प्यार के रंग में नचीहें संजय पांडे

भोजपुरिया खलनायक संजय पांडे अब ‘रंग दे प्यार के रंग में’ फिलिम में खलनायक के किरदार करत डांसो करत लउकीहें. फिल्म के शूटिंग पिछला दिने पूरा हो गइल आ अब एकर डबिंग होखत बा. एही दौरान निर्माता रामजनक जायसवाल के मन कइल कि काहे ना एहमें संजय पांडे पर एगो खास गाना फिलिमा लिहल जाव. संजय पांडे से पूछल गइल त चउंक के कहलें शूटिंग पूरा भइला का बाद कवन गाबा. बाकिर निर्माता के दबाव पर संजय पांडे तइयार हो गइलें आ एगो एडीशनल आयटम नम्बर फिलिमा लिहल गइल फिलिम ला.

संजय पांडे एह घरी हर बड़का बैनर का फिलिम में खलनायकी करत नजर आवत बाड़ें. पिछला दिने बिट्टू सरदार क फिल्म ‘रिक्शावाला आई लव यू’ क शूटिंग चांदीवली स्टूडियो में आ जगदीश शर्मा निर्देशित ‘एक बिहारी सौ पर भारी’ क शूटिंग मड आईलैण्ड में पूरा करवलें. दुनु में दिनेश लाल यादव ‘निरहुआ’ के मुख्य भूमिका बा. ‘सपूत’ आ ‘लहू के दो रंग’ फिलिमो में संजय पांडे मुख्य खलनायक बाड़ें.


(शशिकांत सिंह रंजन सिन्हा के रपट)

संजय पांडे फिर नये लुक में

भोजपुरी खलनायक संजय पांडे अब एक बेर फेर अपना लुक लेके नया प्रयोग करे वाला बाड़न आ ई लुक देखे क मिली बिट्टू सरदार के फिल्म ‘रिक्शा वाला आई लव यू’ में. एह फिल्म में संजय पांडे के खलानयकी के फ्रेम परम्परा से अलग किसिम के बा. संजय पांडे के क्रूरता अइसन बा कि पूछीं जन. जहाँ ले संजय पांडे के लुक के सवाल बा त चांदीवली स्टूडियो में चलत शूटिंग में कईएक स्टाफो संजय पांडे के ना पहचान पवलें. संजय पांडे के अबहीं करीब 15 गो फिल्म फ्लोर पर बाड़ी सँ.


(शशिकांत सिंह रंजन सिन्हा के रपट)

बिट्टूओ सरदार क फिलिम मे संजय पांडे

भोजपुरी नंबर वन खलनायक संजय पांडे हमेशा से वितरकन का नजर में गरम लिट्टी रहल बाड़े. हालही में उनुका के बिहार आ मुंबई के जानल मानल वितरक बिट्टू सरदार अपना बतौर निर्माता पहिलका फिलिम ‘रिक्शावाला आई लव यू’ में अनुबंधित कइले बाड़े. दिनेशलाल यादव ‘निरहुआ’ आ पाखी हेगड़े के मुख्य भूमिका वाली एह फिलिम के शूटिंग शुरू हो गइल बा. एहमें संजय के भूमिका सभके चउँकावे वाली बा.


(शशिकांत सिंह रंजन सिन्हा के रपट)

‘बजरंग’ आ ‘पागल प्रेमी’ के सफलता से संजय पांडे के डंका पिटाइल

भोजपुरी सिनेमा के नंबर वन खलनायक संजय पांडे के हालही में रिलीज दुनु फिल्म ‘बजरंग’ अउर ‘पागल प्रेमी’ के मिलल सफलता से संजय पांडे के डंका बाज गइल. एह दुनु में संजय पांडे एक से बढ़ि के एक खतरनाक स्टंट कइले बाड़न. एगो में त संजय के जान जात जात बाचल.

एह फिलिमन का बाद संजय पांडे क आवे वाली फिलिम हवे ‘गजब सिटी मारे सईंया पिछवाड़े’ जवना का अलावा ‘रखवाला’, ‘सईंया अरब गईले ना’ समेत करीब एक दर्जन फिलिम फ्लोर पर बाड़ी सँ. संजय पांडे हाल ही ‘दिवानगी’ आ ‘दबदबा’ खातिर अनुबंधित भइल बाड़ें.


