‘पागल प्रेमी’ भइल सुपर डुपर हिट

पिछला हफ्ता रिलीज फिल्म “पागल प्रेमी” बिहार में सुपर डुपर हिट साबित भइल बिया. सुपर स्टार विनय आनंद आ नंबर वन खलनायक संजय पांडे के जबरदस्त टक्कर से भरल निर्माता नवीन सिंह आ निर्देशक अजय कुमार के फिल्म ‘पागल प्रेमी’ देखे खातिर एह गरमियो में सगरी सिनेमा घरन पर हाउसफुल के बोर्ड लटक गइल,

ना होले भोजपुरी फिलिमन में अश्लीलता : विनय

फिल्म के प्रमोशन का सिलसिला में मोतहारी चहुँपल विनय आनन्द माधव सिनेमा हॉल में दर्शकन के रुबरू हो के ओह लोग के मनोरंजन कइलन. कहलन कि ना होले भोजपुरी फिलिमन में अश्लीलता. एकरा पर अश्लील होखे के अछरंग उहे लोग लगावेला जे भोजपुरी फिलिम देखबे ना करे. कहलन कि कुछ म्यूजिक अलबमन में जरूर अश्लील गाना ठूंसल रहेला बाकिर ओकर संबंध भोजपुरी सिनेमा से नइखे. कहलन कि आजु भोजपुरी सिनेमन में बहुते बदलाव आइल बा आ अउरियो बदलाव के जरूरत बा. आ ई तबहिए हो पाई जब सगरी समाज सिनेमा हॉल में आ के फिलिम देखल शुरु करी.

मोतिहारी में मिलल अपना शानदार स्वागत से खुश विनय आनन्द कहलन कि ऊ बेर बेर मोतिहारी आइल चहीहें.


(शशिकांत सिंह रंजन सिन्हा के रपट)

Advertisements

‘पागल प्रेमी’ 18 मई के बिहार में रिलीज होखी

निर्माता नवीन कुमार सिंह, निर्देशक अजय कुमार आ विनय आनंद स्टारर फिल्म ‘पागल प्रेमी’ बिहार में 18 मई के रिलीज होखे वाला बा. फिल्म में भोजपुरी सुपर स्टार विनय आनंद आ अजीत आनन्द नायक का भूमिका में, संगीता तिवारी आ श्रीकनकनी नायिका का भूमिका में, आ संजय पांडे खलनायक के भूमिका में बाड़े.

सविता श्री प्रोडक्शन के बैनर तले बनल एह फिल्म के शूटिंग छत्तीसगढ़ के रायपुर में भइल रहे. एक से बढ़के एक गीत राजेश मिश्रा, फनीन्द्र राव आ कृष्णा बेदर्दी लिखले बाड़े जवना के संगीत राजेश गुप्ता के बा. कैमरा मैन हउवें तांबन के, एक्शन डायरेक्टर दिलीप यादव, नृत्य निर्देशक एंथोनी हउवें. बाकी कलकारन में अनूप अरोड़ा, जय प्रकाश सिंह, राजेश अवस्थी, सुनीता सिंह, पारितोष त्रिपाठी, सुमन कुमारी, अमित सिंह आ पुष्पांजलि के नाम बा.

फिल्म के कहानी मौजूदा भ्रष्ट सिस्टम में अझूरा के एगो बाहुबली क इशारा पर अपराध करे वाला पागल प्रेमी बनल विनय आनंद एह फिल्म का बारे में निकहा उछाह में बाड़े. निर्देशक अजयो कुमार के उछाह कम नइखे.

त तइयार रहीं 18 मई के ‘पागल प्रेमी’ देखे ला.


(शशिकांत सिंह रंजन सिन्हा के रपट)

विनय आनन्द और श्रीधर शेट्टी चउथा हाली एक संगे

भोजपुरी सुपर स्टार विनय आनंद आ निर्देशक श्रीधर शेट्टी चउथा बेर अपना जोड़ी क जयजयकार करावत नजर अइहें. फिल्म होई ‘मंगल फेरा’ जवना के भोजपुरी आ गुजराती में बनावल जाई. एहसे पहिले ई जोड़ी ‘जय हो दूल्हे राजा’, ‘कजरा मोहब्बत वाला’ आ ‘खूनी दंगल’ बना चुकल बाड़े, ‘मंगल फेरा’ एह जोड़ी के चउथी फिलिम हियऽ. एकर निर्माण गायत्री राठौड़ आ वंशमणि शर्मा करत बाड़े, कहानी दशरथ राठौड़ के लिखल बा.

गायत्री सिने प्रोडक्शन अउर देवशक्ति फिल्म्स के बैनर तले बने जात एह फिल्म के शूटिंग 5 जून से नेपाल आ गुजरात में होखी.


