर स्टार विनय आनंद आ निर्देशक श्रीधर शेट्टी चउथा बेर अपना जोड़ी क जयजयकार करावत नजर अइहें. फिल्म होई ‘मंगल फेरा’ जवना के भोजपुरी आ गुजराती में बनावल जाई. एहसे पहिले ई जोड़ी ‘जय हो दूल्हे राजा’, ‘कजरा मोहब्बत वाला’ आ ‘खूनी दंगल’ बना चुकल बाड़े, ‘मंगल फेरा’ एह जोड़ी के चउथी फिलिम हियऽ. एकर निर्माण गायत्री राठौड़ आ वंशमणि शर्मा करत बाड़े, कहानी दशरथ राठौड़ के लिखल बा.

गायत्री सिने प्रोडक्शन अउर देवशक्ति फिल्म्स के बैनर तले बने जात एह फिल्म के शूटिंग 5 जून से नेपाल आ गुजरात में होखी.


(शशिकांत सिंह रंजन सिन्हा के रपट)