(शशिकांत सिंह रंजन सिन्हा के रपट)

जुर्म के दुनिया क ‘पागल प्रेमी’ में विनय आनन्द आ संजय पांडे के बादशाहत

आजु के भठियारा सिस्टम में अझुरा के एगो बाहुबली का इशारा पर अपराधी बनल “पागल प्रेमी” विनय आनंद आ बाहुबली रणवीर सिंह बनल संजय पांडे सिनेमा का परदा पर आपन आपन बादशाहत देखइहें. फिल्म में विनय आनन्द आ संगीता तिवारी के मुख्य भूमिका बा आ खलनायक नंबर वन बाड़े संजय पांडे. जल्दिए रिलीज होखे वाली एह फिल्म का बारे में भोजपुरी फिल्म जगत अबहिए से चरचा में लागल बा.

सविताश्री प्रोडक्शन के बैनर तले ‘पागल प्रेमी’ के निर्माता नवीन कुमार सिंह, निर्देशक आ कहानीकार अजय कुमार, गीतकार राजेश मिश्रा, फनीन्द्र राव आ कृष्णा बेदर्दी, संगीतकार राजेश गुप्ता, एक्शन डायरेक्टर दिलीप यादव आ डांस डायरेक्टर एन्थोनी अउर ज्योति आनन्द हउवें.
कलाकारन में विनय आनन्द, संगीता तिवारी, अजीत आनन्द, श्री कनकनी, अनूप अरोरा, जय प्रकाश सिंह, राजेश अवस्थी, सुनीता सिंह, परितोष त्रिपाठी, सुमन कुमारी, अमित सिंह, पुष्पांजलि, बोल गोविंद बनजारा आ नम्बर वन खलनायक संजय पाण्डेय बाड़े.


(शशिकान्त सिंह, रंजन सिन्हा के रपट)

संजय पांडे देखइहें आपन ‘दबदबा’

ग्लैमर वर्ल्ड में आदमी क काम, व्यवहार आ समय के पंक्चुअलटी बोलेले. नंबर वन खलनायक संजय पांडे एही तीनो का बदौलत भोजपुरी सिनेमा पर राज करत बाड़े. संजय पांडे अब निर्माता शंभू पांडे के फिल्म ‘दबदबा’ खातिर अनुबंधित कइल गइल बाड़े. संजय पांडे निर्माता शंभू पांडे के फिल्म ‘गुलाम’ एहसे पहिले कर चुकल बाड़े.

संजय पांडे निर्देशक बाली के निर्देशन में बनत ‘मर्द तांगेवाला’ फिल्मो में मुख्य खलनायक के भूमिका में बाड़न. एह फिल्म के नायक हउवें एक्शन स्टार विराज भट्ट. संजय पांडे एह घरी लगभग हर बैनर के फिल्म में मुख्य खलनायक बन के लउकत बाड़े.


(शशिकांत सिंह रंजन सिन्हा के रपट)

जौनपुर में संजय पांडे

सिनेमा भोजपुरी के नंबर वन खलनायक संजय पांडे हउवन त आजमगढ़ के बाकिर एह घरी डेरा डलले बाड़न जौनपुर में. ओहिजा उनुकर फिल्म ‘सईंया अरब गईले ना’ के शूटिंग होखत बा. शूटिंग का बीच संजय पांडे जौनपुर आ ओहिजा के गरमागरम जलेबी के मजा लेत बाड़े. सबेरे सबेरे जलेबिये के नाश्ता होखत बा उनुकर सेट पर आवे से पहिले. कहतारें कि गजबे के उर्जा बा एहिजा के कचौड़ी जलेबी में जवना के सवाद एहिजा के मिलनसार आ मेहनती जौनपुरिया लोग से अउरी बढ़ि जात बा.


(शशिकांत सिंह रंजन सिन्हा के रपट से)

संजय पांडे के डबल धमाका

सिनेमा भोजपुरी के नंबर वन खलनायक संजय पांडे के हालही में दू गो फिलिम, ‘देवता’ अउर ‘राजा के रानी से प्यार हो गईल’, बिहार में एके साथ रिलीज भइल आ दुनु बंपर ओपनिंग लिहली सं. दुनु फिलिमन में संजय पाडे के काम के सभे जबरदस्त तारीफ करत बा.