(शशिकांत सिंह रंजन सिन्हा के रपट)

‘पागल प्रेमी’ में दर्शक हमार नया रूप देखीहें – विनय आनन्द

अबले पचासन भोजपुरी फिलिमन में काम कर चुकल सुपरस्टार विनय आनंद के आवे वाला दिनन में ‘एलान-ए-जंग’, ‘आज का दबंग दामाद’, ‘दामाद चाही फोकट में’, ‘तुलसी बिन सूना अंगनवा’, ‘काली’, ‘हमरा नावें जिला हिलेला’, ‘चुनरी संभाल गोरी’, ‘कजरा मोहब्बत वाला’, ‘खूनी दंगल’ अउर ‘पागल प्रेमी’ जइसन लगभग दर्जन भर फिलिम रिलीज होखे वाली बाड़ी सँ. एहमें सबले पहिले रिलीज होखेवाली बिया निर्माता नवीन कुमार सिंह आ निर्देशक अजय कुमार के ‘पागल प्रेमी’. सविताश्री प्रोडक्शन के बैनर तले बनल एह फिल्म का बारे में आ कुछ अउरी सवाल ले के विनय आनन्द से भइल बातचीत के कुछ अंश एहिजा पेश बा :

विनय आनंद जी, जल्दिये रिलिज होखे जात ‘पागल प्रेमी’ के बहुते चरचा चलत बा. आखिर कइसन फिलिम बावे ई ‘पागल प्रेमी’ आ एहमें आपके भूमिका का बा?
देखीं, ‘पागल प्रेमी में ऊ सबकुछ बा जवन भोजपुरिया दर्शक देखल चाहेलें. हम एहमें एगो प्रेमी के भुमिका में बानी जे अपना जीवन में आइल एगो लड़िकी से बेहद प्यार करे लागत बा. संजोग से ऊ लड़िकी ओकरा नइखे मिलत त कुछ अजबे हालात बनत बा जवना के एहमें देखावल गइल बा. फिल्म में हमरा साथ अजीत आनंद, संगीता तिवारी आ श्री कंकानी ओ बाड़ी आ सबही आपन किरदार बढ़िया से कइले बा. मुख्य खलनायक संजय पाँडे बाड़े जे अपना खलनायकी के लाजवाब जलवा बिखेरले बाड़न.

पागल प्रेमी से आपके कतना उम्मीद बा ?
देखीं. हम अपना सगरी फिलिमन ला ईमानदारी से मेहनत करीलें आ ‘पागल प्रेमी’ ला हमही ना बलुक फिलिम के पूरा टीमें इहे कहत बा. एहसे हम चाहत बानी कि ‘पागल प्रेमी’ के ज्यादा दर्शक देखसु आ ई फिल्म सुपर-डुपर हिट हो जाव. वइसे ई बनल बहुत बढ़िया बिया आ पूरा उमेद बा कि दर्शक एकरा के सफलो बनइहे.

निर्माता नवीन कुमार सिंह आ निर्देशक अजय कुमार क साथे काम करे के अनुभव कइसन रहल ?
लाजवाब…! हम त कहल चाहब कि एकरा प्रदर्शन का बाद नवीन कुमार सिंह जी के नाम भेजपुरी इंडस्ट्री के बड़का निर्मातन में शुमार होखे लागी आ अजय कुमारो जी भोजपुरी के प्रमुख निर्देशक में गिनाए लगीहें. निर्माता कवनो कोर कसर ना छोड़ले त निर्देशको जुनून से काम कइले बाड़न.

हिन्दी फिलिमन से अपना कैरियर के शुरुआत कइला का बाद भोजपुरी में कइसे अइनी ?
भई! भोजपुरी से त हमार बहुते पुरान नाता हवे काहे कि हमार ननिहाल बनारस ह. वसे हम कलाकार हईं आ जहवें बढ़िया काम मिली हम कर सकीलें. हँ एहमें हमरा पत्नी के सहयोग जरूर रहल काहे कि जब निर्माता नवीन अग्रवाल आ निर्देशक रंजन कुमार सिंह के फिल्म ‘तोहसे प्यार बा’ क ऑफर हमरा मिलल त उहे हमार हौसला बढ़वली आ कहली कि हमरा बेहिचक भोजपुरी फिलिम करे के चाहीं. ‘तोहसे प्यार बा’ हमार पहिला भोजपुरी फिल्म रहल आ ओकरा बाद त पाछा मुड़ के देखे के फुरसते ना मिलल.

आपके मामा गोविंदा जी कतना सहयोग दिहले ?
इचिकी बरोबर. जी हँ काम दिआवे में मामा से कवनो सहयोग ना मिलल ना हम कबो उनुका से सहयोग मँगनी. हँ अतना जरूर बा कि हम मामा किहें पलाइल बानी आ उनुकर चेला बन के रहल बानी. एहसे उनुका से सीखे के बहुत कुछ मिलल. हम त कहबकि उनुका साथे कुछ फिलिमन में काम करे के मौका मिलल आ हमरा ला इहे बड़हन बाति बा.

आपके आवे वाली फिलिमन कवन बाड़ी सँ ?
एक त ‘पागल प्रेमी’ ए बा जवन जल्दिए रिलीज होखे वाली बा. एकरा अलावे ‘एलान-ए-जंग’, ‘आज का दबांग दामाद’, ‘दामाद चाही फोकट मे, ‘तुलसी बिन सूना अंगनवा’, ‘गुलाब थिएटर’, ‘काली’, ‘हमारा नावें जिला हिलेला’, ‘चुनरी संभाल गोरी’, ‘विनय भइया कइलस कमाल’, ‘कजरा मोहब्बत वाला’ अउर‘खूनी दंगल’ फिलिम एक का बाद एक रिलीज होखत जइहें सँ.


(शशिकांत सिंह रंजन सिंहा के रपट)

जुर्म के दुनिया क ‘पागल प्रेमी’ में विनय आनन्द आ संजय पांडे के बादशाहत

आजु के भठियारा सिस्टम में अझुरा के एगो बाहुबली का इशारा पर अपराधी बनल “पागल प्रेमी” विनय आनंद आ बाहुबली रणवीर सिंह बनल संजय पांडे सिनेमा का परदा पर आपन आपन बादशाहत देखइहें. फिल्म में विनय आनन्द आ संगीता तिवारी के मुख्य भूमिका बा आ खलनायक नंबर वन बाड़े संजय पांडे. जल्दिए रिलीज होखे वाली एह फिल्म का बारे में भोजपुरी फिल्म जगत अबहिए से चरचा में लागल बा.

सविताश्री प्रोडक्शन के बैनर तले ‘पागल प्रेमी’ के निर्माता नवीन कुमार सिंह, निर्देशक आ कहानीकार अजय कुमार, गीतकार राजेश मिश्रा, फनीन्द्र राव आ कृष्णा बेदर्दी, संगीतकार राजेश गुप्ता, एक्शन डायरेक्टर दिलीप यादव आ डांस डायरेक्टर एन्थोनी अउर ज्योति आनन्द हउवें.
कलाकारन में विनय आनन्द, संगीता तिवारी, अजीत आनन्द, श्री कनकनी, अनूप अरोरा, जय प्रकाश सिंह, राजेश अवस्थी, सुनीता सिंह, परितोष त्रिपाठी, सुमन कुमारी, अमित सिंह, पुष्पांजलि, बोल गोविंद बनजारा आ नम्बर वन खलनायक संजय पाण्डेय बाड़े.


(शशिकान्त सिंह, रंजन सिन्हा के रपट)

‘किसना कईलस कमाल’ शुक से मुंबई में

भोजपुरी सुपर स्टार विनय आंनद के फिलिम ‘किसना कईलस कमाल’ शुक का दिने मुंबई में हंगामा बरसावे आवे वाली बा. एह फिल्म में विनय आनंद क नायिका बाड़ी गुंजन पंत. ‘किसना कईलस कमाल’ के निर्माता हउवें लक्ष्मण आर. पांडे आ निर्देशक हउवें चुनमुन पंडित.

विनय आनन्द के एगो अउर फिलिम ‘पागल प्रेमी’ओ खूबे चर्चा में बिया. इहो फिलिम जल्दिये रिलीज होखी. ‘पागल प्रेमी’ के निर्माता नवीन कुमार सिंह आ निर्देशक अजय कुमार हउवें.


(शशिकांत सिंह रंजन सिन्हा के रपट)

विनय आनंद चढ़लन आटो रिक्शा में

पिछला दिने भोजपुरी सुपर स्टार विनय आनंद अपना पत्नी का साथे मुंबई में आटो रिक्शा से चल दिहलन जुहू से चौपाटी खातिर. देखते लोग के भीड़ जुट गइल आ रिक्शा वाला हरान रहि गइल रहे सुपर स्टार विनय आनन्द के अपना रिक्शा में बइठा के. काहे कि ऊ विनय आनन्द के जबरदस्त फैन रहुवे. आ विनय आनन्द के कई गो फिलिम देखले रहुवे. जब विनय आनन्द ओकरा से भोजपुरी में बतियावल शुरू कइलन त ऊ कहलसि कि राउर चेहरा त विनय आनन्द जइसन लागत बा. विनय आनन्द हँसे लगलन आ कहलन कि हँ ढेरे लोग कहेला कि हमार चेहरा विनय आनन्द से मिलेला. बाकिर उनुकर पत्नी राज खोल दिहली आ बता दिहली कि हँ इहे विनय आनन्द हउवें. ओकरा बाद त रिक्शा वाला खुशी से पागल हो उठल आ भाड़ा लेबे के तइयार ना भइल. विनय आनन्द केहु तरह ओकरा के जबरिया भाड़ा दिहलन.

विनय आनन्द कहलन कि बहुते मँहगो सवारी में सफर कइले बाड़न बाकिर जवन आनन्द उनुका आटो का सवारी में मिलल तवन वाकई मजेदार रहल. कहलन कि पन्द्रह साल बाद आटो में बइठे के मौका मिलल रहे ओह दिन.


(शशिकांत सिंह रंजन सिन्हा के रपट)