गाँव से शहर ओर होखत पलायन पन बनल फिल्म ‘देवता’ में संजय पांडे के एक्शन के सैलाब देखे के मिलत बा. एह फिलिम में देखावल गइल बा कि शहर छोड़ अपना गाँवो जवार में सही राह पर चलि के सफलता लिहल जा सकेला.

अमर प्रेम कहानी पर बनल फिलिम ‘राजा के रानी से प्यार हो गईल’ में देखावल गइल बा कि जोड़ी भगवाने किहाँ बनेला आ साँच प्यार के हमेशा मिलन होला. एह में संजय पांडे के एक्शन स्टंट बावे.


(शशिकांत सिंह के रपट से)

अरब गइलन संजय पांडे

सिनेमा भोजपुरी के नंबर वन खलनायक संजय पांडे अपना शूटिंग खातिर अबले उत्तर प्रदेश, बिहार, गुजरात, मुंबई, मध्य प्रदेश समेत पूरा देश धांग चुकल बाड़े. अब बारी बा उनुका अरब जायेके. ना, ना. रउरा ना समुझनी. संजय पांडे निर्माता अजीत श्रीवास्तव के फिल्म ‘सईंया अरब गईले ना’ साईन कइले बाड़न आ उहो बतौर मुख्य खलनायक. एकरे बाति कहत रहीं.

फिल्म ‘सईंया अरब गईले ना’ के निर्देशक यशवंत सिंह ‘यश’ हउवन. त्रिलोक चित्र मंदिर के बैनर तले बनत एह फिल्म में अपना भूमिका से संजय पांडे बहुते उछाह में बाड़न. पिछला दिने जब एकर मुहुर्त धूमधाम से मुंबई के गोरेगांव पश्चिम के प्लेटिनम स्टूडियो में कइल गइल त तमाम दिग्गजन के जमावड़ा लागल रहे.


(शशिकांत सिंह के रपट से)

दस का दम

दस का दम खाली सलमाने खान का लगे नइखे बलुक भोजपुरी सिनेमो में एह घरी नंबर वन खलनायक संजय पांडे आ नंबर वन निर्देशक राजकुमार पांडे के ‘दस का दम’ देखे के मिलत बा. ना समुझनी त चलीं बता देता बानी.

दरअसल संजय पांडे आ राजकुमार पांडे अबले कुल दस फिलिम में एक साथ काम कइले बा लोग. एहमें से बेसी फिलिम सफलता के नया रिकार्ड बना दिहली स. संजय पांडे आ राजकुमार पांडे के जोड़ी के पहिला फिलिम रहे ‘कहिया डोली लेके अईबऽ’. साल 2003 में रिलीज एह भोजपुरी फिल्म से राजकुमार पांडे बतौर निर्देशक अपना पारी के शुरुआत कइले त संजयो पांडे के कैरियर के शुरूआत एही फिलिम से भइल.

एकरा बाद राजकुमार पांडे जइसन दिग्गज निर्देशक संजय पांडे के लेके ‘दिवाना’, ‘देवरा बड़ा सतावेला’, ‘सात सहेलियां’, ‘लहरिया लूटऽ ए राजा जी’, ‘सईयां के साथ मड़ईया में’, ‘मैं नागिन तू नगीना’, ‘दुश्मनी’ आ पर साल के सबले बड़ हिट फिल्म ‘ट्रक ड्राईवर’ दर्शकन के दिहले, एह नौ फिलिमन का बाद अब एह जोड़ी के दसवीं फिलिम के नाम हवे ‘सौगंध गंगा मईया के’. एह फिल्म के शूटिंग आजुकाल्हु वाराणसी में चलत बा. एज दस का दम पर खुद राजकुमार पांडे संजय पांडे के तारीफ करत कहलन कि ऊ कमाल के इंसान हउवे आ उनुका साथे काम कइल बहुते नीक लागेला. संजयो पांडे राजकुमार के निर्देशन के तारीफ करेले कि उनुका निर्देशन में कलाकारन के पूरा प्रतिभा परदा पर आ जाला.

त इहे ह भोजपुरिया ‘दस का दम’.


(शशिकांत सिंह के भेजल रपट)